Həsrət Rüstəmov: “Xalq hərəkatlarından sonra hakimiyyətə gələn yeni qüvvələrin təcrübəsi olmur”
Məlum olduğu kimi, Prezident İlham Əliyev Sumqayıt şəhərinin 70 illiyinə həsr edilmiş tədbirdə AXC hakimiyyətinin yarıtmaz fəaliyyətini və həmin dövrdə yüksək dövlət postlarında təmsil olunan şəxsləri sərt tənqid edib. Ölkə başçısı konkret adlar çəkməsə də, sadaladığı vəzifələrin adlarından söhbətin kimlərdən getdiyi məlum olur. Hələ ki, həmin şəxslərin Prezidentin səsləndirdiyi fikirlərə hər hansı reaaksiyası müşahidə olunmur. Maraqlıdır, həmin dövr AXC hakimiyyətinə müxalif olan, lakin Milli Azadlıq Hərəkatının şinelindən çıxmış partiyalar İlham Əliyevin AXC kadrları ilə bağlı səsləndirdiyi fikirləri necə qarşılayır?
AXC hakimiyyətinə qarşı müxalifətdə dayanan AMİP-in funksioneri Əli Orucov “Bakı-Xəbər”ə açıqlamasında bildirdi ki, həmin dövrlə bağlı onların də tənqidi fikirləri olub: “Biz AXC-ni onların hakimiyyətdə olduğu dönəmdə də sərt tənqid etmişik. Həm idarəetmədə, həm də kadr seçimində ciddi nöqsanlar olub. Dəfələrlə bildirmişik ki, belə idarəetmə uzun sürməz. Proseslərin gedişi bizim haqlı olduğumuzu göstərdi. Hesab edirəm ki, Prezidentin həmin zamanla bağlı apardığı təhlilləri obyektivdir. Ancaq həmin səhvlərdən həm də nəticə çıxarmaq lazımdır. O səhvləri bir daha buraxmaq lazım deyil. Bunun millətimizin taleyi, demokratiyaya inamı üçün çox ciddi təsiri ola bilər. Barələrində Prezident tərəfindən sərt ittihamlar səsləndirilən adamların çoxu yenə siyasi arenadadı. Onların Prezidentin fikirlərinə reaksiya verməməsi təbiidir. Durub deyəcəklər ki, nazir jurnalisti döyməyib? Və ya o vaxtın baş prokurorunun öz prezidentinin həbsnə sanksiya verdiyini inkar edəcəklər? Hesab edirəm ki, Prezidentin həmin zamanla bağlı səsləndirdiyi iradların hamısı doğrudur”.
Həmin zamanda hakimiyyətdə təmsil olunmayan Azərbaycan Demokrat Partiyasının sədr müavini Həsrət Rüstəmov hesab edir ki, səslənən fikirlərin bir çoxu həqiqət olsa da, böyük əksəriyyəti uzun illərdi səslənən ittihamalrdı: “Biz hesab edirik ki, səslənən fikirlər doğru olsa da, 26 ildən sonra həmin dönəmi detallı təhlil etmək lazım deyil. Bu şəkildə ittihamların səslənməsi həm də AXC hakimiyyətində təmsil olunmuş şəxslərin fəallaşması ilə bağlıdır. Görünür, Prezident bununla həmin dairələrə meyl edən hakimiyyətdaxili qruplara öz sərt mesajını verir. Bəli, biz də razıyıq ki, AXC hakimiyyəti təcrübəsiz olub. Amma gərək təcrübəni də hardasa qazanasan da. Nəzərə alaq ki, həmin vaxt ölkə də kasıb idi, neft gəlirləri yox idi. Çox çətin bir şəraitdə idarəetmə həyata keçirilirdi. Bu tərəflərini də nəzərə almaq lazımdır. Tarixdən də bəllidir ki, xalq hərəkatlarından sonra hakimiyyətə gələn yeni qüvvələrin təcrübəsi olmur. Biz ADP olaraq iqtidar-müxalifət dialoqu, yaxınlaşmasını zəruri sayırıq. Buna görə də hər iki tərəfdən sərt ritorikanın kənara qoyulmasının tərəfdarıyıq. Qarşılıqlı ittihamalr aradan qalxsa, bunun ölkəmizin inkişafı üçün xeyri olar”.
Məhəmmədəli QƏRİBLİ
