13/11/2019 16:21
728 x 90

19 oktyabr təxribatı: “Xaos müxalifəti”nin çirkin niyyətləri keçməyəcək

img

“Tutaq ki, Əli Kərimlini tutanda xəsarət yetirmişdilər, üz-gözü zədəli idi, bəs azadlığa buraxılanda necə oldu o xəsarətləri? Videoda heç nə görmədim, ona görə soruşuram e, başqa şey fikirləşməyin. Xəstəxanada niyə heç bir problemi olmaması barədə qol çəkdi? Çəkməyəydi də... Onun arxasınca küçələrə düşən adamlara yazığım gəlir, başqa heç nə... Yeyilmiş beyinlər gələcəklərinin mədətini ondan umur, kimdən-kimdən, Əli Kərimlidən...” 

Sadə bir Azərbaycan insanının sosial şəbəkələrdə bir paylaşımıdır. Nə siyasi ambisiyası var, nə siyasi kimliyi, sıradan bir azərbaycanlı. Nə qədər dəqiq ifadə edir şənbə günü Bakı küçələrində baş verənləri.

Əslində həmin gün baş verənləri ancaq və ancaq belə qiymətləndirmək olardı: “Xaos müxalifəti” nəyin bahasına olursa-olsun, Qərbdəki havadarlarına Azərbaycanda sabitliyin olmadığını sübut etmək istəyirdi. Bunun üçün maksimum çalışdılar. Amma qarşılarında Azərbaycan polisini və ən əsası Azərbaycan xalqını gördülər. Hə, xalqdan dəstək almadılar, ala da bilməzdilər.

Lökbatana gedib əvvəlcədən müəyyən edilmiş şüarlarını “28 May” metrosu ətrafında səsləndirmək istədilər. Və təbii ki, polisin təpkisi ilə rastlaşacaqlarını gözəl bilirdilər. Kərimli anlamadı ki, sərbəst toplaşmaq azadlığı əsas və fundamental azadlıq olsa da, məhdudlaşdırılması qadağan olunan insan hüquq və azadlıqları kateqoriyasına daxil deyil, qanunla məhdudlaşdırıla bilər.

İstər yerli, istərsə də beynəlxalq hüquqi aktlarda bu hüququn həyata keçirilməsinə məhdudiyyət qoyulması üçün nəzərdə tutulmuş əsaslar eynidir:

1. Milli təhlükəsizlik və ictimai asayiş maraqları naminə;

2. İğtişaşın və cinayətin qarşısını almaq üçün;

3. Sağlamlığın və mənəviyyatın qorunması üçün;

4. Digər şəxslərin hüquq və azadlıqlarının müdafiəsi üçün.

Ölkəmizdə sərbəst toplaşmaq azadlığının həyata keçirilməsi "Sərbəst toplaşmaq azadlığı haqqında" Qanunla tənzimlənir. Həmin Qanunun 9-cu maddəsinin VI bəndinə əsasən, yığıncaqların, mitinqlərin və nümayişlərin keçirilməsi üçün hər bir şəhər və rayonda müvafiq icra hakimiyyəti orqanı xüsusi yerlər ayırmalıdır. Yığıncaqların, mitinqlərin və nümayişlərin keçirilməsi üçün təklif olunan yerlərin siyahısı yerli mətbuatda dərc edilir və başqa üsullarla əhaliyə çatdırılır. Təşkilatçılar yığıncaq, mitinq və ya nümayiş üçün ayrılmış yerlərin birini seçə bilərlər.

Hə, polis məhz ictimai asayişi qorumalıydı. Şəhərin mərkəzi, insanların kütləvi yığışdığı, hərəkət etdiyi yerdə razılaşdırılmamış aksiyanın qarşısı alınmamalıydı? Kim hardan bilir ki, həmin əraziyə sözün həqiqi mənasında böyük bir təxribat törətmək istəyən şəxs və ya şəxslər gəlməyəcəkdi və bunu etməyəcəkdi? Əgər mitinqçilər özlərinin sərbəst toplaşma hüququnun pozulduğunu iddia edirsə, onda əyri oturaq, düz danışaq, bəs həmin ərazidə olan digər şəxslərin hüquq və azadlıqlarını niyə nəzərə almayaq? Onların təhlükəsizliyini, müdafiəsini kim həyata keçirməlidir? Təbii ki, polis.

