Milli Məclisin deputatı, parlamentin Hüquq siyasəti və dövlət quruculuğu Komitəsinin üzvü Rafael Cəbrayılovun deputat vəsiqəsini borca görə girov qoyması ətrafında müzakirələr səngimir.
KİV-in yaydığı məlumatda bildirilir ki, deputat ev tikmək üçün notariat qaydasında təsdiq olunmuş şəkildə 9 sentyabr 2015-ci il tarixdə 300 min ABŞ dolları məbləğində borc alıb. Ona borc verən şəxslə deputat ailəvi yaxın münasibətlərdə olub. Lakin deputat borcu vaxtında ödəyə bilməyib. R.Cəbrayılov, hətta borcu vəd etdiyi vaxtda qaytara bilməsi üçün zəmanət kimi III və IV çağırış Azərbaycan Respublikası Milli Məclisinin Deputatının vəsiqəsinin əslini girov qoyub. Borcun qaytarılmadığnı görən Fətəliyeva Təranə Rasim qızı Abşeron Rayon Məhkəməsinə müraciət edib. Məhkəmə iddiaçının xeyrinə 15 fevral 2019-cu ildə qiyabi qətnamə qəbul edib. Cavabdeh şəxs Rəfael Cəbrayılov məhkəmənin qərarı ilə razılaşmayaraq apellyasiya şikayəti verib. Apellyasiya Məhkəməsi birinci instansiya məhkəməsinin qərarını qüvvədə saxlayıb.
Məsələ ilə bağlı medaiaya açıqlama verən Təranə Fətəliyeva onun təfərrüatı barədə belə danışıb və bildirib ki, həmin deputatla qohumluq əlaqələri var. Təranə Fətəliyeva həmçinin qeyd edib ki, 300 min ABŞ dolları tək onun deyil: “Biz Binəqədidə ev almışdıq. Rəfael Cəbrayılov dedi ki, həmin evləri satın, pulunu verin mənə. Tikinti biznesilə məşğul olduğunu deyərək bizi də bu işə cəlb etmək istədiyini bildirdi. Biz də evləri satdıq, qardaşım iki qarajını satdı, bir neçə nəfərdən pul toplayıb verdik Rəfael Cəbrayılova. O, Binəqədidə Gənclər Şəhərciyində binalar tikirdi. Qardaşı da onunla bu biznesə şərikdir. Biz buna görə inandıq. Lakin sonradan bizə məlum oldu ki, o bizi aldadıb. Həmçinin borcu almaq üçün onun qapısına gedəndə gördüm ki, bizim kimi başqa adamlar da var”. İddiaçı Rəfael Cəbrayılovun deputat vəsiqəsini girov qoymasından da danışıb: “Vəsiqənin biri məndə, biri də rəfiqəmdədir. III və IV çağırışı deputat vəsiqələrinin əslidir. Vəsiqələri zəmanət kimi qoymuşdu”. Qeyd edək ki, şikayətçilər həmin vəsiqələrin fotosürətini də paylaşıblar.
Milli Məclisin deputatı, parlamentin Hüquq siyasəti və dövlət quruculuğu Komitəsinin üzvü Rafael Cəbrayılov borca görə məhkəməyə verilməsi barədə yayılmış xəbərə münasibət bildirib. Rafael Cəbrayılov bu barədə ətraflı danışmayacağını deyib: “Bu tamam başqa məsələdir. O adamla dostam. Xaricə gedəndə hesaba pul qoyulmalıdır ki, gedən adam qayıdıb gələcək. Başqa heç nə danışmaq istəmirəm. Susuram”. R.Cəbrayılov deyib ki, son dövrlərdə ona qarşı ləkələmə kampaniyası gedir: “Təəssüf edirəm ki, bu məqsədə nail olmaq üçün bir sıra jurnalistlərdən də istifadə olunur. Jurnalist araşdırması aparmadan, məsələnin məğzini bilmədən yalnız bir tərəfin verdiyi informasiyanı yaymaq jurnalist fəaliyyətinə ziddir”. Onun sözlərinə görə, son dövrdə tikinti biznesi ilə məşğul olan qardaşları, habelə özü ilə bağlı reallığa uyğun olmayan informasiyalar müxtəlif saytlarda yayılır. R.Cəbrayılov buna görə təəssüfləndiyini bildirib.
Qeyd edək ki, bu, deputatların vəsiqələrinə laqeyd və hörmətsiz yanaşdıqları ilə bağlı yaşanan ilk hal deyil. İllər öncə Brüsseldə bahalı restorana borclu qaldıqları üçün birinin vəsiqəsinin ertəsi gün səhərədək girov qoyulduğu barədə söz-söhbətlər çıxmışdı. Milli Məclisin İntizam Komissiyasının sədri Ağacan Abıyev məsələyə münasibət bildirib: "Hazırda məzuniyyətdəyik, 1 həftədən sonra məzuniyyət başa çatır. Yəqin ki, Rafael Cəbrayılovun deputat vəsiqəsini banka girov qoyması ilə bağlı məsələni məzuniyyətdən qayıdandan sonra müzakirə edəcəyik. Ancaq bununla bağlı əvvəlcə Milli Məclis rəhbərliyi ilə müzakirə aparılmalıdır. Müzakirə aparılandan sonra İntizam Komissiyasının müvafiq qərarı olacaq. Gəlin, hələ tələsməyək. Məzuniyyət bitsin, millət vəkilləri bir araya gəlsin ki, yığılıb müzakirə apara bilək. Əgər Rafael Cəbrayılov belə bir hərəkət edibsə, bu çox səhv addımdır. Girov qoymaq üçün başqa sənədlər var. Şəxsiyyət vəsiqəsi, pasportu girov qoya bilərsən, amma deputat vəsiqəsini girov qoymaq olmaz".
Milli Məclisin deputatının ona verilən vəsiqəni girov qoyması nə dərəcədə düzgündür? İxtisasca hüquqşunas olan millət vəkili Tahir Kərimlinin sözlərinə görə, şəxs növbəti dəfə deputat seçilmədiyi təqdirdə deputatlıq vəsiqəsi ondan geri alınmır: “Əgər deputatın deputatlıq məsələsinə vaxtından əvvəl xitam verilirsə, bu zaman onun deputat vəsiqəsi əlindən alınır. Amma hökm deyil ki, növbəti çağırışda seçilməsə, vəsiqə ondan geri alınsın. Çünki vəsiqə bir çağırış üçün nəzərə tutulub. O biri çağırış zamanı istifadə olunmur. İstənilən adam vəsiqəyə baxanda onun əvvəlki çağırışa aid olduğunu bilir. Bu cür məsələlər bizdə qanunla narahatlıq yaratmır”. Tahir Kərimlinin sözlərinə görə, seçicinin etimadını girov qoymaq olmaz: “Ümumiyyətlə, deputat vəsiqəsini girov qoymaq olmaz. Vəsiqə maddi əhəmiyyət daşımır ki, onu girov qoyasan. Nəinki deputat vəsiqəsini, hər hansı bir görəv vəsiqəsini girov qoymaq olmaz. Bununla bağlı cinayət məsuliyyəti olmasa da, şəxs çox ciddi tənbeh oluna bilər. Çünki deputat vəsiqəsi səni seçən seçicinin etimadıdır. Məsələn, 40 min seçicinin etimadını necə girov qoymaq olar?! Bu qətiyyən doğru deyil”.
Məhəmmədəli QƏRİBLİ
