Azad rayonlarda bərpa işləri Azərbaycanın tikinti sektorunu bir neçə dəfə böyüdəcək

Elnur Fərzəliyev: “İşğaldan azad edilmiş ərazilərdə tikinti işləri mərhələli şəkildə aparılacaq”

img

Ali Baş Komandan İlham Əliyevin rəhbərliyilə Azərbaycan Respublikasının müzəffər ordusu tərəfindən qısa zaman ərzində işğal altında olan tarixi torpaqlarımızın düşmən əsarətindən geri qaytarılması bu ərazilərdə bərpa prosesinin başlanmasına zəmin yaratdı.

 

Əzəli torpaqlarımızda tariximizi, mədəniyyətimizi və iqtisadiyyatımızı yenidən canlandırmaq və bərpa etmək üçün bu ərazilərə mərhələli şəkildə, sektorlar üzrə investisiya qoyuluşları və digər sərmayələrin cəlb edilməsi hazırda ən aktual məsələlərdəndir. Beynəlxalq təcrübə onu göstərir ki, ilkin olaraq dəymiş zərəri müəyyənləşdirdikdən sonra təhlükəsiz və rahat yaşayış səviyyəsinin təminatı prioritetdir.

İşğaldan azad olunmuş ərazilərə böyük qayıdışın təmin edilməsi üçün şəhər və kəndlərin bərpası və yenidən qurulması, həmin ərazilərdə müasir infrastrukturların yaradılması (elektrik enerjisi, təbii qaz, su, rabitə, yol, təhsil, səhiyyə, mədəniyyət, mənzil-kommunal və digər zəruri infrastrukturların və mədəni-tarixi abidələrin bərpası və yenidən qurulması, yaşayış evlərinin tikintisi və sair) qarşıya qoyulan əsas hədəflərdən biridir. Bunun üçün 2021-ci ilin dövlət büdcəsindən müdafiə və təhlükəsizlik tədbirlərinin həyata keçirilməsi üçün cari ilin dövlət büdcəsindən 4,6 milyard, işğaldan azad olunmuş ərazilərin yenidən qurulması və bərpası üçün isə dövlət büdcəsindən 2.2 milyard manat vəsaitin ayrılması nəzərdə tutulur.

Onu da qeyd edək ki, İqtisadi İslahatlar Elmi-Tədqiqaq İnstitutunun direktoru vəzifələrini icra edən Arzu Hüseynova media nümayəndələrinə açıqlamasında bildirib  ki, ölkənin böyük hissəsində bu il iri tikinti işləri gözlənir: “Məcburi köçkünlərin öz torpaqlarına qayıtma prosesi tikinti sahəsində böyük həcmdə işlərin aparılmasını nəzərdə tutur. Ölkədə kifayət qədər tikinti şirkəti var ki, onları ərazilərin minalardan təmizlənməsindən sonra işlərə cəlb etmək olar”.

  • ...digər ölkələrdən tikinti şirkətləri cəlb etmək mümkündür"

Tikinti-əmlak məsələləri üzrə ekspert Elnur Fərzəliyevin sözlərinə görə, işğaldan azad edilmiş kənd və qəsəbələrdə çoxmərtəbli binaların sayı çox olmayacaq. Belə ki, həmin ərazilərdə 1-2 mərtəbəli kənd tipli evlər tikiləcək: “Azərbaycanda fəaliyyət göstərən tikinti şirkətləri həddən artıq çoxdur. Azərbaycan şirkətləri Rusiyada, Orta Asiyada, Qazaxıstanda, Ukraynada binalar tikirdilər. Yəni kifayət qədər tikinti şirkətimiz var. Ancaq nəzərə almalıyıq ki, indi işğaldan azad edilmiş ərazilərdə tikinti işləri aparıla bilməz. Həmin ərazilər minalardan təmizlənməlidir. Buna görə də işğaldan azad edilmiş ərazilərdə tikinti işləri mərhələli şəkildə aparılacaq”.

E.Fərzəliyev onu da əlavə etdi ki, tikinti şirkətləri podratçı rolunu oynayacaq. Yəni şirkətlər dövlətin maliyyəsi əsasında tikinti ilə məşğul olacaqlar: “Həmin ərazilərdə çaylar çoxdur. Hesab edirəm ki, orada beton zavodları tikiləcək. Yəni tikintilərin aparılması çox asan olacaq.  Ehtiyac yaranarsa, digər ölkələrdən tikinti şirkətləri cəlb etmək mümkündür".

Günel CƏLİLOVA

Son xəbərlər