Hər hansı bir partiyanın hakimiyyət uğrunda mübarizə aparması normal bir şeydir. Amma ölkədə seçki yox, kütləvi sosial narazılıq yox, Kərimlini dalbadal mitinq keçirməyə nə sövq edir? Burda bir məqamı xüsusi vurğulamalıyıq: xaricdə formalaşdırılan, təlimatlandırılan birliklər barədə Azərbaycanda dərhal tədqiqat aparılmalı və həmin qurumlar cəzalandırılmalıdır. Sifariş verənlərə söz verilib. Bu da əvəzsiz olmur. Ölkədə qarşıdurma yaratmağa çalışırlar. Və bunun qarşısı qətiyyətlə alınmalıydı, necə ki alındı.

Millət vəkili Fərəc Quliyevin dediyi kimi, unutmaq olmaz ki, polisin vəzifəsi qanunsuz hərəkətlərin qarşısını almaqdır:“Bunların öz iradələri deyildi. Maşa rolunda çıxış etdilər. Onların iradəsi millətin iradəsi sayıla bilməz. Ora 300-400 adam çıxıb etiraz edirdi. Onların tələblərinə baxın! Tibbi sığorta ilə bağlı tələb qoyublar ki, bununla bağlı parlamentdə ciddi qərar qəbul etmişik. Son mitinqdə bir qrup adama yazığım gəlir, çünki onlar aldanıblar. Boş-boş səs-küy saldılar. Hüquq-mühafizə orqanlarımızın, dövlətimizin imicinə zərbə vurmağa çalışan xarici qüvvələr ondan istifadə etməyə başlayacaq. Eyni zamanda, iqtidar və müxalifətin masa ətrafında məsələləri birlikdə müzakirə etmək məqamına da müəyyən qədər kölgə salmağa cəhd oldu. Bu çox pis bir haldır. Xarici maraqları burada ifadə etməyə çalışanlara meydan vermək olmaz”.

Elə baş nazirin müavini, hörmətli Əli Əhmədovun dedikləri də yuxarıdakı məqamlarda xəbər verir. Sitat: “Azərbaycanda maraqlı dairələrin sifarişi ilə sabitliyi pozmaq, xaos yaratmaq niyyəti aydın görünür. Destruktivlərə və onların açıq və gizli havadarlarına çirkin niyyətlərini həyata keçirməyə, ölkənin 1990-cı illərin əvvəllərində yaşadığımız müsibətləri yenidən yaşamasına imkan verilə bilməz və verilməməlidir. Dövlət və onun müvafiq orqanları ölkədəki sabitliyi qorumağa qadirdir və ötən gün onu bir daha əyani şəkildə nümayiş etdirdi. İnanıram ki, törədilən təxribatlara və antikonstitusion çağırışlara lazımi hüquqi qiymət veriləcək. Eyni zamanda onu da aydın şəkildə müşahidə etdik ki, xalq destruktivləri və onların yerinə yetirmək istədikləri çirkin sifarişləri qətiyyətlə pisləyir. İnsanlarımız ölkəmizdəki inkişafı və rahat həyatı yüksək qiymətləndirir. İndi hamının Prezident İlham Əliyevin ətrafında əvvəlkindən daha sıx birləşməsi zamanıdır. Təxribata və təxribatçılara ən tutarlı cavab bu ola bilər. Bütün vətəndaşları qətiyyətli olmağa, dövlətimizin və rahat həyatımızın keşiyində möhkəm dayanmağa səsləyirəm. Gəlin, birlikdə Azərbaycanı qoruyaq!”.

Məncə, əlavə izahata ehtiyac yoxdur.

S. MƏMMƏDLİ

Son xəbərlər