“Bütövlükdə Azərbaycanda mövcud olan sabitlik, iqtisadi inkişaf, qonşu ölkələrlə münasibətlərimiz, nəqliyyat, kommunikasiyalar, elektrik xətləri nöqteyi-nəzərindən qonşu ölkələrlə sıx təmaslar unikal bir vəziyyət yaradır ki, Azərbaycan nəinki xam neft, neft məhsulları və təbii qaz, eyni zamanda, elektrik enerjisinin böyük istehsalçısı və ixracatçısı olacaq”. Bunu Prezident İlham Əliyev Qaradağ Günəş Elektrik Stansiyasının təməlqoyma mərasimində çıxışı zamanı deyib.
“Qonşu ölkələrdə və Avropa qitəsində elektrik enerjisinə böyük ehtiyac var. Biz elektrik enerjisini yalnız ekoloji cəhətdən təmiz mənbələrdən istehsal edirik - təbii qaz, su, Günəş və külək. Bir daha demək istəyirəm ki, Azərbaycanda bərpaolunan enerji növlərinin potensialı həddindən artıq böyükdür. Məhz buna görə dünyanın aparıcı enerji şirkətləri indi Azərbaycanla bu sahədə əməkdaşlıq etməyə çox maraqlıdırlar. Əminəm ki, biz yaxın gələcəkdə yeni layihələrin başlanmasına start verəcəyik”, - dövlət başçısı qeyd edib.
Maraqlıdır, Azərbaycan elektrik enerjisini hansı ölkələrə ixrac edə bilər?
“Azərbaycan İranla birgə yeni yaradılan yeni Zəngəzur dəhlizinin istifadəyə verilməsindən sonra həm ixracı artıracaq, həm də digər dövlətlərin enerji təminatında əsaslı rol oynayacaq”
Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov “Bakı-Xəbər”ə açıqlamasında qeyd etdi ki, Birləşmiş Ərəb Əmirlikləri “Masdar” şirkəti tərəfindən Azərbaycanda inşa ediləcək 230 MVt gücündə Qaradağ Günəş Elektrik Stansiyasının təməlinin qoyulması neft-qaz sektorunda xarici şirkətlərlə imzalanmış irihəcmli enerji sazişlərindən sonra regionda sərmayə tutumuna və enerji istehsalı imkanlarına görə ən böyük qeyri-neft sazişlərindən biri kimi qiymətləndirilə bilər: “Bu, həm də Azərbaycanın bölgədə enerji siyasətinin şaxələndirilməsi ilə bağlı yürütdüyü enerji diplomatiyasının növbəti uğurudur. Enerji sahəsində dünyanın aparıcı şirkətləri ilə birgə əməkdaşlığının növbəti uğuru olmaqla əhəmiyyətli investisiya layihəsinin icrasının təmin edilməsi deməkdir. “Masdar” şirkətinin Azərbaycanda ən iri sərmayə layihələrindən birini həyata keçirməsi göstərir ki, ölkəmiz xarici sərmayə üçün çox cəlbedicidir və güclü investisiya iqlimi vardır. Ümumiyyətlə, son dövrlərdə Azərbaycanın ən nüfuzlu xarici şirkətlərlə, xüsusilə də ərəb ölkələrinin nəhəng enerji korporasiyaları ilə əməkdaşlığı artırması mühüm əhəmiyyət kəsb etməkdədir. Bir müddət əvvəl Azərbaycan Səudiyyə Ərəbistanının “ACWA Power” şirkəti ilə 240 meqavat gücündə Külək Elektrik Stansiyasının təməlini qoyub. Fevral ayında “Azərenerji” tərəfindən inşa edilmiş 385 meqavat gücündə elektrik stansiyasının, Qobu enerji mərkəzinin açılışı bu sahədə davamlı layihələrin icra olunduğunu göstərir”.
A.Hüseynovun sözlərinə görə, Qaradağ Günəş Elektrik Stansiyası ölkəmizdə bərpa olunan enerji mənbələrinə xüsusi diqqətin nümunəsi və alternativ enerji konsepsiyasının uğurla həyata keçirilməsi istiqamətində yürüdülən siyasətin təzahürüdür. Bu stansiya ekoloji baxımdan təmiz enerji mənbələrinin yaradılmasında ən iri təchizat mərkəzlərindən biri olacaq. Onu da nəzərə alsaq ki, Qaradağ rayonu ölkəmizin sənaye mərkəzlərindən biri kimi ən müasir sənaye-enerji layihələrinin həyata keçirilməsində aparıcı yer tutur və bu rayonda xüsusi iqtisadi zonanın yaradılması xarici investorların da marağı baxımından əhəmiyyətlidir. Qaradağda strateji logistika-nəqliyyat mərkəzlərinin, Qaradağ Sənaye Parkının yaradılması və digər qlobal əhəmiyyətli layihələrin həyata keçirilməsi bu rayonun enerji zonasına çevrilməsində də mühüm rol oynayacaq.
Millət vəkili onu da əlavə etdi ki, Qaradağ Günəş Elektrik Stansiyası həm ölkəmizin enerjiyə artan tələbatını ödəyəcək, eyni zamanda, ixrac imkanlarımızı genişləndirəcək. “Azərbaycan elektrik enerjisinin ixrac edən ən təminatlı ölkələrdən biridir. Hazırda dörd qonşu ölkəyə enerji ixrac edən Azərbaycan İranla birgə yaradılan yeni Zəngəzur dəhlizinin istifadəyə verilməsindən sonra həm ixracı artıracaq, həm də digər dövlətlərin də enerji təminatında əsaslı rol oynayacaq. Bütün bunlar Azərbaycanda energetika sektorunun yeni inkişaf mərhələsinə daxil olduğunu və xarici iş adamlarının ekoloji cəhətdən təmiz enerji mənbələrinin istehsalında Azərbaycanla əməkdalıqda maraqlı olduqlarını təsdiqləyir”.
Azərbaycanın böyük enerji potensialının olduğunu vurğulan A.Hüseynov işğaldan azad edilmiş ərazilərin bərpa olunan enerji və digər zəngin mənbələr baxımından xüsusilə əhəmiyyətini xatırlatdı. “Cənab Prezidentin də vurğuladığı kimi, həmin ərazilərdə hədsiz dərəcədə güclü potensialın olması qarşıdakı illərdə xarici investorların Qarabağ və Şərqi-Zəngəzurda Günəş, külək stansiyaları yaratmasına və istehsalın artması nəticəsində Azərbaycanın enerji güclərinin 9-10 min meqavata çatmasına səbəb olacaq”.
Günel CƏLİLOVA
