Ağdam Sənaye Parkında sahibkarlar üçün geniş biznes imkanları yaradılacaq. Bu barədə İqtisadi Zonaların İnkişafı Agentliyinin (İZİA) yaydığı məlumatda qeyd edilir.
Bildirilir ki, Sənaye Parkının rezidentləri qeydiyyata alındıqları tarixdən 10 il müddətinə əmlak vergisindən, torpaq vergisindən, gəlir və ya mənfəət vergisindən, istehsal məqsədilə idxal etdikləri texnikanın, texnoloji avadanlıqların və qurğuların idxalı zamanı ƏDV-dən və 7 il müddətinə gömrük rüsumlarından azad olunacaqlar.
Sənaye Parkının rezidentlərinə əlavə güzəştlərin (xüsusi güzəştli bank kreditlərinin təmin olunması, sosial sığorta ödənişlərin subsidiyalaşdırılması, kommunal xidmətlərin endirimli tariflə təklif edilməsi, xammal idxalında gömrük və ya ƏDV güzəştləri) də verilməsi nəzərdə tutulur.
“Vergi, gömrük və digər güzəştlər azad edilmiş ərazilərdə yaradılan sənaye və aqrar komplekslərin istehsal və emal potensialını təmin etməklə Azərbaycanın ümumi iqtisadi inkişafına təkan verəcək”
Ağdam Sənaye Parkında sahibkarlar üçün biznes imkanlarının genişləndirilməsinin əhəmiyyəti haqqında danışan Milli Məclisin İqtisadi siyasət, sənaye və sahibkarlıq komitəsini üzvü Aydın Hüseynov “Bakı-Xəbər”ə açıqlamasında qeyd etdi ki, işğaldan azad edilmiş Qarabağ və Şərqi-Zəngəzur iqtisadi rayonlarında bərpa və quruculuq işləri ilə yanaşı, zəngin iqtisadi sərvətləri olan bu torpaqların milli iqtisadiyyata inteqrasiyası istiqamətində tədbirlər davam etdirilməkdədir. Prezident İlham Əliyevin 10 dekabr 2021-ci il tarixli “İşğaldan azad edilmiş ərazilərdə iqtisadi inkişafın sürətləndirilməsi ilə bağlı bəzi tədbirlər haqqında” Sərəncamına əsasən, həmin ərazilərdə istehsal fəaliyyəti ilə məşğul olan sahibkarlara gömrük, vergi, sosial güzəştlərin və digər dəstək tədbirlərinin verilməsi nəzərdə tutulur: “Dövlət başçısının müvafiq tapşırığına uyğun olaraq, azad edilmiş ərazilərdə istehsal, emal, ticarət və xidmət infrastrukturunun yaradılması, yeni texnologiyaların tətbiqi, investisiya layihələrinin həyata keçirilməsi məqsədilə xüsusi vergi-gömrük güzəştləri, müxtəlif iqtisadi, maliyyə və institisional stimullar tətbiq olunacaq”.
Millət vəkilinin sözlərinə görə, Qarabağ və Şərqi-Zəngəzur bölgəsi böyük sənaye və aqrar potensiala malikdir. Bu ərazilərdə müasir sənaye komplekslərinin yaradılması işləri start götürüb. Cəbrayılda yeni fəaliyyətə başlayan “Araz Vadisi İqtisadi Zonası” Sənaye Parkında ilk xarici investorlar qeydə alınıb: “Həmçinin, Ağdam Sənaye Parkının təməli qoyulub. Ağdamın Qarabağ regionundakı strateji coğrafi mövqeyi, Qarabağla digər bölgələrin qovuşuğunda yerləşməsi, insan resursları potensialı və infrastruktura çıxış imkanları şəhərin gələcəkdə Qarabağın sənaye mərkəzinə çevrilməsi imkanlarını genişləndirir. 190 hektar ərazini əhatə edən Ağdam Sənaye Parkında tikinti materiallarının istehsalı, kənd təsərrüfatı məhsullarının qablaşdırılması, meyvə-tərəvəz konservləri, ət və süd məhsulları, yem, gübrə istehsalı və emalı, eyni zamanda, xidmət sahələrinin, soyuducu kameraların və s. təşkili müəyyənləşdirilib. Bu əraziyə yerli və xarici investorları cəlb etmək və onların marağını artırmaq məqsədilə vergi güzəştləri tətbiq olunacaq. Artıq bununla bağlı Vergi Məcəlləsinə “İşğaldan azad edilmiş ərazilərdə tətbiq edilən vergitutmanın xüsusiyyətləri” adlı fəsil əlavə olunması nəzərdə tutulur. Layihədə 2023-cü il yanvarın 1-dən işğaldan azad edilmiş ərazilərdə vergi uçotuna alınan və bilavasitə həmin ərazilərdə fəaliyyət göstərən hüquqi və fiziki şəxslərin 10 il müddətində mənfəət və gəlir, əmlak, torpaq və sadələşdirilmiş vergidən azad olunması, 10 il müddətində dividend gəlirlərinin vergidən azad edilməsi, habelə bu ərazilər daxilində hava və dəmiryolu nəqliyyatı vasitəsilə sərnişin və yük daşımalarına görə əlavə dəyər vergisinin (ƏDV) 0 dərəcə ilə vergiyə cəlbi nəzərdə tutulur. Həmçinin, işğaldan azad olunmuş ərazilərdə fəaliyyət göstərən sahibkarlara xammal və materialların idxalı ilə bağlı gömrük güzəştlərinin verilməsi, kommunal xidmətlər (elektrik enerjisi, təbii qaz və su istehlakı) üzrə güzəştlərin tətbiqi də gözlənir”.
A.Hüseynov onu da əlavə etdi ki, vergi, gömrük və digər güzəştlər azad edilmiş ərazilərdə yaradılan sənaye və aqrar komplekslərin istehsal və emal potensialını təmin etməklə Azərbaycanın ümumi iqtisadi inkişafına təkan verəcək, bu bölgədə sənaye və kənd təsərrüfatında əhəmiyyətli dönüş yaradacaq. Bu ərazilərə xarici sərmayəçilərin axınına səbəb olacaq.
Günel CƏLİLOVA
