Açıqlanan statistik rəqəmlərə əsasən, bu ilin yanvar ayında istehlak kreditlərinin həcmi artıb. Mərkəzi Bankın yayımladığı statistikaya əsasən, 2020-ci ilin dekabr ayının sonunda istehlak kreditləri portfeli 4 milyard 615 milyon 900 min manat olduğu halda, 2021-ci ilin yanvar ayının sonunda 4 milyard 662 milyon manat təşkil edib.
Yanvar ayında ticarət və xidmət sektoruna verilən kreditlər 500 min manat, energetika, mədənçıxarma, kimya və təbii ehtiyatlar sektoruna verilən kreditlər 246,5 milyon manat, kənd təsərrüfatı, meşə təsərrüfatı və balıqçılıq sektoruna verilən kreditlər 6,8 milyon manat, inşaat və tikinti sektoruna verilən kreditlər 34 milyon manat, maliyyə sektoruna kredit qoyuluşları 6,4 milyon manat artıb, sənaye və istehsal sektoruna verilən kreditlər 268,5 milyon manat, nəqliyyat və rabitə sektoruna verilən kreditlər 16.3 milyon manat, digər sektorlara verilən kreditlər 7 milyon manat, faktorinq əməliyyatları 10,2 milyon manat azalıb.
2020-ci ilin sonu ilə müqayisədə 2021-ci ilin yanvar ayında cəmi kredit qoyuluşları 56,8 milyon manat artaraq 14 milyard 587 milyon 200 min manata çatıb.
Açıqlanan statistik rəqəmlərdən də bəlli olur ki, istehlak kreditlərinin həcmi artıb. İstehlak kreditlərinin həcminin artması problemli kreditlərin həcminin artmasına səbəb olur.
“İnsanlar çox zaman istehlak kreditləri vasitəsilə gündəlik yaşamlarını təmin etməyə çalışırlar”
Məsələ ilə bağlı fikir bildirən iqtisadçı-ekspert Natiq Cəfərli qeyd etdi ki, istehlak kreditlərinin həcminin artması gələcəkdə bankları çətin vəziyyətə sala bilər: “Məlumdur ki, problemli kreditlərin ümumi həcmində istehlak kreditlərinin payı həmişə çox olub. Hətta rəsmi müşavirələrdə də dəfələrlə bununla bağlı açıqlamalar olub. Problem ondadır ki, banklar kreditləşdirmə yolu ilə fəaliyyət göstərərək pul qazanmaq istəyirlər. Kreditləşdirmədə banklar üçün ən sərfəli olan istehlak kreditləridir. Çünki bu kreditlər yüksək faizli, qısamüddətli olur. Beləliklə də banklar daha çox gəlir əldə edirlər.
Mərkəzi Bankın statistikasına nəzərə salsaq, görərik ki, istehsala və kommersiya müəssisələrinə verilən kreditlər də azalıb. Bu da onu göstərir ki, ölkədə iqtisadi aktivliyə maraq yoxdur. Yəni iqtisadi canlanma yoxdur. İnsanlar çox zaman istehlak kreditləri vasitəsilə gündəlik yaşamlarını təmin etməyə çalışırlar. Təbii ki, bu da gələcəkdə problemli kreditlərin artmasına səbəb ola bilər”.
Günel CƏLİLOVA
