Ağstafanın sabiq icra başçısı Nizaməddin Quliyev və onun birinci müavini olmuş Ramiz Tatarov məhkəmə qarşısına çıxarılıb. Səbail rayon Məhkəməsində həmin şəxslərlə bağlı Dövlət Təhlükəsizliyi Xidməti (DTX) tərəfindən verilmiş təqdimata baxılıb. Hakim Rəna Qafarovanın sədrliyi ilə keçirilən məhkəmənin qərarı ilə hər iki şəxs barəsində 4 ay müddətinə həbs qətimkan tədbiri seçilib.
Qeyd edək ki, DTX-nın yaydığı məlumata görə, Ağstafa Rayon İcra Hakimiyyətinin başçısı Nizaməddin Quliyevin müntəzəm olaraq vəzifə səlahiyyətlərindən sui-istifadə etməsinə dair əsaslı şübhələr yaranıb. Belə ki, Nizaməddin Quliyevin rayon icra hakimiyyəti başçısının müavini Ramiz Tatarovun vasitəsilə 2019-cu ilin may ayından etibarən yerli icra hakimiyyəti və digər yerli dövlət orqanlarının vəzifəli şəxslərindən müxtəlif adlar altında pul vəsaitləri tələb edərək almasına dair əsaslı şübhələr müəyyən edilib. Bununla yanaşı, Nizaməddin Quliyevin səhiyyə, təhsil və digər yerli dövlət təsisatları rəhbərlərindən büdcə vəsaitləri hesabına yerli dövlət orqanlarının saxlanması xərclərinə ayrılan vəsaitlərin müəyyən hissəsinin nağdlaşdırılaraq ona təqdim olunmasını tələb etməsi və alması, ictimai işlərə cəlb olunan aztəminatlı şəxslərə ayrılan əmək haqqı kartlarını ələ keçirib mənimsəməsinə əsaslı şübhələr müəyyən edilib. Nizaməddin Quliyev və müavini Ramiz Tatarovun xidməti otaqlarında keçirilən baxış zamanı müxtəlif vəzifəli şəxslərdən, sahibkarlıq fəaliyyəti ilə məşğul olan şəxslərdən alınmış vəsaitlərin öz əlyazmaları ilə tərtib olunmuş siyahıları, pul vəsaitləri, sənədlər, iş üzrə əhəmiyyət kəsb edən digər dəlillər götürülüb. Nizaməddin Quliyev və başqaları vəzifə səlahiyyətlərindən sui-istifadə etmə, külli miqdarda təkrar rüşvət alma, mənimsəmə və digər faktlara görə Dövlət Təhlükəsizliyi Xidmətində Cinayət Məcəlləsinin müvafiq maddələri ilə başlanmış cinayət işləri üzrə şübhəli şəxs qismində saxlanıblar. Qeyd edək ki, DTX tərəfindən keçirilən əməliyyatın videogörüntüləri də cəmiyyətə təqdim edilib. Mediada nümayiş edilən həmin kadrlardan görünür ki, cütlük rəhbərlik etdikləri rayonda əməlli-başlı xərrac toplayırmış. Nizaməddin Quliyev uzun müddət Goranboy rayonuna rəhbərlik edib. Yalnız bir neçə ay əvvəl onun yeri Ağstafaya dəyişdirilib. Bu həbslə bağlı cəmiyyətdə ciddi müzakirələr gedir. İnternet üzərindən aparılan araşdırmalardan görünür ki, Nizaməddin Quliyevin adı uzun müddət medianın gündəmində olub. Onun etdiyi silsilə cinayətlərlə bağlı çeşidli materiallar dərc edilib. Özü ilə yanaşı onun oğlanlarının da adları müxtəlif xoşagəlməz qalmaqallarda hallanır. Məlum olur ki, həbs edilən icra başçısı özünün əlaqələrindən istifadə edərək qohum-əqrabası və xüsusilə də oğlanlarını da “yağlı” vəzifələrə yerləşdirib. Hüquq-mühafizə