Paşinyanın Berlində Rəsulzadəni faşist Njde ilə müqayisə etməsi əslində Merkelin özünə təhqirdi
“O vaxt ümumiyyətlə alman ordusunda Rəsulzadə soyadında komandir olmayıb”
Münhen Təhlükəsizlik Konfransı çərçivəsində Berlində səfərdə olan Ermənistanın baş naziri Nikol Paşinyan yenə də uğursuz müqayisələr aparıb və növbəti uydurmalarla çıxış edib. Belə ki, Paşinyan “Fridrix Ebert” fondunda Qaregin Njdenin abidəsinin qoyulması ilə bağlı Ermənistanın mövqeyini bildirib. Paşinyan qeyd edib ki, guya Ermənistanda Qaregin Njdenin xatirəsini 1918-ci il erməni-türk müharibəsi zamanı ermənilərə qarşı qırğının və erməni dövlətinin məhv edilməsinin qarşısnı alan bir qəhrəman kimi ehtiramla yad edirlər. Daha sonra o, uğursuz müqayisə apararaq qeyd edib ki, İrəvanda Njdenin abidəsi ilə yanaşı, erməni-türk müharibəsinin digər iştirakçısı Marşal Baqramyanın da abidəsi var. Onların yolları bir-birindən ayrılsa da, ermənilər onları erməni tarixindəki rollarına görə dəyərləndirirlər. Aydın görünür ki, Paşinyan ya tarixi bilmir, ya da uydurmalar ortaya atır. Çünki Baqramyan İkinci Dünya müharibəsində faşistlərə qarşı vuruşub. Ən nəhayət, Paşinyan Azərbaycanla bağlı növbəti uydurma fikirlərlə çıxış edib. Bildirib ki, guya azərbaycanlılar Njde məsələsində tez-tez möhtəkirlik etməyi sevirlər. Əslində bu konteksdə Üçüncü Reyxin nasist ordusunun Rəsulzadə soyadında komandiri olub. Hazırda Azərbaycanın paytaxtı Bakıda onun adını daşıyan küçə var. Əvvəla, o vaxt alman ordusunda Azərbaycan əsilli Rəsulzadə soyadını daşıyan komandir olmayıb. Olsaydı, bunu gizlətmək mümkün olmazdı. Paşinyan bununla Məmməd Əmin Rəsulzadəni nəzərdə tutursa, bunun özü tamamilə absurd yanaşmadır. Ona görə ki, M. Rəsulzadə alman ordusunda ümumiyyətlə hər hansı bir formada iştirak etməyib. Bu baxımdan Paşinyanın Rəsulzadəni faşist Njde ilə müqayisə etməsi əslində Merkelin özünə təhqirdi.
Sözügedən məsələ ilə bağlı fikirlərini “Bakı-Xəbər”lə bölüşən Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyevin sözlərinə görə səslənən fikirlər tamamilə uydurmadır: “Küçə inqilabı dalğasında hakimiyyətə gələn Paşinyan avantürist açıqlamalarla çıxış edir. Bu onu göstərir ki, o həm də yüngülxasiyyət adamdır. Paşinyanın yüngülxasiyyət adam olmasını Ermənistan cəmiyyəti özü də görür və bunun bəlasını çəkir. O cümlədən biz də indiyədək onun hansısa ciddi danışıqlarına rast gəlməmişik. Nəinki dövlət başçısı, adi bir məmur da o səviyyədə yalan uydurmalarla çıxış etmir. Ancaq Paşinyan bütün sərhədləri aşzaraq ağlagəlməz uydurmalarla çıxış edir. Qeyd edim ki, o vaxt ümumiyyətlə alman ordusunda Rəsulzadə soyadında komandir olmayıb. Çox güman ki, o bununla Məmməd Əmin Rəsulzadəni nəzərdə tutur. Ancaq M.Rəsulzadə alman ordusunda xidmət etməyib. O, Almaniyada mühacirətdə olub. Eyni zamanda, onun Almaniyanın dövlət rəhbərləri ilə söhbətləri də olub. Ancaq o, yüksək aristokrat səviyyədə öz ləyaqətini gözləyərək SSRİ tərkibindən türk dövlətlərinin, o cümlədən Azərbaycanın çıxarılması uğrunda mübarizə aparıb. M.Ə.Rəsulzadə heç vaxt alman ordusunda xidmət etməyib və ümumiyyətlə orduda təmsil olunmayıb. O baxımdan Paşinyanın səsləndirdiyi fikirlərin heç biri ona aid deyil. M.Ə.Rəsulzadənin həyat və fəaliyyəti kifayət qədər araşdırılıb. Ona görə də Paşinyan bunu deməklə M.Ə.Rəsulzadəni nəzərdə tutursa, bu tamamilə absurd fikirdir. Əslində ermənilər Azərbaycana yönəlik elə yalanlar uydururlar ki, artıq biz buna təəccüblənmirik. O baxımdan Paşinyanın məlum sərsəm açıqlaması da bunun tərkib hissəsidir”.
Vidadi ORDAHALLI
