Bu gün Bakıda Dünya Boks Şurasının (WBC) 55-ci konvensiyasının açılış mərasimi baş tutub. Trend-in məlumatına görə, konvensiyada 164 üzv ölkənin 500-dən çox nümayəndəsi iştirak edir.
Tədbirdə iştirak etmək üçün Bakıya məşhur ulduzlar – Evander Holifild, Kostantin Tszü, Yuri Arbaçakov, Nəsim Həmid, Erik Morales, Nino Benvenuti, Vitali Kliçko, Gennadi Qolovkin və digər idmançılar gəlib.
Konqres oktyabrın 6-dək davam edəcək.
Evander Holifild: “Boksu daha da təkmilləşdirmək lazımdır”
Azərbaycan gözəl ölkədir və buraya bir daha qayıtmaq istəyirsən. Bunu boks üzrə superağır çəkidə dördqat dünya çempionu, ikiqat mütləq dünya çempionu Evander Holifild deyib.
O, Bakıda keçirilən Dünya Boks Şurasının (WBC) 55-ci konvensiyasının işini müsbət qiymətləndirib: “Dünya Boks Şurasının insanları bir yerə toplaması vacibdir və mən inanıram ki, bu öz brendini uğurla inkişaf etdirən yeganə boks strukturudur. Boksçuları ona görə toplamaq lazımdır ki, boksu daha da təkmilləşdirmək üçün nə etmək lazım olduğunu düşünək. Digər assosiasiyalar da bu cür tədbirlər keçirsəydi, hər kəs üçün yaxşı olardı”.
Maurisio Süleyman: “Maksimum üç ildən sonra WBC versiyasında ilk azərbaycanlı çempion olacaq”
Maksimum üç ildən sonra Dünya Boks Şurasının (WBC) ilk azərbaycanlı çempionu olacaq. Bunu isə Dünya Boks Şurasının (WBC) prezidenti Maurisio Süleyman deyib.
Onun sözlərinə görə, Azərbaycanda idman inkişaf edir: “Ölkə son Olimpiya Oyunlarında 18 medal qazanıb. Bu isə onu göstərir ki, idman Azərbaycanda prioritetdir. Biz də burada idmanın inkişafına töhfəmizi vermək, peşəkar boksu gücləndirmək və Azərbaycanın WBC versiyasında dünya çempionunun olmasını istəyirik”.
Vitali Kliçko: “Azərbaycan boksunun ciddi ənənələri var”
"Öncə WBC-nin konvensiyasının Bakıda keçirilməsinə şərait yaratdığı üçün Azərbaycan prezidenti, hörmətli İlham Əliyevə təşəkkür etmək istərdim. Bilirsiniz ki, bu, olduqca əhəmiyyətli tədbirdi”. Apasport.az saytının xəbərinə görə, bu sözləri Dünya Boks Şurasının Bakıda keçirilən 55-ci Konvensiyasının iştirakçısı Vitali Kliçko deyib. 46 yaşlı sabiq boksçu jurnalistlərə açıqlamasında tədbirin ölkəmizdə keçirilməsinin əhəmiyyətindən danışıb. Ağır çəkidə WBC, WBO, WBA versiyaları üzrə 3 dəfə dünya çempionu olan Kliçko Azərbaycanda da bu səviyyədə idmançıların yetişəcəyinə inandığını söyləyib: “Konvensiyanın üzvləri dahi, əfsanəvi boksçulardı. Onların arasında vaxtilə Məhəmməd Əli, Mayk Tayson, Lennoks Luis kimi idmançılar olub. Fəxr edirəm ki, mən də bu şərəfə nail olmuşam. Bu tədbirin Bakıda keçirilməsi əladı. Bu konvensiya qeyri-adidi. Niyə? Çünki bu tədbir ancaq o ölkələrdə keçirilir ki, onların boksçuları WBC kəmərinin sahibidi. Azərbaycanda belə çempionlar yoxdu. Lakin əminəm ki, bu cür inkişaf etmiş infrastrukturla Azərbaycanın WBC versiyası üzrə çempionu olacaq. Dünyanın ən məşhur promouterləri Bakıdadı. Onlar Bakı ilə yaxından tanış olurlar. Bu cür tədbirlərin paytaxtınızda keçirilməsi Azərbaycanda peşəkar boksun inkişafına ciddi təkan verəcək. Bilirəm ki, Azərbaycan boksçularının ciddi nailiyyətləri var. İnanıram ki, peşəkar boksda da bu cür uğurlar əldə olunacaq”. Ən bəyəndiyi Azərbaycan boksçusuna gəlincə, Vitali Kliçko bildirib ki, Məhəmmədrəsul Məcidov olduqca perspektivli idmançıdı: “Bir neçə il öncə mənim qardaşım Vladimir britaniyalı Entoni Coşuaya məğlub olub. Lakin Coşua nüfuzlu turnirlərdən birində azərbaycanlı boksçuya (Məhəmmədrəsul Məcidova - red.) finalda uduzdu və gümüş medalla kifayətlənməli oldu. Bu, onu göstərir ki, Azərbaycan boksunun ciddi ənənələri var və onları inkişaf etdirmək lazımdı. İdman dünyanı dəyişə biləcək qüvvələrdən biridi. Bu, əfsanəvi Nelson Mandelanın fikirləridi".
