Məlum olduğu kimi, oktyabrın 25-də Bakıda Qoşulmama Hərəkatına üzv ölkələrin dövlət və hökumət başçılarının XVIII Zirvə Görüşü işə başlayıb. “Bandunq Prinsiplərini rəhbər tutmaqla müasir dünyanın çağırışlarına birgə və adekvat cavab verilməsini təmin etmək” mövzusunda keçirilən XVIII Zirvə Görüşündə 60-a yaxın ölkənin dövlət və hökumət başçıları, həmçinin beynəlxalq təşkilatların rəhbərləri iştirak edir. Ümumilikdə Zirvə Görüşünə 160-a yaxın ölkənin və beynəlxalq təşkilatın nümayəndələri qatılıb.
Qoşulmama Hərəkatının sədri, Azərbaycan Prezidenti İlham Əliyev Zirvə Görüşündə nitq söyləyib. Prezident bildirib ki, Azərbaycan bu təşkilat daxilində də maraqlı təkliflərlə çıxış edib, onların reallaşmasına nail olub:”Azərbaycanda gənclər siyasəti prioritet sahə kimi müəyyən edilmişdir. Azərbaycan gəncləri milli ruhda, ənənəvi dəyərlərlə, Vətənə bağlı və vətənpərvər ruhda tərbiyə alırlar. Buna görədir ki, Qoşulmama Hərəkatı tarixində ilk dəfə olaraq Gənclər Sammitinin keçirilməsi təşəbbüsü ilə çıxış etmişik. Hazırkı Zirvə Görüşü ərəfəsində keçirilmiş Gənclər Sammitində 40 dövlətdən ölkəmizə gəlmiş gənclər iştirak etmişlər”.
Azərbaycanın bu təşəbbüsü necə dəyərləndirilə bilər? AMEA-nın əməkdaşı, gənc alim Əpoş Vəliyev “Bakı-Xəbər”ə bildirdi ki, ölkə başçısı Qoşulmama Hərəkatı Gənclər Sammitinin Azərbaycanın təşəbbüsü olduğunu doğru olaraq qeyd edib: “Bununla bir daha subut olundu ki, Azərbaycan bir ölkə olaraq irəli sürdüyü təşəbbüslərin arxasında axıra qədər durmağı bacarır və onların reallaşmasına nail ola bilir. Təsadüfi deyil ki, Azərbaycan qonşumuz olan nəhəng ölkələrlə də bir sıra əməkdaşlıq formatlarının təşəbbüskarı kimi çıxış edib, onların da həyata keçməsinə nail olmağı bacarıb. Sözügedən təşəbbüsün də irəli sürülməsi üçün Azərbaycanın əlində əsaslar və bunun təməli olub. Ölkəmiz çox uğurlu gənclər siyasəti yürütdüyü üçün bu təcrübəni dünya miqyasında bölüşmək istəyib və bu uğurlu alınıb”. Gənc alimin sözlərinə görə, Azərbaycanda 300-dən çox gənclər təşkilatı fəaliyyət göstərir:”Gənclər və İdman Nazirliyi və Azərbaycan Gənclər Fondu hər il bu təşkilatların təhsil, mədəniyyət, incəsənət, elm və digər sahələr üzrə həyata keçirdikləri layihələrin dəstəklənməsi üçün maliyyə ayırır və onların beynəlxalq fəaliyyətini dəstəkləyir. Ölkəmizdə gənclər siyasətinin geniş infrastrukturu var. Belə ki, 40-dan artıq rayon və şəhərdə olan sosial xidmət müəssisələri, Gənclər Evləri-Mərkəzləri fəaliyyət göstərir. Son 15 il ərzində Bakıda dörd beynəlxalq gənclər platforması təsis edilib. Ölkəmiz bir çox bu qəbildən olan tədbirlərə ev sahibliyi edib. Bundan başqa, Bakı 2007-ci ildə “Gənclər sivilizasiyaların alyansı naminə” nəsillərarası yüksək səviyyəli konfransa, 2008-ci ildə “İslamofobiya və ksenofobiyanın müxtəlif növləri: gənclərə təsiri və qarşısının alınmasında gənclərin fəaliyyəti” mövzusunda beynəlxalq konfransa, 2011-ci ildə BMT-nin Sivilizasiyaların Alyansı Uğrunda Qlobal Gənclər Hərəkatının birinci Konqresinə, 2012-ci ildə birinci “Böyük İpək Yolu” Beynəlxalq Gənclər Konqresi və Festivalına, 2014-cü ildə Gənclər siyasəti üzrə birinci Qlobal Foruma, 2017-ci ildə Dünya Skaut Konfransına, 10 gün bundan əvvəl Türk Şurası Gənclər Platformasının birinci Baş Assambleyası kimi beynəlxalq gənclər tədbirlərinə ev sahibliyi edib. Bir sözlə, Azərbaycan beynəlxalq gənclər hərəkatının inkişafına ciddi töhfələr verib. Qoşulmama Hərəkatı tarixində ilk dəfə olaraq Gənclər Sammitinin keçirilməsi təşəbbüsünün tam həyata keçirilməsini də bu qəbildən saya bilərik”.
Məhəmmədəli QƏRİBLİ
