Bu il fevralın 27-də Prezident İlham Əliyevin 343 nəfərin Azərbaycan Respublikasının vətəndaşlığına qəbul və bərpa edilməsi haqqında imzaladığı sərəncamların icrası olaraq, Dövlət Miqrasiya Xidmətində (DMX) həmin şəxslərin təntənəli andiçmə mərasimi keçirilib. Dövlət Miqrasiya Xidmətinin rəisi, III dərəcəli dövlət miqrasiya xidməti müşaviri Vüsal Hüseynov tədbir iştirakçılarını əlamətdar gün və qarşıdan gələn Novruz bayramı, xanımları Beynəlxalq Qadınlar Günü münasibətilə təbrik edib. Bildirib ki, müasir müstəqil Azərbaycanın tamhüquqlu vətəndaşı olmaq qürurvericidir. Prezident İlham Əliyev ölkə həyatının bütün sahələrini əhatə edən dinamik inkişafa, hər bir Azərbaycan ailəsinin rifahının yaxşılaşdırılmasına və təhlükəsizliyinin təmin edilməsinə, milli birliyin və həmrəyliyin möhkəmləndirilməsinə, ölkəmizin maraqlarına cavab verən tarazlaşdırılmış xarici siyasətin yürüdülməsinə uğurla nail olub. Sonra vətəndaşlığa qəbul və bərpa edilmiş 343 nəfər təntənəli şəkildə Azərbaycanın dövlət bayrağı önündə Konstitusiyaya əl basaraq, dövlət dilində ölkəmizə sadiq olacağına and içib.
Göründüyü kimi, Azərbaycan vətəndaşı olmaq istəyənlərin sayında kəskin artım müşahidə edilir. Bunun səbəbini hansı amillərlə izah etmək olar?
Milli Qeyri Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, bunun bir sıra obyektiv səbəbləri var:“Xidmət rəisi bildirib ki, ölkədə həyata keçirilən siyasətin nəticəsində Azərbaycanda yaşamaq, işləmək, təhsil almaq, xüsusilə Azərbaycan Respublikasının vətəndaşı olmaq istəyənlərin sayı ildən-ilə artır. Aparılan uğurlu siyasət vaxtilə respublikanı tərk edib, digər dövlətlərə getmiş Azərbaycan vətəndaşlarının da geri qayıtması tendensiyasına müsbət təsir edib. Azərbaycan Prezidentinin müvafiq sərəncamları ilə bundan əvvəlki illərdə də Azərbaycan Respublikasının vətəndaşlığına qəbul edilənlər olub. Onların indiyə qədər olan sayı on minlərlə ölçülür. Ən maraqlısı isə budur ki, bu kateqoriya adamların içərisində heç də hamısı həyat şəraiti aşağı sayılan ölkələrin vətəndaşları olmur. Azərbaycanı onlar üçün vətən olmağa cəlb edən səbəblərin ən başlıcası burada stabilliyin, təhlükəsizliyin yüksək səviyyədə olmasıdır. Bundan əlavə, Tanrı ölkəmizə bütün gözəllikləri bəxş edib. Gözəl təbiət, dəniz, meşə, nə desəniz burada var. Bizimlə qonşu ölkə olan Ermənistanda isə əks tendensiyanın şahidi oluruq. Ora nəinki vətəndaşlıq üçün müraciət edirlər, əksinə, öz vətəndaşları kütləvi şəkildə oranı tərk edir. Bizim bu uğurumuzun təməlində duran səbəblərdən biri də ölkənin uzun illər ərzində düzgün idarə olunmasıdır. Ümidvaram ki, get-gedə bizim vətəndaşımız olmaq istəyənlərin sayı daha da artacaq”.
Məhəmmədəli QƏRİBLİ
