Azərbaycan həssas məqama qədəm qoyub. Ölkədə növbədənkənar parlament seçkilərinin keçirilməsilə bağlı qərar qəbul edilib. Bəllidir ki, belə proseslərin cərəyan etdiyi zamanlarda ölkədə siyasi aktivlik artır. Növbəti parlament seçkiləri və ona hazırlıq dönəmi qış fəslinə təsadüf etsə də, ictimai hərarətin yüksəkliyi nəzərə çarpır.
Müstəqillik əldə etdikdən sonra biz ölkəmiz üçün həssas olan məqamlarda daxili işlərimizə xaricdən müxtəlif formalarda müdaxilə cəhdlərini müşahidə etmişik. Hətta ölkə başçısı İlham Əliyev Bakı Dövlət Universitetinin 100 illik yubileyi münasibətilə keçirilən mərasimdə etdiyi çıxışda belə cəhdlərin olduğuna diqqəti yönəldib:“Hazırda xarici dairələr gəncləri hədəf seçiblər və onları yoldan çıxarmaq istəyirlər, onların beyinlərini zəhərləmək istəyirlər, onları xalqa qarşı qaldırmaq istəyirlər”. Prezident həmin çıxışında Qərbi 2003 və 2005-ci illərdə rəngli inqilabların təşkili planlarına görə ittiham edib:“Azərbaycan artıq o inqilabların sırasında növbəti yer kimi göstərilirdi. Belə maykalar buraxılmışdı, üzərində yazılmışdı: “Gürcüstan, Ukrayna, Qırğızıstan, Azərbaycan”. Yəni dördüncü biz olmalı idik və bizdən sonra da başqaları olmalı idi. İndi bütün dünya görür ki, bu inqilablar o ölkələrə ancaq bədbəxtlik gətirib”. Göründüyü kimi, ölkə başçısı da həssas dönəmlərdə ölkəmizə qarşı təxribatçı planların hazırladığını bildirib. Bəs Azərbaycanda reallaşması mümkün olmayan təxribatların qisası olaraq indiki məqamda ölkəmizdə stabilliyi pozmaq üçün xaricdən müdaxilə cəhdləri ola bilərmi?
Təhlükəsizlik məsələləri üzrə ekspert Arzu Nağıyev “Bakı-Xəbər”ə açıqlamasında bildirib ki, yaxın perspektivdə ölkəmizdə bələdiyyə və parlament seçkilərinin keçirilməsi gözlənilir: “Mən düşünmürəm ki, həmin seçkilər zamanı xaricdən idarə olunan hər hansı bir təxribat planı baş tuta bilsin. Bunun üçün mütləq şəkildə səbəb və məqsəd olmalıdır. Bu gün Azərbaycanda aparılan islahatlarla bağlı hər hansı bir daxili və xarici gücün təxribat törətmək marağı hiss edilmir. Məlum məsələdir ki, böyük siyasətdə dost, qardaş məfhumu yoxdur, sadəcə olaraq ümumi maraqlar var. Bu gün Azərbaycanın atdığı addımlar heç bir dünya gücünü narahat etmir. Çünki biz xarici siyasət kursunda düşünülmüş siyasət yürüdürük. Rusiya ilə əlaqələrimiz çox yüksək səviyyədədir. Mehriban xanım Əliyevanın Rusiyaya səfəri bunu bir daha sübut etdi. Məlum çıxışında Prezident əsasən daxili siyasəti təhlil edib, ondan doğan nəticəyə diqqəti yönəltdi. Yəni həmin vaxt xaric ölkədə bir qədər canlanmanı görüb, hansısa təxribatlara əl atmaq istəyirdi. Hazırda daxili situasiyada tam fərqlidir. Yəni xaricdən təxribat törətmək istəyənləri cəlb edən nəsə yoxdur. Bizim mənfur qonşularımızın belə niyyəti ola bilər. Amma onların da buna gücü yetməz. Çünki bizim xüsusi xidmət və hüquq-mühafizə orqanları Azərbaycana qarşı olan istənilən təxribatın qarşısını almaq gücündədir. Heç bir dövlət belə təxribatlardan tam sığortalanmayıb. Azərbaycan vətəndaşı da başa düşməlidir ki, belə məqamlarda bir qədər diqqətli olmaq gərəkir. Ən əsas təxribatı biz təmas xəttində ermənilərdən gözləyə bilərik. Yəni orda atəşkəsi pozub müəyyən təxribatlara cəhd oluna bilər. Bizim ordumuz da həmin təxribatların qarşısını almaq və düşmənə layiqli cavab vermək gücündədir. Zənnimcə, seçkilər normal keçəcək. Bununla bağlı hər hansı narahatlığın olacağını düşünmürəm. Ola bilər ki, seçkilərdən sonra ikili standartlardan doğan bəyanatlara rast gəlinsin. Bununla bağlı da bizim cavab vermə təcrübəmiz kifayət qədərdi. Azərbaycan artıq həmin təxriatların planlaşdırılması üçün cəlbedici məkan sayılmır”.
Məhəmmədəli QƏRİBLİ
