Prezident İlham Əliyev Şahin Mustafayevi yeni vəzifəyə, Baş nazirin müavini təyin olunması ilə əlaqədar qəbul edəndə bir sıra mühüm iqtisadi məsələlərə də toxunmuşdu.
Azərbaycan iqtisadiyyatının son 15 il ərzindəki dinamikasından danışan cənab Prezident onun üç dəfədən çox artdığını bildirmişdi:
Sitat:
“Bu artım daha çox neftin hasilatının artırılması hesabına mümkün olub. Biz neft gəlirlərinin qeyri-neft sektoruna yönəldilməsi istiqamətində çox böyük uğurlar əldə etdik və Azərbaycan iqtisadiyyatımızın şaxələndirilməsi işində dünya miqyasında təbii resurslarla zəngin olan ölkələr sırasında qabaqcıl yerlərdədir. Təsadüfi deyil ki, biznes mühitinin yaxşılaşdırılmasını Dünya Bankı kimi ən aparıcı beynəlxalq maliyyə qurumu qiymətləndirir və biznes mühitinin səviyyəsinə görə biz dünyada 25-ci yerdəyik, 20 ən islahatçı ölkə arasındayıq.
Hazırda iqtisadi inkişafımızın artımının əsas səbəblərindən biri dövlət investisiyalarıdır. Ölkəmizin uğurlu dayanıqlı iqtisadi inkişafı bundan sonra özəl sektor hesabına təmin edilməlidir. Bu vəzifəni mən doqquz ayın sosial-iqtisadi yekunlarına həsr edilmiş müşavirədə səsləndirdim. Bizim əsas vəzifəmiz qeyri-neft sektorunu inkişaf etdirmək və məşğulluğu artırmaqdır. Bunun da çox sadə səbəbi var. Müstəqillik günündən bu günə qədər Azərbaycan əhalisi təxminən 3 milyon artıbdır. Bu, həm böyük üstünlüyümüzdür, böyük sərvətimizdir, eyni zamanda, ölkə iqtisadiyyatına, o cümlədən infrastruktura və sosial infrastruktura böyük yükdür”.
O bildirmişdi ki, xüsusilə də ÜDM-in artımının çox böyük hissəsinin neft sektoru hesabına əldə olunması, burada dövlət investisiyalarının əsas rol oynadığı haqda deyilənlər bundan sonra qeyri-neft sektorunun inkişafına, özəl sektorun böyüməsinə çox böyük üstünlük veriləcəyini göstərir.
Heç kimə sirr deyil ki, Baş nazirin yeni müavini, sabiq iqtisadiyyat naziri Şahin Mustafayev azsaylı kadrlardandır ki, karyera yüksəlişi peşəkar keyfiyyətlərinə görə mümkün olub. Uzun müddət SOCAR-ın maliyyə məsələləri üzrə viste-prezidenti, vergilər nazirinin birinci müavini və iqtisadiyyat naziri işləsə də adı korrupsiya qalmaqallarında hallanmayıb, iqtisadiyyatı praktik olaraq bilən adamdır. Və bu gün Mikayıl Cabbarovun İqtisadiyyat naziri təyin edilməsi, Azərbaycan Prezidenti İlham Əliyevin İqtisadiyyat Nazirliyinin funksiyalarının və strukturunun genişləndirilməsi haqqında Fərmanı islahatların dönməz olacağından xəbər verir.
“Prezident tərəfindən həyata keçirilən islahatlar ölkəmizin dinamik inkişafının gətirdiyi yeni keyfiyyət mərhələsində baş tutur və kompleks xarakter daşıyır”. Bunu Sherg.az-a açıqlamasında millət vəkili, siyasi elmlər doktoru Hikmət Babaoğlu deyib.
Deputat bildirib ki, islahatların birinci mərhələsi əsasən qanunvericilik və instutisional sahələri əhatə etdi, daha sonra struktural və kadr islahatlarına keçid başladı:
“Əslində bu ardıcıllıq həyata keçirilən islahatların müxtəlif komponentlərini özündə birləşdirməklə onun tamlığından xəbər verir. Hazırkı mərhələ daha çox kadr islahatları mərhələsi kimi görünə bilər. Ancaq bir qədər diqqət etsək, kadr dəyişikliklərinin islahatların digər komponetləri ilə paralel həyata keçirildiyini görə bilərik. 2015-ci ildən bəri alınan qərarlar, imzalanan sərəncam və fərmanlar dediklərimizi təsdiq edir. Xeyli sahədə nazir vəzifələrinə qədər mühüm dəyişikliklərin olduğunu göstərir. Son dəyişikliklər isə kadr islahatlarında daha yuxarı idarəetmə strukturlarını əhatə etdiyi üçün diqqəti cəlb edir. Qısa müddətdə baş nazirin dəyişməsi, baş nazirin müavinlərinin işdən azad edilməsi və artıq yeni baş nazirin müavini vəzifəsinə təyinatın olması kadr islahatlarının daha da dərinləşməsi kimi qiymətləndirilməlidir. Ancaq bu proses sadəcə kadrların dəyişməsi deyil, həm də idarəetməyə yeni keyfiyyət dəyişikliyinin gətirilməsi kimi nəzərdən keçirilməlidir”.
“İslahatların ən ümdə vəzifələrindən biri əhalinin rifah halının daha da yaxşılaşdırılması, yeni iş yerlərinin açılması, işsizliyin səviyyəsinin aşağı səviyyəyə salınması, sosial islahatların daha da dərinləşməsi məqsədini daşıyır. Bütün bunlar Prezident İlham Əliyevin həyata keçirdiyi kadr siyasətinin və islahatların əsasında Azərbaycan xalqının rifahının və ölkəmizin inkişafının dayandığını göstərir”.
O ki qaldı islahatların davamına, cənab Prezident dəfələrlə qeyd edib: İslahatlar dönməzdir!”.
Səbuhi MƏMMƏDLİ