orqanlarının əməkdaşları tərəfindən saxlanılan Ağstafa Rayon İcra Hakimiyyətinin başçısı Nizaməddin Quliyevin 41 yaşlı Ramin Quliyev Nərimanov Rayon Məhkəməsinin hakimidir. R.Quliyev buna qədər 2001-2007-ci illərdə Apelyasiya Məhkəməsində məhkəmə iclas katibi, 2007-2010-cu illərdə Bakının Suraxanı Rayon Məhkəməsində məsləhətçi, məhkəmə iclas katibi, 2010-2013-cü illərdə Ali Məhkəmədə məhkəmə nəzarətçisi vəzifələrində çalışıb. Onun digər oğlu isə Baş Prokurorluğun Korrupsiyaya Qarşı Mübarizə Baş İdarəsində vəzifə tutur. Ötən gün saxlanılan Nizaməddin Quliyevin mülkləri ilə də bağlı məlumatlar ortaya çıxır. Goranboy rayon sakini Youtube kanalında yayımlanan videoda icra başçısının mülklərindən danışıb. İcra başçısının fəaliyyətindən narazılıq edən şikayətçi qadın bildirib ki, Goranboy şəhərinin mərkəzində yerləşən ticarət mərkəzi, uşaq bağçası, “Gülüstan” şadlıq sarayı, heyvan kəsim məntəqəsi, köhnə şahmat məktəbi, Tapqaraqoyunlu kəndində yerləşən “Dost qapısı” və “Lalə” şadlıq sarayları, Yuxarı Ağcakənd kəndində gips karxanası Nizaməddin Quliyevə məxsusdur. Bununla yanaşı iddia olunur ki, icra başçısının regionlarda saysız-hesabsız daşınmaz əmlakı var. Həbs edilən icra başçısının adı müxtəlif vəzifəli şəxslər və iş adamlarına qarşı edilən təzyiqlərdə də hallanır. Medianın yazdığına görə, o, əvvəlcə Goranboy Mərkəzi Xəstəxanasının baş həkimi Faiq Abdullayevin intiharı ilə gündəmə gəlib. Bu hadisə 2011-ci ildə baş verib. Faiq Abdullayev həmin ilin mart ayında intihar edib. Baş həkimin xanımı Gülnarə Aslanova bu hadisədə Nizaməddin Quliyevi ittiham edib. “Onu sən öldürdün. O qədər pul onda haradan ola bilərdi? Niyə ondan bu qədər pul istədin? Mən bu işi belə qoymayacam. Prezidentə yazacam…”,- deyə Gülnarə Aslanova Nizaməddin Quliyevə xitabən bildirib. Hadisədə icra başçısının adı hallandırıldığına görə məsələyə böyük ictimai diqqət olub. Lakin Nizaməddin Quliyev məsuliyyətdən yaxa qurtara bilib. Daha sonra icra başçısının adı iş adamı Müqayis Verdiyevin həbsində hallandırılıb. Daha doğrusu, Müqayis Verdiyev ölkə rəhbərliyinə və KİV-lərə etdiyi müraciətdə onu Nizaməddin Quliyevin həbs etdirdiyini bildirib. İcra başçısının iş adamını həbs etdirməsinin kökündə ona borclu olması dayanıb. Müqayis Verdiyevin sözlərinə görə, Goranboy Rayon İcra Hakimiyyətinin sifarişi ilə rayonda abadlıq-quruculuq işləri aparıb. Lakin Nizaməddin Quliyev görülən işlərin pulunu verməkdən boyun qaçırıb. Müqayis Verdiyevin sözlərinə görə, borc 256 min manat olub. İş adamı həmçinin bildirib ki, Nizaməddin Quliyev onu həbs etdirməklə həm borcu verməkdən yaxa qurtarmağa, həm də büdcədən abadlıq işləri adı altında pul silməyə çalışır. Təbiidir ki, belə odioz fiqurun axırı elə dörd divar arası olmalıydı.
Məhəmmədəli QƏRİBLİ
