AXC hakimiyyəti dövründə Gədəbəy Rayon İcra Hakimiyyətinin başçısı işləmiş Saleh Rüstəmli istintaqa verdiyi ifadədə Əli Kərimli və Qənimət Zahidə Rusiyadan külli miqdarda pul göndərdiyini bildirib. O qeyd edib ki, vəsaiti ondan Aqil Məhərrəmli və Ruslan Nəsirli götürürmüş.
Sitat: “Olub ki, Babək Həsənov da götürüb. Qənimət Zahidə 2000-2500 dollar vəsait göndərirdik. Bakıya – Əli Kərimliyə göndərilən vəsait isə 20-30 min dollar olurdu. Sonra Əli Kərimli mənə “whatsapp”-da yazırdı ki, “sağ ol, bəy, çatdı”.
Rüstəmlinin bu ifadəsi bir daha sübut etdi ki, onillərdir heç bir yerdə işləməyən Əli Kərimlinin maliyyə qaynaqları haradan imiş. Keçmiş cəbhəçi, Kərimlinin dostu olmuş Sahib Kərimlinin dediyi kimi, AXCP sədri necə “lordlara xas həyat tərzi” keçirirmiş.
O, Rusiyadan gələn və mənbəyi bilinməyən vəsaitlə yekəpər cangüdənlər saxlayır, həyat yoldaşı Bakı-Nyu-York reysini “su yoluna” döndərir, oğlu Avropada nəşəli həyat keçirir, özü də təmtəraqlı həyatdan geri qalmır.
Kərimliyə Moskvadan pul gəlməsi təzə xəbər deyil. Bir vaxtlar bu missiyanı Volqoqradda böyük bir hərbi zavoda rəhbrlik etmiş general Sakit Allahverdiyev öz üzərinə götürmüşdü. Məhz onun kanalıyla Kərimli hər ay külli miqdarda pul alırdı. 2005-ci il parlament seçkilərində Kərimlinin emissarları Sakit Allahverdiyevlə Rusiya paytaxtındakı “Praqa” restoranında görüşmüşdülər. Həmin görüşdə Sakit Allahverdiyevin qardaşı oğlu Anar Allahverdiyevin Xətai rayonundakı 35 saylı 3-cü seçki dairəsindən namizədliyinin verilməsi təklif edilmişdi. Emissarlar buna görə Allahverdiyevdən 100 min dollar istəmişdilər və pul verilmişdi. Anar Allahverdiyev isə “Azadlıq” blokunun namizədi kimi seçkiyə qatılacaqdı.
Kərimli-Allahverdiyev münasibətləri bəlkə də indiyə qədər davam edərdi. Əgər birinci, generala “atmasaydı”. Bu münasibətlər, səhv etmiriksə, 2011-ci ildə bitdi. O vaxtadək generalın maliyyəsi ilə bir neçə cəbhəçi məşhur “Çerkizevo” bazarında qara pulların yuyulması ilə məşğul olan kiçik bir bank qurmuşdu. Bu işə ilkin maliyyəni məhz Allahverdiyev vermişdi. “Çerkizevo” bazarı rəsmən qapanandan sonra Kərimlinin adamları müflis olduqlarını bəyan etdilər. Və Allahverdiyevə qara qəpik də qaytarılmadı. Halbuki, təkcə qanunsuz pul köçürülmələrindən həmin kiçik bank külli miqdarda qazanc gətirirdi.
Hə, Kərimliyə doğrudan da Rusiyadan hər ay müntəzəm olaraq on minlərlə dollar pul gəlib. Amma Əli Kərimli partiyadaşlarına bunun hesabatını saxta şəkildə verirmiş. İndi üzə çıxıb ki, o hətta ən yaxınlarına və təşkilatdakı əlaqədar şəxslərə yalan məlumat olaraq bildirirmiş ki, guya hər ay Rusiyadan ona 500, bəzən 1000 dollar məbləğində dəstək gəlir.
Yadınızdadırmı, rəsmi məlumatların və həbs olunanların verdiyi ifadələrin ardınca AXCP-də ara qarışmışdı. Məlum olub ki, Moskvadan hər ay Milli Şura və AXCP adlı qurumlara nəzarət edən Əli Kərimliyə ən azı 30 min dollar civarında vəsait gəldiyi halda, ortaya bundan 30 dəfə az pul çıxıb. Kərimli qalan vəsaitləri gizli şəkildə Londonda yaşayan ailəsinə yönləndirirmiş. Sonradan Əli Kərimli dolayısı ilə belə vəsaitlər aldığını etiraf edib, amma məbləği fərqli formalarda izah edib. Əslində, bu yeni hadisə deyil. Müxtəlif vaxtlarda, müxtəlif vasitələrlə bu şəxslərin adı müxtəlif qrant qalmaqallarında da hallandığı sübuta yetirilib. Siyasət bu günə qədər Əli Kərimli və digərləri üçün “qara bazar” funksiyasını yerinə yetirib. Bunların əslində təfəkkürləri də siyasi yox, alverçi təfəkkürüdür.
Bəzilərinə elə gəlir ki, Saleh Rüstəmli və digərlərinin Əli Kərimliyə qara pullar transferiylə bağlı məsələ yekunlaşıb. Amma belə deyil. Kərimliyə bu və ya digər halda maddi dəstək verən kanallar hələ də qalmaqdadır. Rusiya paytaxtında Kərimliyə yaxınlığıyla tanınan bəzi insanlar bazar və dükanlarda çalışan sadə azərbaycanlıların mərhəmət hissiylə oynayaraq Kərimli və çetesinə hələ də qara pullar göndərməkdədir. O kanalların da ifşası uzaqda deyil.
E.XƏZƏR
