“Hesab edirəm ki, bütün bunlardan sonra radikallara yönəlik bir ictimai qınaq olmalıdır”
Məlum olduğu kimi, tanınmış hüquq müdafiəçisi Oqtay Gülalıyev oktyabrın 29-da taksi fəaliyyəti ilə məşğul olan sürücü Kənan Abdullayevin idarə etdiyi “Hyundai Accent” markalı avtomobillə yolu keçən zaman vurulub. O.Gülalıyev qəzadan sonra onu vuran sürücü tərəfindən xəstəxanaya çatdırılıb. Sonra ailəsinin təkidilə oradan “City Hospital” xəstəxanasına aparılaraq əməliyyat olunub. Komada olduğu üçün, ailəsinin istəyilə, Heydər Əliyev Fondunun yardımı əsasında müalicəsinin Türkiyədə davam etdirilməsinə qərar verilib. Heydər Əliyev Fondu hüquq müdafiəçisinin müalicəsini öz üzərinə götürüb. Heydər Əliyev Fondunun prezidenti, Birinci vitse-prezident Mehriban Əliyevanın tapşırığı ilə fond O.Gülalıyevin müalicəsi ilə bağlı məsələlərlə məşğul olur. Artıq hüquq müdafiəçisi O.Gülalıyevin səhhətində müsbətə doğru dəyişiklik var. Hüquq müdafiəçisinin xanımı Firuzə Gülalıyeva bildirib ki, bir həftədən çoxdur onun hərarəti yüksəlmir, böyrəklərində kreatinin səviyyəsi azalıb və daha rahat nəfəs alır:“Oqtay artıq sağ gözünü açır. Həkimlərin sözlərinə görə, komadan ayılma ehtimalı artır, amma buna hələ zaman lazımdır”. Ancaq o da məlumdur ki, bəlli qəzadan sonra radikal mövqedən çıxış edən qüvvələr O.Gülalıyev ətrafında müxtəlif spekulyasiyalar yaratmağa çalışdılar. Həqiqətə uyğun olmayan fikirlər səsləndirdilər. Əvvəl bəyan etdilər ki, sözügedən qəza qəsdən törədilib. Onların bu yalan informasiyası müxtəlif tutarlı faktlarla təkzib edildi. Sonra belə bir uydurma ilə çıxş etdilər ki, guya O. Gülalıyev izlənib. Bu gün Daxili İşlər Nazirliyi və Baş Prokurorluğun yaydığı birgə məlumatda deyilənlərin yalan olduğu üzə çıxdı. Sözügedən rəsmi məlumatda qeyd edilir ki, O. Gülalıyevin güdülməsi, izlənməsi halları müəyyən edilməyib:“Təhlükəsiz Şəhər” Xidmətinin müşahidə kameraları tərəfindən qeydə alınmış görüntülərin Daxili İşlər Nazirliyinin Mətbuat xidməti tərəfindən hadisədən dərhal sonra kütləvi informasiya vasitələrinə təqdim edilməsinə, hadisə barədə oktyabrın 30-da Bakı şəhər Baş Polis İdarəsi tərəfindən, daha sonra hadisənin təfərrüatları və istintaqın gəldiyi ilkin nəticələrə əsasən hadisənin qəsdən törədilməməsi barədə oktyabrın 31-də Daxili İşlər Nazirliyi və Baş Prokurorluğun mətbuat xidmətləri tərəfindən ictimaiyyətə ətraflı məlumatlar verilməsinə baxmayaraq, bəzi kütləvi informasiya vasitələri və sosial şəbəkə istifadəçiləri tərəfindən qərəzli olaraq hadisənin guya qəsdən törədilməsi ilə bağlı cəmiyyətdə yanlış fikrin formalaşdırılmasına xidmət edən əsassız məlumatlar yayılır. Həmin məlumatlar aparılmış istintaqla sübuta yetirilmədiyindən qəti şəkildə təkzib olunur. Belə