Pakistanın əczaçılıq şirkətləri Azərbaycanda istehsal müəssisələri yaratmağı planlaşdırırlar. Bunu Azərbaycanın Pakistandakı səfiri Əli Əlizadə İslamabad Ticarət-Sənaye Palatasının nümayəndələri ilə görüşü zamanı deyib.
O bildirib ki, Azərbaycan və Pakistan əczaçılıq sənayesinin inkişafı üçün böyük potensiala malikdir: “Azərbaycan və Pakistan həmişə siyasi sahədə gözəl münasibətlərə malik olub. Amma ticari-iqtisadi əlaqələr lazımi səviyyədə olmayıb. Ona görə də ticarət münasibətlərinin inkişafına diqqət vermək lazımdır. Bu, hər iki ölkənin iqtisadiyyatı üçün səmərəli nəticələr verəcək. Dünyada koronavirusun yayılması ölkələrimiz arasında ticarət fəallığının azalmasına səbəb oldu, amma pandemiyadan sonra ikitərəfli ticarətin artacağı gözlənir”.
Qeyd edək ki, Azərbaycanda satılan dərmanların çoxu xaricdən gətirildiyi halda, ölkədə dərman istehsal edilməsinin iqtisadiyyata nə kimi təsiri olacaq?
Musa Quliyev: “Ölkə hər hansı dərmanı başqa ölkədən idxal etməyəcəksə...”
Millət vəkili Musa Quliyev bildirdi ki, ölkəmizdə dərman istehsalı vacib amildir: “Pandemiya dövründə isə bu məsələ daha qabarıq formada bir problem kimi özünü göstərir. Pandemiya dövründə koronavirus xəstələrinin spesfik müalicəsində istifadə edilən dərmanların satışında yaranan problemlə bağlı müraciətimiz eşidildi. Özəl sektora şərait yaratmaq lazımdır ki, hamısı rahat şəraitdə dərman alıb ölkəyə gətirsin. Rəqabət şəraitində qiymət də ucuzlaşacaq. Hər bir vətəndaş üçün belə halda dərman əlçatan olacaq. Bu dərmanların hamısını dövlət öz üzərinə götürməməlidir. Bu halda həm dövlət özü yüklənir, həm də çətinliklər yaranırdı".
Millət vəkilinin sözlərinə görə, bizim ehtiyacımız olan bütün dərmanlar ölkəmizdə istehsal olunmayacaq. Dünyada da belə təcrübə yoxdur ki, bir dövlət ancaq özü dərman istehsal etsin, heç yerdən də dərman almasın. Dərman istehsalı özü bahalı bir prosesdir. Ölkə hər hansı dərmanı başqa ölkədən idxal etməyəcəksə, bu, adətən, səmərəli olmur. Burada həm də biznes tərəfi düşünülür ki, biz həmin dərmanı başqa hansı ölkələrə sata bilərik. Bu da dərmanın qiymətindən və keyfiyyətindən asılı olan məsələdir.
Natiq Cəfərli: “Çalışmaq lazımdır ki, tək dərman yox, həm də molekulların özlərinin istehsalı ilə bağlı Azərbaycanda müəyyən işlər görülsün”
İqtisadçı-ekspert Natiq Cəfərli qeyd etdi ki, əvvəllər də ölkəmizdə belə layihələr var idi. Rusiya, İranla birgə belə layihə olub: “Pakistanda isə tək Pakistan şirkətləri deyil, Pakistanın daha çox Britaniya şirkətləri ilə birgə müəssisələri var. Əgər həmin Britaniya müəssisələri ilə birgə yaradılan şirkətlərin Azərbaycana da dəvət olunması mümkün olsa, bu daha keyfiyyətli, bazara və müasir texnologiyalara uyğun dərmanların istehsalına şərait yarada bilər".
Ekspert onu da vurğuladı ki, dərman istehsalından daha çox molekulların özlərinin istehsalına nail olmaq lazımdır: "Burada ciddi problemlər var. Rusiyanın özündə belə molekullar kənardan alınır və dərman istehsal olunur. Ona görə də çalışmaq lazımdır ki, tək dərman yox, həm də molekulların özlərinin istehsalı ilə bağlı Azərbaycanda müəyyən işlər görülsün. Çünki bu həm laboratoriyaların yaranmasına, həm elmi araşdırmaların artmasına, həm də mütəxəssislərin yetişdirilməsinə kömək ola bilər. Ümumiyyətlə, xarici şirkətlərlə birgə müəssisələrin yaradılması müsbət haldır".
Günel CƏLİLOVA
