“Dövlət əmlakının talanması Cinayət Məcəlləsində 179-cu maddə ilə təsbit olunur”
Prezident İlham Əliyev Anar Tağıyevi Yevlax Şəhər İcra Hakimiyyətinin başçısı, Elnur Rzayevi Xaçmaz Rayon İcra Hakimiyyətinin başçısı vəzifələrinə təyin olunması ilə əlaqədar qəbul edərkən bəzi icra başçılarının talançılıqla məşğul olduğunu deyib: "Gənclər mərkəzlərində gənclər öz asudə vaxtlarını keçirməlidirlər, orada maraqlı tədbirlər, intellektual oyunlar, vətənpərvərliklə bağlı tədbirlər təşkil olunmalıdır. Bu mərkəzlər tikilir, bir çox hallarda istifadə olunmur. Heydər Əliyev mərkəzləri, demək olar ki, hər bir rayon mərkəzində vardır. Nədir bu mərkəzlərin məqsədi? Odur ki, o mərkəzlərə vətəndaşlar gəlib öz asudə vaxtlarını keçirsinlər, o mərkəzlərdə dərnəklər fəaliyyət göstərməlidir, o mərkəzlərdə sərgilər keçirilməlidir. O mərkəzlər rayonun mədəni həyatının ayrılmaz hissəsi olmalıdır. Ancaq mənə verilən məlumata görə, bəzi hallarda açılışdan sonra yenə də qapıları qıfıllanır və faktiki olaraq bu mərkəzlər işləmir. Siz bu məsələ ilə çox ciddi məşğul olun. Yəni rayonlarda həyat daha da dinamik xarakter almalıdır. Əlbəttə ki, rayonlarla böyük şəhərlər arasında fərq var, hər bir ölkədə. Ancaq biz bu fərqi azaltmalıyıq. Rayon yerində elə şərait yaradılmalıdır ki, oradakı vətəndaşlar elə orada yaşasınlar. İş yerləri olmalıdır. İndi dövlət xətti ilə bu proqram icra olunur, o cümlədən ödənişli ictimai işlər yaradılıbdır. Bu il 40 minə yaxın ödənişli ictimai iş yeri yaradılıb. Ancaq əvvəlki mənzərə necə idi? Bəzi icra başçıları saxta adamların adlarını siyahıya yazdırırdılar, onlara düşən vəsaiti mənimsəyirdilər və beləliklə talançılıqla məşğul idilər. Onların artıq cəzası verilibdir. Ona görə bu sahədə də tam şəffaflıq təmin edilməlidir. Əmək və Əhalinin Sosial Müdafiəsi Nazirliyi ilə birlikdə siz ən kasıb təbəqəni bu işlərə cəlb etməlisiniz ki, onlar işsiz qalmasın. Mən demək istəyirəm ki, bu ödənişli iş yerlərinin böyük əksəriyyəti bizə lazım deyil. Ancaq biz bunu ona görə edirik ki, işsizlik aşağı səviyyədə olsun və rayonlarda iş axtaran işlə təmin olunsun. Yenə də demək istəyirəm ki, bu işlərdə artıq 40 minə yaxın vətəndaş işləyir və eyni zamanda, onların arasında bağbanlar, binaları təmir edənlər də var. O da bizə lazımdır. Ona görə bu sahəyə çox ciddi diqqət göstərilməlidir və elə etməlisiniz ki, vətəndaşlar sizin fəaliyyətinizdən razı qalsınlar". Cənab Prezident konkret olaraq bəzi icra başçılarının talançılıqla məşğul olduğunu bildirib və qeyd edib ki, onlardan bəziləri cəzasını alıb. Yəqin ki, ölkə başçısının səsləndirdiyi bu detallarla bağlı müvafiq araşdırmalar başlanacaq. Çünki söhbət dövlət əmlakının talanması kimi ağır cinayətdən gedir. Gözləmək olarmı ki, Prezidentin dediyi faktlar əsasında cinayət işləri qaldırılacaq? Vəkillər Kollegiyasının üzvü, hüquqşunas Mehman Muradlı “Bakı-Xəbər”ə açıqlamasında bildirdi ki, ölkə başçısı olduqca ciddi mətləbə toxunub:“Bildirdi ki, icra başçıları kimlərinsə adlarını saxta əsaslarla yazıb dövlət əmlakını talayırmışlar. Diqqət çəkən digər məqam isə bununla bağlıdır ki, Prezident həmin adamlardan bəzilərinin cəzasını aldığını bildirdi. Ölkə başçısı həmin çıxışında dedi ki, bəzən royonlardan real vəziyyətlə bağlı ona saxta raportlar təqdim edirlər. Ola bilər ki, bu istiqamətdə olan raportda da məsələ ilə bağlı ölkə başçısına tam müfəssəl məlumat verilməyib. Çünki son illər ərzində biz hansısa icra başçısının cinayət məsuliyyətinə cəlb edildiyini eşitməmişik. Ola bilər ki, bu məsələ ilə bağlı onlara inzibati tənbeh cəzası verilib. Ancaq bu faktın Cinayət Məcəlləsi çərçivəsində araşdırılmasına ehtiyac var. Qanunvericiliyə görə, cinayət işinin başlanması üçün səbəblərdən biri KİV-də dərc edilən, ictimailəşdirilən məlumatlardı. Bu məsələni isə cənab Prezident ictimailəşdirib. Hesab edirəm ki, Prokurorluq həmin faktlarla bağlı cinayət işi açmalıdır. Çünki söhbət dövlət əmlakının talanması və vəzifədən sui-istifadə kimi hallardan gedir. Dövlət əmlakının talanması cinayət məcəlləsində 179-cu maddə ilə təsbit olunur. Bu maddə ilə cinayət işi açılıb, təqsirkarlar məsuliyyətə cəlb edilə bilər. Digər tərəfdən isə, dövlət büdcəsinə nəzarət edən qurum olan Hesablama Palatası da müvafiq addımları ata bilər. Həmin faktlar əsasında araşdırmanı aparıb, yekun nəticəni prokurorluğa təqdim edə bilər”.
Məhəmmədəli QƏRİBLİ
