Türkiyənin Bakıdakı Səfirliyinin Mətbuat Müşavirliyi ölkəsinin Suriyada apardığı “Sülh bulağı” əməliyyatının dünya mediasında və sosial şəbəkələrdə qaralanmasına edilən cəhdlərlə bağlı açıqlama yayıb.
Azərbaycanın mətbu orqanlarına ünvanlanan, o cümlədən “Bakı Xəbər” qəzetinin redaksiyasına daxil olan açıqlamada deyilir:
Cənub sərhədimizdə yaradılmağa çalışılan terror dəhlizini yox etmək, bölgəyə sülh və dinclik gətirmək məqsədilə başladılan “Barış Pınarı” (Sülh bulağı-red) hərəkatına qarşı terror təşkilatı YPG/PKK tərəfdarı olan mətbu orqanlar və bəzi sosial media hesablarından saxta təbliğat davam etməkdədir. Bu məqsədlə onlar “Barış Pınarı” əməliyyatı əsnasında beynəlxalq müharibə qanunlarına zidd olan döyüş sursatlarının istifadə edildiyi yalanını yaymağa çalışırlar. Sosial media hesablarında “Ərəb Baharı”nda Liviyada bir fosfor bombası yuvasının fotoşəkili istifadə edilərək, "Türk Ordusu ABŞ-ın Rasulayn şəhərində ağ fosfor bombalarından istifadə edir" kimi yalan məlumatlar yayılıb.
Türkiyəni qaralamaq üçün paylaşılan həmin fotoşəkilin 2012-ci ildə ABŞ-ın “New York Times” qəzetində Liviyada “Ərəb Baharı” dövründə Qəddafiyə qarşı döyüşən qüvvələrin istifadə etdiyi silahlarla bağlı məqalədə nümayiş olunduğu bəlli olub. PKK/PYD tərəfdarlarının bomba qabığının altındakı və yuxarıdakı daşları silməklə orijinal şəkli saxtalaşdırdığı ortaya çıxıb. O da bəlli olub ki, ABŞ istehsalı olan bomba Liviya hökmdarı Kral İdrisə Vaşinqton tərəfindən “Soyuq müharibə” dövründə verilib.
Beləliklə, terror təşkilatı tərəfdarlarının “Sülh bulağı” əməliyyatı zamanı qadağan edilmiş kimyəvi silahlardan istifadə olunması ilə bağlı yalanı ifşa olunub. Digər tərəfdən, Milli müdafiə naziri Hulusi Akar terror təşkilatının kimyəvi silahdan istifadə edərək günahı Türkiyə ordusunun üzərinə atmağa hazırlaşdığını deyib.
Ölkəmizə atılan böhtanlar və həqiqətlər barədə ictimaiyyətin məlumatlandırılmasında yardımınızı xahiş edirik və işlərinizdə uğurlar diləyirik.
