Arzuman Abdulkərimov:“Vətəndaşlarımızı aldadıb, onlara qərib ölkədə müəyyən əziyyət verənlər sərt şəkildə cəzalandırılmalıdır”
“Mühacir alveri də insan alverinin bir formasıdır, bu işlə məşğul olanlar beynəlxalq hüquq qarşısında məsuliyyət daşıyır”
Almaniya Azərbaycanlıları Alyansı bir qrup azərbaycanlının deportasiya edilməsi ilə bağlı bəyanat yayıb. Alyans bu bəyanatla Almaniya Federativ Respublikasında (AFR) yaşayan soydaşlarımıza müraciət edib. Bəyanatda deyilir: "Bəzi vətəndaşlarımız müxtəlif işbazlar tərəfindən aldadılır. Müşahidələrimizə əsasən, son zamanlar müxtəlif yollarla Almaniyaya gələn və ya müxtəlif işbazlar (mühacir alverçiləri) tərəfindən aldadılaraq buraya gətirilən bəzi soydaşlarımız Almaniyada oturum hüququ əldə etmək və deportasiyadan yayınmaq üçün həmin dələduzlar tərəfindən yüksək dozalı dərman preparatları qəbul etməyə, özlərinə kəsici alətlərlə xəsarət yetirməyə və ya digər bu kimi qeyri-insani addımlar atmağa sövq edilirlər. Bütün bunlar aydındır ki, həmin dələduzların mühacirlərdən müxtəlif yollarla oturum üçün aldıqları vəsaitləri geri ödəməmək və qeyri-müəyyən müddətə vaxt qazanmaları üçün edilir. Hər kəs bilməlidir ki, Almaniyada qalmaq üçün bu kimi Azərbaycan vətəndaşına yaraşmayan qeyri-insani addımların AFR-də oturum hüququnun əldə edilməsi prosesinə heç bir faydası yoxdur və bu hallar yolverilməzdir. Almaniya qanunveriçiliyinə əsasən, bu kimi hallar presedent ola bilməz. Özlərinə xəsarət yetirən həmvətənlərin müvafiq tibbi müayinədən sonra dərhal deport edildikləri müşahidə olunur. Ümid edirik ki, Almaniya və Azərbaycan hüquq-mühafizə orqanları həmvətənlərimizi bu hərəkətlərə sövq edən cinayətkarların layiqli cəza almalarını təmin edəcək”.
Siyasi məsələlər üzrə ekspert Arzuman Abdulkərimov məsələ ilə bağlı “Bakı-Xəbər”ə açıqlamasında qeyd etdi ki, Almaniya Federativ Respublikasının polisi həmin ölkədə yaşayan bir qrup azərbaycanlıya qarşı xüsusi əməliyyat keçirib. Əməliyyat nəticəsində Almaniyada məskunlaşıb mühacir biznesi ilə məşğul olan azərbaycanlılar saxlanılıb. Və onlar haqqında cinayət işi açılıb: “Uzun zamandır ki, biz bu məsələni gündəmə gətirirdik. Almaniya polisinin keçirdiyi reyd nəticəsinə mühacir biznesi ilə məşğul olanlar ictimaiyyətə məlum oldu. Məlumat üçün bildirim ki, Azərbaycandan gedən siyasi mühacirlərin əksəriyyəti siyasi proseslərin iştirakçısı olmayıb. Sadəcə olaraq, onlar siyasi partiyalardan saxta arayış almaqla Almaniyaya gediblər və Almaniyada “fırıldaqçıların” əlinə düşüblər. Hətta vəziyyət o qədər çətin olub ki, onlar mühacirlərə müxtəlif formada təzyiqlər göstəriblər. Onlara psixotrop maddələr verərək başlarına olmazın hadisələr gətirilib. Həmin insanlar burdan gedərkən bahalı əşyalarını satıblar. Gedərkən onlara “ağ həyat” vəd ediblər. Lakin gedən proseslər göstərib ki, qərib ölkələr yaşamaq üçün uyğun olmayıb. Sonda o insanlar yenidən Azərbaycana sığınıblar. Hesab edirəm ki, vətəndaşlarımızı aldadıb, onlara qərib ölkədə müəyyən əziyyət verənlər sərt şəkildə cəzalandırılacaq”.
Həmsöhbətimiz onu da vurğuladı ki, mühacir alveri də insan alverinin bir formasıdır. Bu işlə məşğul olanlar beynəlxalq hüquq qarşısında məsuliyyət daşıyır. Həmin şəxslər də məsuliyyətə cəlb olunacaq. Yaxşı olar ki, hadisədə adı hallanan Müsavat Partiyasının rəhbərliyi xalq qarşısında özlərinin günahkar olduqlarını etiraf etsin.
Günel CƏLİLOVA
