Məlum olduğu kimi, Azərbaycan 2020-ci il üzrə İqtisadi azadlıq indeksində göstəricilərini yaxşılaşdırmış beş Avropa ölkəsi arasında birinci yeri tutub. Bu barədə "Heritage Foundation" məlumat yayıb.
Hesabata əsasən, 2020-ci ildə Azərbaycanın mövqeləri biznes azadlığı, investisiya azadlığı və maliyyə rifahı sahəsində yüksək qiymətlər sayəsində 16 pillə yüksəlib.
Azərbaycan iqtisadi azadlıq qiymətləndirməsinə görə, 69,3 indekslə 180 ölkə arasında 44-cü yerdə qərarlaşıb. Biznes azadlığı, investisiya azadlığı və maliyyə rifahı göstəricisində isə Azərbaycanın indeksi 3,9 xal yüksəlib. Ölkə bu göstəricidə 45 Avropa ölkəsi arasında 24-cü olub.
Görünən odur ki, son illər ölkədə aparılan sistemli və genişmiqyaslı islahatlar bir sıra sahələrdə əldə olunan irəliləyişlərə effektiv təsir göstərib. Bunun nəticəsidir ki, Azərbaycan İqtisadi azadlıq indeksində göstəricilərini yaxşılaşdırmış beş Avropa ölkəsi arasında birinci yeri tutub.
Maraqlıdır, bəs ekspertlər bu uğurun kökündə dayanan faktorları necə dəyərləndirirlər?
“İqtisadiyyatın şaxələndirilməsi siyasəti, ixracyönlü iqtisadiyyatın formalaşdırılması və digər sahələr prioritet təşkil etdi”
Məsələyə münasibət bildirən millət vəkili Elman Nəsirovun sözlərinə görə, hesabatda Azərbaycanın belə bir önəmli reytinqə sahib olması təsadüfi deyil: “Bu, ilk növbədə, Prezident İlham Əliyevin 17 il ərzində həyata keçirdiyi islahatlar kursunun məntiqi nəticəsidir. Xüsusən də 2018-ci ilin aprelində xalqın növbəti dəfə etimadını qazanıb Prezident seçiləndən sonra cənab İlham Əliyev dərinləşən hərtərəfli islahatlar kursunun anonsunu verdi və bu istiqamətdə real addımlar atmağa başladı. Bu da nəinki iqtisadiyyatı, bütün sahələri əhatə etdi. İqtisadiyyatın şaxələndirilməsi siyasəti, ixracyönlü iqtisadiyyatın formalaşdırılması və digər sahələr prioritet təşkil etdi. Bütün bunlar ona gətirib çıxardı ki, Azərbaycanın bütün sferalarında dinamik inkişaf müşahidə edildi. Ona görə də hesabatda Azərbaycanın ön sırada durması heç bir halda təsadüfi deyil. Bundan bir qədər əvvəl Dünya Bankı Azərbaycanı 190 ölkə arasında iqtisadiyyatın rəqabət qabiliyyətinə görə 28-ci yerə layiq görüb. Eyni zamanda, 10 islahatçı ölkə sırasında göstərib. Həmçinin, məlum oldu ki, biznesin əlçatanlığına görə Azərbaycan dünya miqyasında ikinci yerdədir. Siyasi sabitliyə görə 11-ci yerdədir. Hökumətin hesabatlığına görə 5-ci yerdədir. Ona görə də bu, böyük zəhmətin və dərinləşən islahatlar kursunun nəticəsidir”.
Millət vəkilinin fikrincə, bütün bunlar bir daha onu göstərir ki, Azərbaycan inkişaf etmiş ölkələr sırasına daxil olacaq.
Vidadi ORDAHALLI
