Parlament seçkilərində iştirak edən bir çox namizədlər təbliğat-təşviqat apardıqları seçki dairələrinin ərazisində olan qapalı müəssisələrdə olan seçicilərə platformalarını lazımi şəkildə çatdıra bilmədiklərindən gileylənirlər. Söhbət hərbi hissələr və cəzaçəkmə müəssisələrində saxlanan əsgər və məhbusların verəcəyi səsdən gedir. Nəzərə alsaq ki, belə müəssisələrdə sayı minlərlə ölçülən seçici var, namizədlərin keçirdiyi həyəcanı təbii qəbul etmək olar. Bəs qanunvericilik bununla bağlı nə deyir? Seçki kampaniyasının təbliğat-təşviqat mərhələsində namizədlər dairə ərazisində yerləşən hərbi hissələr və cəzaçəkmə müəsissələrində təbliğat apara bilərləmi?
Seçkilər üzrə ixtisaslaşmış QHT rəhbəri, professor Məhərrəm Zülfüqarlı “Bakı-Xəbər”ə açıqlamasında bildirdi ki, bu, qanunla qadağan edilmir, ancaq bir qədər fərqlidir:“Namizədlər təbliğat-təşviqat kampaniyası boyunca seçicilərlə görüş yerlərini özləri seçir. Ancaq qapalı müəssisələr sayılan hərbi hissə və cəzaçəkmə müəssisələrində rejim başqa olduğu üçün, namizədlərin ordakı seçicilərlə görüşü bir qədər fərqli qaydada keçirilir. Namizəd bununla bağlı müraciət etməlidir və ona təbliğat üçün müvafiq vaxt ayrılmalıdır. Elə namizədlər var, gedib həmin müəssisələrin qapısını döyür ki, gəlmişəm təbliğat aparmağa. Bu düzgün deyil. Çünki həmin müəssisələrdə fəaliyyət rejim qaydaları əsasında müəyyən edilir. Bunun üçün müvafiq vaxt təyin olunmalıdır. Elə dairə var ki, ordan 20 namizəd qeydə alınıb. Bunların hər biri üçün ayrıca vaxt təyin etmək müəssisənin rejimini də pozur. Bunun üçün də çalışılır ki, müraciət edən namizədlərin görüşü bir yerdə təşkil olunsun. Cəzaçəkmə müəssisələrinə girişdə həm də namizədlərin təhlükəsizliyi təmin olunmalıdır. Yəni bir qədər sadə mexanizm olmadığı üçün, istənilən vaxt namizəd ora girib təbliğat apara bilmir. Seçki Məcəlləsində bu barədə konkret qaydalar müəyyənləşib. Qanunda deyilir ki, qeydə alınmış namizədlər, siyasi partiya, siyasi partiyaların bloku, referendum üzrə təşviqat qrupu, onların səlahiyyətli nümayəndələri və vəkil edilmiş şəxsləri hərbi hissələrin yerləşdiyi ərazinin hüdudlarında hərbi qulluqda sayılan seçicilərlə görüşlərini hərbi hissə komandirinin dairə seçki komissiyası ilə birlikdə belə görüşün keçirilməsini təyin etdiyi günə azı 3 gün qalmış müvafiq seçki dairəsi üzrə qeydə alınmış bütün namizədlərin, namizədləri qeydə alınmış bütün siyasi partiyaların, siyasi partiyalar bloklarının, referendum üzrə təşviqat qruplarının mütləq dəvət edilməsi və ya onlara xəbər verilməsi şərtilə təşkil edə bilər. Eyni qayda cəzaçəkmə müəssisələri üçün də xarakterikdir.
Məhəmmədəli QƏRİBLİ
