Fevralın 9-na təyin olunan növbədənkanar parlament seçkilərində iştirak edəcək namizədlər, demək olar ki, tam müəyyənləşib. Artıq 21 siyasi partiyanın seçkilərdə iştirak edəcəyi öz təsdiqini tapıb. Maraqlıdır ki, müxalifət və seçkidə iştirak etmək istəyən müstəqillər ciddi, cəmiyyətin bütün təbəqələri tərəfindən qəbul olunan namizədlər ortaya qoya bilməyiblər. Bunun səbəbi nə ilə bağlı ola bilər?
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildrdi ki, bunun obyektiv səbəbləri var: “Birincisi budur ki, bu illər ərzində müxailət çox zəifləyib. Əgər bunu radikal müxalifətin özü qəbul etməsə belə, onlara məsləhət görərdim 2005-ci ildəki deputatlığa namizədlərinin siyahısı ilə indiki namizədləri arasında bir paralellər aparsınlar. Özləri kəskin fərqi görəcəklər. Müxalifət özünü doğrulda bilmədiyi üçün həmin tanınmış ziyalılar, xadimlər o düşərgəni tərk etdi. Siz son parlamentdə təmsil olunmuş və yenidən təmsil olunmaq şansı olan şəxslərə baxsanız, onların arasında əski müxalifətçilərə çox rast gələrsiniz. Onlar parlamentə müxalifətdən imtina etmiş şəxslər kimi düşüblər. Cəmiyyətdə qəbul olunan başqa sahənin adamları isə müxalifətə və daha dəqiqini desək, siyasətə meyl etmirlər. Məsələn, bizdə hansısa bir tanınmış artist deputat olmaq istədiyini orataya qoyan kimi ona ciddi ictimai qınaq tuşlanır. Heç konstruktiv deyilən müxalifət belə, dediyiniz kateqoriya adamları üzə çıxara bilməyib ki, namizəd kimi irəli sürsün. Həmin konstruktivlərin başlıca məqsədi o olub ki, yalnız sədrləri səviyyəsində bir millət vəkili ilə parlamentdə təmsil olunsunlar və bunun da nəticəsində parlamentdə təmsil olunan partiya kimi dövlətdən maliyyələşə bilsinlər. Bu cür fəaliyyətlə, təbiidir ki, ciddi partiya “vitrini” düzəltmək mümkün deyil. Mən də müşahidə edirəm ki, hakim partiyadan kənar namizədlər arasında çox da ciddi fiqurların seçkiyə qatıldığı müşahidə edilmir. Elə partiya sədrləri var ki, bundan əvvəl də parlament seçkilərində iştirak edib və uduzublar. Sonra bəyan ediblər ki, seçki saxtalaşdırılıb. Öz sədrlərini qorumağa belə gücləri çatmayıbsa, bu onların reytinqinə çox mənfi təsir edib. Təəssüf ki, həmin şəxslərdən bəziləri yenidən namizəd olub. Etiraf edək ki, onlar əvvəlki çəkidə deyillər”.
Məhəmmədəli QƏRBLİ
