Suriyanın İdlib şəhərindədə türk hərbçilərinin dislokasiya yerləri haqda Rusiya əvvəlcədən məlumatlandırılıb.
Baki-xeber.com-un xəbərinə görə, bu barədə Türkiyənin müdafiə naziri bildirib. Nazir deyib ki, zərbə zamanı Türkiyə mövqelərinin yaxınlığında Suriya müxalifətinin heç bir silahlı dəstəsi olmayıb.
Ankara zərbəyə görə məsuliyyəti Suriya prezidenti Bəşər Əsədin qoşunları üzərinə qoyur. Türkiyə öz hərbçilərinin həlak olmasına cavab olaraq Suriyada Əsəd qüvvələrinə zərbələr endirib. İddia edilir ki, onlara böyük itkilər verilib.
Rusiya Müdafiə Nazirliyi isə daha əvvəl Türkiyənin hərbi qulluqçularının yeri barədə məlumat vermədiyini iddia edib. Eyni zamanda, Müdafiə Nazirliyində vurğulayıblar ki, Rusiyanın bu rayonda hava-kosmik qüvvələri tətbiq olunmayıb.
Rusiyanın xarici işlər naziri Sergey Lavrov cümə günü Moskvada keçirilən mətbuat konfransında türk hərbçilərinin həlak olması ilə əlaqədar başsağlığı verib. O bildirib ki, Moskva əvvəlkitək Türkiyə ilə İdlib haqda razılaşmaya, xüsusilə Suriyanın bu regionunda atəşkəsə sadiqdir. Lakin Lavrovun sözlərinə görə, Rusiya Əsəd qoşunlarına terrorçularla mübarizə aparmağa mane ola bilməz.
Lavrov bəyan edib ki, Rusiya və Türkiyə prezidentləri vəziyyəti telefonla müzakirə ediblər. Söhbət haqqında Kremlin məlumatında deyilir ki, Vladimir Putin və Rəcəb Tayyib Ərdoğan yaxın vaxtlarda şəxsən görüşə bilərlər. Ankarada Lavrovun sözləri hələlik şərh olunmayıb.
Türkiyə hərbçilərinin həlak olması barədə xəbərdən sonra İstanbuldakı Rusiya konsulluğu qarşısında etiraz nümayişi keçirilib.
Türkiyə KİV-i ölkə rəhbərliyinin hazırda Qərblə məsləhətləşmələr apardığı haqqında məlumat verir. Ankaranın sorğusuna əsasən, NATO üzvü olan ölkələrin səfirləri fevralın 28-də Brüsseldə Suriyadakı vəziyyətlə bağlı məsləhətləşmələr aparır. Hakim AKP nümayəndəsi Türkiyənin suriyalı qaçqınların Avropaya hərəkətinə mane ola bilməyəcəyini bəyan edib. Türkiyə XİN-in nümayəndəsi də bildirib ki, İdlibdə vəziyyət pisləşməkdə davam edərsə, Türkiyədəki bir çox qaçqın Qərbə doğru hərəkət edə bilər. Agentlik cümə günü artıq Yunanıstan sərhədinə doğru hərəkət edən qaçqın qrupları barədə məlumat verib.
Yunanıstan hakimiyyəti isə bəyan edib ki, sərhədlərdə, eləcə də qaçqın düşərgələrində, o cümlədən koronavirus infeksiyasının yayılmasına yol verməmək üçün, nəzarəti gücləndirəcək.
Xatırladaq ki, Suriyada münaqişə 9 il əvvəl Əsəd rejiminə qarşı kütləvi etirazlarla başlayıb. O zaman etirazlar güclə yatırıldı və üsyan baş verdi. Ölkə onlarla qruplaşmanın nəzarət etdiyi rayonlara parçalandı. Əsəd rejimi yıxılmağa yaxın idi, lakin Rusiya onun köməyinə gəldi və tədricən Əsəd ölkənin əksər hissəsinə nəzarəti geri qaytardı. Müharibə dövründə Suriyanı milyonlarla insan tərk etdi ki, onların əksəriyyəti Türkiyədəki qaçqın düşərgələrində yaşayır, lakin bir çoxu hələ də Avropaya getməyə çalışır. Türkiyənin sərhədləri açması bu üzdən Avropanın “qorxulu yuxusunun çin olmasına” xidmət edə bilər.
Baki-xeber.com
