Əmlak sığorta bazarında canlanma başlayıb - 18 faiz...

Kamran Məmmədli: “Ötən illərdən fərqli olaraq, əhali artıq daşınmaz əmlakın icbari sığortasına maraq göstərir”

img

Gündəlik olaraq Bakıda və ya regionlarda kiminsə bu və ya digər səbəblərdən evinin, əmlakının qismən və ya tamamilə yanması ilə bağlı xoşagəlməz xəbərlər alırıq. Mülk sahibləri evlərinə dəymiş ziyanı dilə gətirsələr də, heç bir yerə müraciət edə bilmirlər.

Çünki yaşayış mənzilləri və ya evlərini sığortalatmağa maraq göstərməyiblər və ya bu məsələyə ciddi yanaşmayıblar. Son illər bu kimi halların artması artıq hər kəsi narahat etməyə başlayıb. Amma bununla bağlı artıq vəziyyət dəyişib. Belə ki, daşınmaz əmlakın sığortası ilə vətəndaş ona dəyən ziyanı həll edir. Qeyd edək ki, uzun illərdir vətəndaşlar əmlakın sığortasına elə də ciddi yanaşmırdılar. Ancaq bir neçə il əvvəl sığorta şirkətləri belə bir kampaniya apardılar ki, bəs kimsə evini sığortalamasa həmin şəxs müəyyən məbləğdə cərimələnəcək. Bundan sonra insanlar öz əmlaklarını sığorta etməyə başladılar. Aparılan araşdırmalar zamanı məlum olub ki, son zamanlar Azərbaycanda əmlak sığortası bazarı 18 % böyüyüb. Qeyd edək ki, hələ bir neçə il öncə ölkədə əmlak sığortası ilə bağlı göstəricilər daha aşağı olsa da, hazırda bu istiqamətdə müəyyən irəliləyişlər var.

Maraqlıdır, əmlak sığorta bazarında canlanmanın yaranmasının səbəbi nə ilə bağlıdır?

  • “Pandemiyadan əvvəl sığorta şirkətləri kampaniya apardılar və vətəndaşları qorxutmağa başladılar ki, kimsə əmlakını sığorta etməsə cərimələnəcək, ancaq…”

Iqtisadçı ekspert Kamran Məmmədli bildirdi ki, ötən illərdən fərqli olaraq, əhali artıq daşınmaz əmlakın icbari sığortasına maraq göstərir. Daşınmaz əmlakın icbari sığortasından istifadə edilməməyinin səbəblərindən biri də vətəndaşların daşınmaz əmlakın icbari sığortası ilə bağlı məlumatlılıq səviyyəsinin aşağı olması ilə bağlıdır: “Bu birmənalı şəkildə onların daşınmaz əmlakın icbari sığortasından istifadə etmələrini məhdudlaşdırır. Əvvəla icbari sığorta vətəndaşlar üçün vacibdir. Bu əmlaka, yaşayış mənzillərinə, eləcə də qeyri-yaşayış binalarına dəyən hər hansı ziyanın sığorta şirkəti tərəfindən ödənilməsinə gətirib çıxarır”.

Ekspert hesab edir ki, əmlak sığortasında yığımların artmasının müəyyən səbəbləri var: “Belə ki, pandemiyadan əvvəl sığorta şirkətləri kampaniya apardılar və vətəndaşları qorxutmağa başladılar ki, kimsə əmlakını sığorta etməsə  cərimələnəcək. Ancaq heç kəs cərimələnmir. Təəssüf ki, bəzi insanlar bu kampaniyadan çəkindiyi üçün əmlaklarını sığortalamağa başladılar. Həmçinin, əmlakla alqı-satqı, bağışlama, girov qoyanda, ipoteka zamanı notariuslar başlayırlar tələb etməyə ki, gedib əmlakın icbari sığorta olunması haqqında sənəd gətirin. Vətəndaşlar da məcbur olurlar ki, gedib icbari sığorta etsinlər. Yəni sırf bunun sayəsində artım baş verir, vətəndaşları məcbur edirlər. Qanuna görə də əmlak icbari sığorta olunmalıdır”.

Günel CƏLİLOVA

Peşə etikası

Son xəbərlər