ki, istintaq zamanı müəyyən edilib ki, O.Gülalıyev hadisə yerindən tamamilə kənarda - Xətai rayonu ərazisində yaşayır və həmin gün hadisə yerinə şəxsiyyəti istintaqa məlum olan tanışı ilə görüşmək məqsədilə gəlib, həmin marşrutdan gündəlik və ya daimi olaraq istifadə etməyib. Həmçinin müəyyən edilib ki, sürücü K.Abdullayev sentyabr ayından etibarən Nizami küçəsində fəaliyyət göstərən hazırlıq kursundan qonşusunun övladını saat 17:30-da götürmək üçün həmin istiqamətdə hər gün hərəkət edir. Bundan başqa, hadisədən əvvəl təxminən 2 saat ərzində sürücü K.Abdullayevin və O.Gülalıyevin hərəkət trayektoriyaları, hadisədən sonra sürücü K.Abdullayevin O.Gülalıyevi 1 saylı Kliniki Tibbi Mərkəzə apardığı marşrut “Təhlükəsiz Şəhər” Xidmətinin kameraları, eləcə də istifadə etdikləri telefon nömrələrinin anten dairələri vasitəsilə tam müəyyən edilib. Məlumatlardan görünür ki, onlar hadisədən əvvəl müxtəlif istiqamətlərdə hərəkətdə olub, hərəkət istiqamətləri hadisədən əvvəl heç bir halda kəsişməyib, sürücü tərəfindən O.Gülalıyevin güdülməsi, izlənməsi halları müəyyən edilməyib”. Göründüyü kimi, radikalların O. Gülalıyevlə bağlı sözügedən iki informasiyasının heç biri təstiqlənmədi. Bunların hər ikisi rəsmən təkzib edildi. Bütün bunları nəzərə alsaq, radikal müxalifətin sözügedən iki yalana görə məsuliyyəti, ictimai töhmətin dərəcəsi nədən ibarətdir? Məsələyə münasibət bildirən şərqşünas Seyid Camal Əzimbəylinin sözlərinə görə, bu yalan informasiyalara görə radikal müxalifət həm hüquqi məsuliyyət daşıyır, həm də siyasi-mənəvi məsuliyyət: “Hansı prizmadan yanaşsaq, müxalifətin məsuliyyəti ortadadır. Çünki O. Gülalıyevlə bağlı yaydıqları məlumatlar öz təsdiqni tapmadı. Hesab edirəm ki, buna görə radikal müxalifət daha çox siyasi-mənəvi məsuliyyət daşıyır. Bununla nə qədər qeyri-ciddi olduqları cəmiyyətə bir daha bəlli oldu. Bu isə, öz növbəsində, onsuz da cəmiyyətdə bərbad durumda olan nüfuzlarını bir az da aşağı saldı. Ən başlıcası. bəlli oldu ki, müxalifət kiminsə başına gələn bədbəxt hadisə üzərində siyasi şou yaradır və bundan öz məqsədləri üçün istifadə etmək istəyir. Bunun rəsmi şəkildə tutarlı sübutlarla ortaya çıxması müxalifətin nə dərəcədə rəzil vəziyyətdə olduğunu göstərdi. Çünki bundan siyasi dividendlər əldə etməyə cəhd etmək riyakarlıq və insanlığa yaraşmayan hərəkətdir. Siyasi mübarizə aparmaq olar, amma bunu əxlaqa zidd əməllərlə aparmaq yolverilməzdir. Hesab edirəm ki, bütün bunlardan sonra radikallara yönəlik bir ictimai qınaq olmalıdır. Çünki radikalların hər iki “versiyası” yalan çıxdı. Belə hadisələrin siyasiləşdirilməsi Allaha da xoş getməz. Eyni zamanda bu, Azərbaycanın nə milli, nə də dini kimliyinə yaraşan əməldir”.
Vidadi ORDAHALLI
