Prezident İlham Əliyevin Qırğızıstana dövlət səfəri çərçivəsində iki dövlət arasında “Azərbaycan-Qırğızıstan İnkişaf Fondunun yaradılması haqqında” Saziş imzalanıb.
İnkişaf Fondu beynəlxalq təşkilat olacaq. Bu fond beynəlxalq müqavilələr bağlamaq hüququna malik olan beynəlxalq hüququn subyekti olacaq. İnkişaf Fondu Azərbaycan və Qırğızıstan arasında iqtisadi əməkdaşlığı inkişaf etdirmək, iqtisadiyyatı modernləşdirmək və inkişaf etdirmək məqsədilə yaradılıb.
Birgə ikitərəfli investisiya fondunun nizamnamə kapitalı 25 milyon ABŞ dollarıdır. Onun mənzil-qərargahı Bişkekdə yerləşəcək. Fondun yaradılması investisiya sahəsində əməkdaşlığın aktivləşməsi və genişlənməsinə təkan verəcək. Azərbaycan-Qırğızıstan İnkişaf Fondu qeydiyyatdan keçmiş və fəaliyyət göstərən sahibkarlıq subyektlərinə kreditlər və borclar verəcək, kapitalda iştirak edəcək və digər maliyyə alətlərindən istifadə etməklə, o cümlədən aşağıdakı sahələr üzrə təsisçilər üçün prioritet layihələrə investisiya qoyacaq: aqrar-sənaye kompleksi, su təchizatı sektoru, səhiyyə sektoru, avtomobil sənayesi, elm, tədqiqat və texnologiya, təbii qaz sənayesi, geyim və tekstil sənayesi, mədənçıxarma və metallurgiya sənayesi və s.
Maraqlıdır, ekspertlər Fondun yaradılmasını necə dəyərləndirir? Bunun nə kimi əhəniyəti olacaq?
“İki ölkə arasında ticarət əlaqələrinin genişləndirilməsi əsas hədəflərdən biridir”
Məsələyə münasibət bildirən millət vəkili Vüqar Bayramovun fikrincə, iki ölkə arasında İnkişaf Fondunun yaradılmasının perspektivi var: “Bütövlükdə, son illər türk dövlətləri arasında münasibətlərin inkişaf etməsi və genişlənməsi müşahidə olunur. Prezident İlham Əliyevin Orta Asiya ölkələrinə səfərləri, oradaki liderlərin ölkəmizə səfəri əlaqələrin inkişafına təkan verir. Eyni zamanda, Türkiyə ilə Orta Asiya ölkələri arasında qarşılıqlı səfərlər birgə layihələrin artmasına öz təsirini göstərib. Eləcə də türk dövlətlərinin birgə İnvestisiya Fondunun yaradılması iqtisadi inkişafa müsbət təsir edəcək. Bu konteksdə Azərbaycan-Qırğızıstan İnkişaf Fondunun yaradılması sərmayə qoyuluşlarını təşviq edəcək. Xüsusən də yeni texnologiyaların transferini həyata keçirmək və birgə layihələrin reallaşması baxımından vacibdir. Əsasən də nəzərə almaq lazımdır ki, Azərbaycan Qırğızıstana daha çox sərmayə qoymaqda maraqlıdır. Bununla belə, iki ölkə arasında ticarət əlaqələrinin genişləndirilməsi əsas hədəflərdən biridir. Ona görə də İnkişaf Fondunun yaradılması ölkələr arasında investisiya qoyuluşlarının artmasına gətirib çıxaracaq. Bütün bunlar nəticə etibari ilə Azərbaycanla Qırğızıstanın münasibətlərinin daha da dərinləşməsinə gətirib çıxaracaq”.
Bir sözlə, millət vəkili hesab edir ki, hər iki ölkə bundan faydalanacaq.
Vidadi ORDAHALLI
