Son günlər Ermənistan silahlı qüvvələri Azərbaycanla olan dövlət sərhədində ordumuzun bir neçə əsgərini şəhid edib. Martın 5-də axşam Ermənistan ordusunun mövqelərindən açılan snayper atəşi nəticəsində şəhid olan sərhədçimiz, 1996-cı il təvəllüdlü Paşazadə Orxan Nazim oğlu doğulduğu Cəlilabad rayonunun Cəfərxanlı kəndində dəfn edilib. Dövlət Sərhəd Xidmətinin yaydığı məlumatda deyilirdi ki, saat 19:10 radələrində Ermənistan silahlı qüvvələrinin bölmələri tərəfindən Azərbaycan-Ermənistan dövlət sərhədindəki təmas xəttində atəşkəs rejimi kobud surətdə pozulub. Düşmən snayperi tərəfindən açılan atəş nəticəsində Qazax rayonunun Quşçu Ayrım kəndi yaxınlığındakı sərhəd döyüş məntəqəsində xidmətdə olan sərhədçi əsgər Paşazadə Orxan Nazim oğlu yaralanıb. Əsgər dərhal Qazax rayonunun Diaqnostika Mərkəzinə təxliyə edilsə də, həyatını xilas etmək mümkün olmayıb.
Bu, Azərbaycanın sərhəd qoşunlarının Qazax istiqamətində son bir neçə gün ərzində verdiyi ikinci itkidir. Xəbər verildiyi kimi, fevralın 24-də Ermənistan ordusunun diversiya qrupunun həmləsini dəf edərkən sərhədçimiz İbrahim Vəliyev şəhid olmuşdu. Həmin vaxt düşmən xüsusi təyinatlıları sursat və ləvazimatlarını atıb qaçmışdı. Ermənistan ordusu Azərbaycanla dövlət sərhədi boyu, xüsusən də Qazax-Ağstafa istiqamətində son zamanlar vəziyyəti gərginləşdirməkdədir və belə görünür ki, getdikcə azğınlaşır. 2020-ci ilin 7 mart tarixində saat 05:40 radələrində “Qazax” əlahiddə sərhəd diviziyasının Qazax rayonunun Daş Salahlı kəndi yaxınlığındakı sərhəd döyüş məntəqəsində xidməti vəzifələrinin icrası zamanı əsgər Qarayev Eltun Elman oğlu odlu silahdan açılmış atəş nəticəsində yaralanmış, dərhal Qazax rayonunun Diaqnostika Mərkəzinə təxliyə edilsə də, həyatını xilas etmək mümkün olmayıb. Dövlət Sərhəd Xidmətinin rəisi, general-polkovnik Elçin Quliyev və DSX-nin digər rəhbər vəzifəli şəxsləri hadisə yerinə yollanıb.
Göründüyü kimi, son bir neçə gün ərzində məhz Ermənistan-Azərbaycan sərhədində bir neçə əsgərimiz şəhid edilib. Ermənistanın Dağlıq Qarabağda yox, məhz dövlət sərhədində vəziyyəti gərinləşdirmək addımları nədən və hansı gələcək niyyətdən xəbər verə bilər? Hərbi ekspert Daşdəmir Əliyev “Bakı-Xəbər”ə açıqlamasında bildirdi ki, düşmənin bu addımları onun azğınlaşmasından xəbər verir: ”Ermənistanın atdığı bu addımların həm də başqa səbəbləri var. Münaqişənin tarixini araşdırsanız görərsiniz ki, onlar adəti üzrə mart və aprel aylarında fəallaşırlar. Həm Novruz Bayarmında qanqaraçılığı salmaq istəyirlər, həm də aprel ayında özlərinin qeyd etdikləri saxta “soyqırımın” qisasını güya almağa çalışırlar. Bu addımları əvvəl işğal altında saxladıqları Dağlıq Qarabağ və ətraf rayonlarda atırdılar. İndi isə gərginliyi məqəsədli şəkildə dövlətlər arasında olan sərhədə keçiriblər. Son günlər Qazax istiqamətində baş verənlər bunun bariz nümunəsidir. Bununla diqqəti Dağlıq Qarabağdan yayındırmağa çalışırlar. Çünki ora ilə bağlı deməyə sözləri qalmayıb, bütün diplomatik və beynəlxalq hüquqa aid olan müstəvilərdə uduzublar. Dövlət sərhədində vəziyyəti gərginləşdirməklə Azərbaycanı Ermənistana hücum etməkdə maraqlı olan tərəf kimi qələmə verməyə çalışırlar. Həm də prosesə KTMT-ni cəlb etmək istəyirlər. Ermənistanın üzv olduğu həmin təşkilat dəfələrlə bəyan edib ki, onlar Dağlıq Qarabağ münaqişəsinə qarışmır. Qurumun əsasnaməsində belə bir müddəa var ki, üzv ölkələrə kənardan basqı olarsa, qurum kömək edə bilər. Ermənistan bu təxribata həm də KTMT-nin diqqətini cəlb etmək üçün əl atır. Alınan deyil. Çünki Azərbaycan heç bir ölkəyə ərazi iddiası irəli sürmür. İşğal altında olan torpaqlarının qaytarılmasını tələb edir. Bu o demək deyil ki, dövlət sərhədimizdə olan hansısa təxribat cavabsız qalacaq. Azərbaycan Ordusu belə təxribatların qarşısını almağa qadir gücə malikdir. Ermənistanın Qazax istiqamətində də layiqli cavabı verilib”.
Məhəmmədəli QƏRİBLİ
