“Hesab edirəm ki, Azərbaycanda infeksiya geniş yayılarsa, ÜST Azərbaycana kifayət qədər həm texniki, həm mütəxəssis, həm də digər baxımdan yardımlar edəcək”
Çin virusunun ölkəmizdə yayılmasının qarşısının alınması üçün Azərbaycan hökuməti kifayət qədər önləyici tədbirlər həyata keçirib və keçirməkdə də davam edir.
Məlum olduğu kimi, artıq Azərbaycan Respublikası Nazirlər Kabineti yanında operativ qərargah yaradılıb, eyni zamanda sərhədlərdə səyyar xəstəxanalar fəaliyyət göstərir, bir qisminin də fəaliyyət göstərəcəyi qeyd edilir. Bu gün Azərbaycan dövləti, höküməti, səhiyyəsi ciddi antivirus tədbirləri həyata keçirir. Məlum olduğu kimi, Azərbaycan Respublikası Nazirlər Kabinetinin yanında operativ qərargah Azərbaycanda yeni koronavirus (COVİD – 19) infeksiyasına yoluxma faktının qeydə alındığını təsdiq edir.
TƏBİB-in şöbə müdiri Yaqut Qarayeva bildirib ki, bu gün Azərbaycanda 224 nəfər koronavirus şübhəsi ilə karantin şəraitində saxlanır.
O bildirib ki, onlardan 12-si İran, biri İtaliya, 7-si isə digər ölkə vətəndaşlarıdır:"Hazırda onların müayinə cavabları gözlənilir".
Qeyd edək ki, artıq Ümumdünya Səhiyyə Təşkilatı da Azərbaycan dövlətinin həyata keçirdiyi antivurus tədbirlərinə müsbət münasibət bildirib. Ümumdünya Səhiyyə Təşkilatı (ÜST) Azərbaycanda koronavirusa (COVID-19) ilk yoluxma halının qeydə alındığını təsdiqləyir. Bu barədə ÜST-nin Azərbaycan nümayəndəliyinin yaydığı məlumatda qeyd edilib. Bildirilib ki, ÜST yeni koronavirus epidemiyasına qarşı cavab tədbirləri ilə bağlı yerli səhiyyə qurumları ilə sıx əməkdaşlıq edir. “Yeni koronavirus epidemiyasına dair məlumatları ÜST-nin rəsmi internet səhifəsindən və sosial şəbəkələrdəki səhifələrindən, o cümlədən Azərbaycandakı rəsmi qurumlardan əldə etməyinizi və təşvişə qapılmamağınızı tövsiyə edirik” – məlumatda vurğulanıb.
Dövlətin həyata keçirdiyi antivurus tədbirləri əhalini nə qədər əmin edir ki, ölkəmizdə bu məsələ tam olaraq nəzarətə götürülüb?
Ekspertlər qeyd edir ki, Azərbaycanda koronavirus təhlükəsi tamamilə nəzarətə götürülüb və bu sahədə görülən qabaqalayıcı tədbirlər, yaradılan operativ qərargah, eyni zamanda səyyar xəstəxanalar, onların bütün vasitələrlə təmin edilməsi insanlarda bir əminlik yaradıb ki, dövlətin gördüyü tədbirlər effekt verir.
Tanınmış mütəxəssis, professor Adil Qeybulla baki-xeber.com-a bildirdi ki, bu istiqamətdə dövlətin həyata keçirdiyi antivirus tədbirləri və onun ÜST tərəfindən də dəstəklənməsi müsbətdir:”Əlbəttə, əslində bizim üçün əsas problemli ay mart ayıdır və mart ayı bir az təlatümlü aydır. İstilər düşdükdən sonra viruslar çəkilib getməlidir. Faktiki olaraq, çöldə onun yoluxma şansları aşağı düşdükcə kontakt və yeni yoluxanların sayı azalır”.
ÜST-lə Azərbaycan arasındakı əməkdaşlıqdan da danışan A.Qeybulla vurğuladı ki, bu qurumun əməkdaşları da bu vəziyyətdə Azərbaycanı diqqətdə saxlayırlar. “Azərbaycanla Ümimdünya Səhiyyə Təşkilatı arasında əməkdaşlıqlar mövcuddur və ÜST-ün əməkdaşları bura gəlirlər. Koronavirus İranda yayıldıqdan sonra onların səfərləri xüsusən intensivləşib. H5N1 virusu, “Quş qripi” dünyada yayıldığı dövrdə analoji tədbirlər görüldü. Böyük Britaniyanın laboratoriyaları, mütəxəssisləri bu məsələnin lokallaşdırılmasında ciddi rol oynadılar. Bu baxımdan da, Azərbaycan kimi ölkələrə ÜST həmişə nəzarət edir. Burada ən əsas məsələ odur ki, tibbi sanitar qaydaların şamil olunduğu və xüsusi təhlükəli infeksiyalar ÜST-ün işidir, predmetidir, bu ayrıca bir ölkənin işi deyil. Hesab edirəm ki, Azərbaycanda infeksiya geniş yayılarsa, ÜST Azərbaycana kifayət qədər həm texniki, həm mütəxəssis, həm də digər baxımdan yardımlar edəcək. Amma ayrıca, ölkələrin aidiyyəti qurumları da karantin tədbirlərini görməlidir. Ölkəmizdə virusun lokallaşdırılması istiqamətində işlər görülür və ÜST də bu məsələyə ciddi nəzarət edir, vəziyyət ciddiləşərsə, bu qurum lazımi dəstəyi verəcək", deyə A.Qeybulla qeyd etdi.
İradə SARIYEVA
