“Gənclərin, tələbələrin, məktəblilərin iştirakı ilə həmin mərkəzlərdə müxtəlif tədbirlər keçirilməlidir”
"Rayonların abadlıq-quruculuq işlərinə diqqət yetirilməlidir, mövcud obyektlərin işlək vəziyyətdə olması da çox önəmlidir. Mənə verilən məlumatlara görə, bir neçə rayonda mənim iştirakımla açılmış Gənclər Mərkəzi indi bağlıdır, qapıya qıfıl vurulub və sadəcə olaraq görüntü naminə fəaliyyət göstərir. Bu dözülməzdir, buna vəsait xərclənib".
Bu sözləri Prezident İlham Əliyev bir neçə gün öncə Anar Tağıyevi Yevlax Şəhər İcra Hakimiyyətinin başçısı, Elnur Rzayevi Xaçmaz Rayon İcra Hakimiyyətinin başçısı vəzifələrinə təyin olunması ilə əlaqədar qəbul edərkən deyib. Prezident qeyd edib ki, Gənclər mərkəzlərində gənclər öz asudə vaxtlarını keçirməlidirlər, orada maraqlı tədbirlər, intellektual oyunlar, vətənpərvərliklə bağlı tədbirlər təşkil olunmalıdır: “Bu mərkəzlər tikilir, bir çox hallarda istifadə olunmur. Heydər Əliyev mərkəzləri, demək olar ki, hər bir rayon mərkəzində vardır. Nədir bu mərkəzlərin məqsədi? Odur ki, o mərkəzlərə vətəndaşlar gəlib öz asudə vaxtlarını keçirsinlər, o mərkəzlərdə dərnəklər fəaliyyət göstərməlidir, o mərkəzlərdə sərgilər keçirilməlidir. O mərkəzlər rayonun mədəni həyatının ayrılmaz hissəsi olmalıdır. Ancaq mənə verilən məlumata görə, bəzi hallarda açılışdan sonra yenə də qapıları qıfıllanır və faktiki olaraq bu mərkəzlər işləmir”.
Qeyd edək ki, bu gün bölgələrdə fəaliyyət göstərən dərnəklər və Gənclər mərkəzləri formal xarekter daşıyır. Sosial sahə üzrə ekspert İlqar Hüseynli bildirdi ki, bölgələrdə fəaliyyət göstərən dərnəklər, gənclər mərkəzi normal fəaliyyət göstərmir: “Sovet dövründə dərnəklər fəaliyyət göstərirdi. Həmin dərnəklərdə dram, xor, ədəbiyyat, texniki təmayüllü fənlər tədris olunurdu. Gənclərin hansı sahəyə marağı var idisə onunla məşğul olurdular. Dərnəklər, demək olar ki, indi arxivə gömülüb”. Həmsöhbətimizin sözlərinə görə, gənclərin asudə vaxtlarını səmərəli keçirməsi üçün Gənclər Mərkəzi yaradıldı. Gənclər Mərkəzi tək paytaxtda deyil, bölgələrdə də yaradıldı. Ancaq bölgələrdə fəaliyyət göstərən Gənclər Mərkəzinin fəaliyyəti qənaətbəxş deyil: “Prezident düz irad bildirir ki, rayonlarda mövcud olan Gənclər Mərkəzinin əksəriyyəti işlək deyil. Həmin mərkəzlərin işlək olması üçün təhsil müəssisələri ilə əməkdaşlıq etməlidir. Gənclərin, tələbələrin, məktəblilərin iştirakı ilə həmin mərkəzlərdə müxtəlif tədbirlər keçirilməlidir. Bununla yanaşı, gənclərin asudə vaxtını səmərəli keçirməsi üçün Mərkəzlərin daxilində dərnəklər fəaliyyət göstərə bilər. Beləliklə, Gənclər Mərkəzinin fəaliyyəti daha səmərəli olar”.
Günel CƏLİLOVA
