Koronavirusla bağlı yaranmış böhran davam etdikcə, dövlətdən və hökumətdən əhalinin sağlamlığı qayğısına qalmaq, maliyyə və iqtisadi sarıdan daxili nizam-intizamın pozulması və baş verə biləcək xaos, ciddi tənəzzüldən sığortalamaq tədbirləri davam edir. Ölkə iqtisadiyyatının bir sıra istiqamətləri üzrə hazırlanan dəstək, bərpa mexanizmi zamanla uzadıldı.
Pandemiya ilə bağlı olaraq əhaliyə göstərilən dəstəklərdən biri də problemli kreditlərlə bağlıdır. Belə ki, Mərkəzi Bank banklara tövsiyə etmişdi ki, pandemiya dönəmində kredit ödənişində problem yaşayan vətəndaşların problemli kreditləri üçün əlavə cərimə hesablanmasın. Bu qayda 2020-ci ilin sonuna qədər davam etdi. Ancaq cari ilin ilk günlərindən etibarən banklar problemli kredit müştəriləri ilə əlaqə saxlayaraq qısa müddətdə kredit ödənişini həyata keçirmələrini tələb edirlər. Ancaq banklar unudurlar ki, ölkədə pandemiya və karantin rejimi hələ davam edir. Bu səbəbdən vətəndaşları narahat etmək düzgün deyil.
“Artıq heç bir güzəşt yoxdur və kreditlər ödənilməlidir, əks halda, cərimələr hesablanacaq”
Bank məsələləri üzrə ekspert Əkrəm Həsənov qeyd etdi ki, pandemiya ilə bağlı kreditlərin ödənilməsindəki çətinlikləri Mərkəzi Bank bu il tənzimləmək istəmədi: “Ötən ilin aprel və sentyabr aylarında Mərkəzi Bank banklara tövsiyə etmişdi ki, pandemiya ilə əlaqədar kreditlər üzrə gecikmə olduqda müştərinin kredit tarixçəsini korlamasınlar və cərimə hesablamasınlar. Bu tövsiyənin qüvvəsi 1 yanvar 2021-ci il tarixində bitdi. Pandemiya və hətta sərt karantin rejiminin qüvvədə olmasına baxmayaraq, bu il üçün analoji tövsiyə yenidən təkrarlanmadı. Deməli, artıq heç bir güzəşt yoxdur və kreditlər ödənilməlidir. Əks halda, cərimələr hesablanacaq, kredit tarixçələri korlanacaq, məhkəmə prosesləri başlayacaq, borc alanlara təzyiqlər artacaq. Bununla yanaşı, bankların rəsmi problemli kreditləri də artacaq və Mərkəzi Bankın kapitallaşma tələbi yenə gündəmə gələcək. Eyni zamanda, aprelin 5-də “Əmanətlərin tam sığortalanması haqqında” Qanun da qüvvədən düşəcək. Böyük ehtimalla problemli kreditlər portfeli yüksək olan bankların da aqibəti ona qədər həll olunacaq”.
Günel CƏLİLOVA
