Pandemiya ilə əlaqədar toyların olmaması səbəbindən mebelə olan tələbat kəskin azalıb. Ancaq buna baxmayaraq, yerli mebel istehsalçıları və xarici mebellərin satış nümayəndəlikləri qiymətləri aşağı salmır. Nadir hallarda cüzi endirimlər olur. Adi el dilində desək, “jurnalnıy” stolun qiyməti 250 manatdan aşağı deyil.
Bununla yanaşı, mebel istehsalı ilə məşğul olan şirkətlər lazım olan materialları, avadanlıqları ancaq xaricdən gətirirlər. Halbuki, onları ölkə daxilində də istehsal etmək olar. Bunun üçün yetərincə böyük potensial var. Bu həm məhsulun maya dəyərinin azalmasına, həm də yeni iş yerlərinin açılmasına təkan verəcək. Ancaq mebel istehsalı ilə məşğul olan sahibkarlar, ümumiyyətlə, buna maraq göstərmirlər. Digər bir tərəfdən, Prezident İlham Əliyev də dəfələrlə bəyan edib ki, ölkədə istehsal olunan mebellərə üstünlük verilməlidir. Lakin bu prosesə təkan vermək əvəzinə, mebel şirkətləri və onların dillerləri hər vasitə ilə buna mane olmaq istəyirlər. Hər vasitə ilə çalışırlar ki, ölkəyə mebel xaricdən gəlsin. Ölkə daxilində istehsal genişlənməsin. Bütün bunlarla yanaşı, pandemiya ilə əlaqədar toyların olmaması səbəbindən mebelə olan tələbatın kəskin düşməsinə baxmayaraq, qiymətlər aşağı salınmır. Qiymətlərin aşağı düşməsinə elə özləri maneçilik törədirlər ki, yerli mebellərə maraq olmasın. Burada təkcə toy edənlərdən söhbət getmir. Söhbət həm də idarə və müəssisələrin mebelə olan tələbatının ödənilməsindən gedir. Ancaq mebel satışı ilə məşğul olan şirkətlər özləri maraqlı deyillər ki, cəmiyyət yerli mebelləri alsın. Həm yerli mebel istehsalına maraq göstərmirlər, həm də qiymətləri süni şəkildə düşməyə qoymurlar ki, yerli mebel istehsalı inkişaf etməsin.
“İmkan vermək olmaz ki, hansısa işbazlar buna mane olsunlar”
Məsələyə münasibət bildirən millət vəkili Vüqar Bayramovun sözlərinə görə, bu kimi süni maneələri aradan qaldırmaq lazımdır: “Həqiqətən də pandemiya ilə əlaqədar mebel məhsullarına olan tələbat kəskin azalsa da, biz bu sahədə qiymət azalmasını görmürük. Bu isə anormal bir durumdur. Əslində, tələbat azalırsa, o zaman qiymətlər aşağı düşməlidir. Qiymətlərin ucuzlaşmasının başlıca yollarından biri yerli istehsalın genişlənməsidir. Yerli istehsal isə lazımi səviyyədə deyil. Düzdür, istehsal var, amma keyfiyyəti yüksək deyil. Bu da, öz növbəsində, əhalinin yerli mebellərə olan inamını sarsıdır. Ona görə də başlıca məsələlərdən biri əhalinin inamını qazanmaqdır. Bunun üçün də yerli istehsala aid olan mebellərin keyfiyyəti artırılmalıdır. İmkan vermək olmaz ki, hansısa işbazlar buna mane olsunlar. Bu sahəni təşviq etmək lazımdır ki, yerli mebel istehsalı genişlənsin. Mebel üçün lazım olan məmulatlar ölkə daxilində istehsal olunsun. Onların xaricdən gətirilməsinə ehtiyac olmasın. Bunun sayəsində həm qiymətlərin aşağı salınmasına, həm də yeni iş yerlərinin açılmasına nail olmaq olar. Eyni zamanda, keyfiyyətli məhsulların bazara çıxarılmasına nail olmaq mümkündür. Pandemiya göstərdi ki, qiymət azalmasına nail olmaq üçün yerli istehsalı hərtərəfli təşviq etmək lazımdır”.
Millət vəkili bir daha vurğuladı ki, bu sahədə mövcud olan problemlər aradan qaldırılmalı və yerli istehsala önəm verilməlidir.
Vidadi ORDAHALLI
