Ankara Bəşər Əsəd və onun tərəfdarlarını Suriyada Türk əsgərlərinin ölümünə görə çox böyük qarşılıq ödəməyə məcbur edəcək.
Baki-xeber.com-un xəbərinə görə, bu sözləri Türkiyənin vitse-prezidenti Fuad Oktay yanvarın 27-də Əsəd rejiminin İdlibdə deeskalasiya zonasına aviahücumunu şərh edərkən deyib.
Vitse-prezident həlak olan 33 hərbçinin ailəsinə başsağlığı diləyib.
Xatırladaq ki, fevralın 27-də Rus savaş təyyarələri Suriyanın İdlib şəhərinə hava hücumu edib. “Reuters”-in xəbərinə görə, Suriya İnsan Haqları Mərkəzinin yetkililəri Rus savaş qırıcılarının 22 gün aradan sonra Suriyanın İdlib şəhərinə hava hücumu düzənlədiyini xəbər verib. Muxaliflərin açıqlamasına görə, Hmeymim hərbi bazasından qalxan 3 Rus qırıcı təyyarəsi ard-arda 20 hücum həyata keçirib. Hücumlarda İdlib'in qərbindəki Cisir eş Suğur, Bisenkul, Gani, İnneb, Sırmaniyyə, Hamanın şimalındakı Zeyzun bölgələrində dinc yaşayış məntəqələri və müxaliflərin cəbhə xəttinin vurulduğu bildirilir.
Bu arada Suriya ordusunun da İdlibi vurmağa başladığı xəbər verilib. Əsəd rejiminə bağlı Suriya ordusunun isə İdlibi zaman-zaman top atəşlərilə hədəf aldığı deyilir.
Xəbərdə o da bildirilir ki, Suriya ərazisində bəlli hədəfləri vuran Rus qırıcılarının səsi Türkiyənin Hatay bölgəsinin Reyhanlı və Yayladağı rayonlarına bağlı kəndlərdə də eşidilib.
Rusiyanın RBK kanalının xəbərinə görə isə, fevralın 27-də Suriyanın İdlib əyalətində yaraqlılar genişmiqyaslı hücuma cəhd göstərib. Rusiya Müdafiə Nazirliyinin “Yaraqlılar arasında türk hərbçiləri var idi”, deyilən açıqlamasında bildirilir ki, guya bir qrup türk hərbçisi Behun yaşayış məntəqəsində Suriya ordusunu atəşə tutub. "Bununla yanaşı, Türkiyə tərəfinin Koordinasiya Mərkəzinə verdiyi məlumata görə, Behun yaşayış məntəqəsi yaxınlığındakı Türkiyə Silahlı Qüvvələrinin heç bir bölməsi olmayıb və olmayacaq", - Rusiya tərəfinin məlumatında deyilir.
Məlumatda Rusiya HHQ-nin Behun yaşayış məntəqəsinə zərbələr endirmədiyi xüsusi qeyd olunur.
BBS News-un xəbərinə görə, Ankara Suriya müxalifətinə hərbi dəstək verir, Rusiya isə hökumət qüvvələrini fəal şəkildə dəstəkləyir. Suriyada Rusiyanın hərbi kontingenti yerləşir, Rusiya HHQ təyyarələri hərbi uçuşlar həyata keçirir, Suriya aviasiyasına yardım edir.
Beləliklə, Suriyada dünyanın istəmədiyi bir mənzərə yaranıb: Türkiyə və Rusiya qarşı-qarşıya gəlib...
Qeyd edək ki, İdlib Suriyanın müxalifətin nəzarəti altında qalan yeganə regionudur. Burada Suriyanın digər regionlarından olan, Dəməşq rejiminin hakimiyyəti altında yaşamaq istəməyən 3,5 mlnə yaxın qaçqın məskunlaşıb.
Baki-xeber.com
