Əli Kərimlinin Fuadın ailəsinin üstündə qurduğu oyun da baş tutmadı

“Əli Kərimli də, digəriləri də özlərini siyasətçi hesab edirlərsə, Azərbaycan xalqının mentalitetinə, ailə dəyərlərinə hörmət etməli və öz çirkin oyunlarını ailə amili üzərində qurmamalıdırlar”

Məlum olduğu kimi, artıq AXCP-nin sədr müavinliyindən istefa verən  Fuad Qəhrəmanlının ailəsində ciddi problem yaşandığı barədə KİV-də və sosial şəbəkələrdə geniş müzakirə açılıb. F.Qəhrənanlının qızı Selcan Yağmurun sosial şəbəkədə atası barədə yazdığı statusun böyük əks-səda doğurduğu məlumdur.

Qeyd edək ki, S.Yağmurun yazdığı statusda anası və bacısı ilə birlikdə atasından gördüyü şiddətlər öz əksini tapıb. “Bu yazını AXCP sədr müavini Fuad Qəhrəmanlının qızı kimi yox, bir insan kimi yazıram. Çünki “Facebook”u ancaq məzələnmək üçün istifadə edən mən həmişə düşünmüşəm ki, “kimə nə axı mənim şəxsi fikrimdən?” Amma müəyyən sosial məsələlər mənə elə toxunur ki, onlara Selcan kimi yox, bir insan kimi fikir bildirməyi özümə görəv bilirəm.

Onsuz da bu yazını özümü ələ alaraq yazsam, dəhşətli emosional, qəzəbli bir şey çıxacağını bilirəm, çünki içində böyüdüyüm kimi qorxulu bir ailədə böyümək, insanın içinə ifadə etməkdə çətinlik çəkdiyim duyğular yükləyir.

Bir də onu bilirəm ki, bu yazıya görə hətta proqressiv insanlar tərəfindən də qınanacam, “çünki o sənin atandır”. Çünki atam olan adamı, anamın barmaqlarını sındırdığı xatirələri bağışlamalıyam. Çünki o, evə çörək gətirib, məni böyüdüb.

Amma məncə, Azərbaycan siyasətində yetərli bir yeri olan, ana müxalifət partiyasının sədr müavini, tribunalarda insan haqlarından danışan, hətta qadın haqları mövzusunda belə aman verməyən Fuad Qəhrəmanlının da evində qızının dizini, arvadının barmaqlarını sındırmış, şiddətin də xüsusi sadist növünü tətbiq edən bir cani olduğunu demək, mənə elə gəlir ki, sosial borcdur, mənim şəxsi ailəvi problemim deyil...”.

S.Yağmur, hətta F.Qəhrəmanlının övladı olduğundan imtina etdiyini də yazıb.

S.Yağmurun bu statusu ilə bağlı sosial şəbəkələrdə qızğın müzakirələr hazırda da davam edir. Sosial şəbəkələrdə bir sıra insanlar qeyd edirlər ki, Qəhrəmanlılar ailəsində baş verən bu olay öz-özünə yaranmayıb və bu hadisənin gündəmə gətirilməsi təsadüfi deyil. Bu qənaəti bölüşənlər hesab edirlər ki, Qəhrəmanlılar ailəsində baş verən bu olayın ssenari müəllifi radikalların başında duran AXCP sədri Əli Kərimlidir. Sosial şəbəkələrdə və ictimaiyyətdə böyük qınaqla qarşılanan olayın Ə.Kərimli tərəfindən düzənləndiyi meydana çıxır. Siyasətdə heç bir uğur qazana bilməyən Ə.Kərimlinin öz ətrafındakılara qarşı bu cür çirkin oyunlar oynadığını bildirənlərin dediyinə görə, F.Qəhrəmanlının ailəsində baş verənlərdə Ə.Kərimlinin əli var. Onun  özünün çirkli, məkrli siyasi oyunun qurbanına çevirdiyi Qəhrəmanlılar ailəsinə bununla böyük zərbə vurduğunu deyənlər qeyd edir ki, Ə.Kərimlinin bir ailə üzərində qurduğu oyun iflasa uğrayıb. F.Qəhrəmanlının qızı ölkəni tərk edib, F.Qəhrəmanlı özü isə AXCP sədrinin müavini vəzifəsindən istefa verib.

Məsələyə münasibət bildirən Qarabağ Azadlıq Təşkilatının sədri, politoloq Akif Nağı hesab edir ki, özünü siyasətçi sayan bir adamın bir azərbaycanlı ailəsi üzərində öz çirkin niyyətlərini reallaşdırmaq istəməsi qətiyyən qəbuledilən deyil. Ailə məsələsinin həddən artıq həssas məsələ olduğunu deyən A.Nağının sözlərinə görə, deyildiyi kimi, doğrudan da Ə.Kərimli F.Qəhrəmanlının ailəsinə qarşı belə xoşagəlməz oyun oynayıbsa, bu qətiyyən qəbuledilən deyil:”Fuad Qəhrəmanlının ailəsində baş verənlərdə müxtəlif diqqətçəkən amillər var. Siyasətlə məşğul olan insanlar bilməlidir ki, ailə müqəddəsdir və onun ailəsi ilə bağlı yol verdiyi istənilən hərəkət cəmiyyət tərəfindən izlənilir, eyni zamanda da onun hərəkətləri müxtəlif cür yozula və qiymətləndirilə bilər. Hesab edirəm ki, baş verənlər çox üzücü bir hadisədir. İnsan siyasi mübarizə aparırsa, bu, çirkli olmamalıdır, şəffaf olmalıdır. Mən bilmirəm Fuad Qəhrənmanlının ailə olayında Əli Kərimli nə dərəcədə rol oynayıb, oynamayıb, amma bu barədə fikirlər var. Bu deyildiyi kimi, doğrudan da  Əli Kərimlinin qurduğu oyundusa çox eybəcər bir oyundur, qəbuledilməzdir. Düşünürəm ki, ailə məsələsində, milli mental dəyərlərə münasibətdə bütün sərhədlər gözlənilməlidir. Əli Kərimli də, digəriləri də özlərini siyasətçi hesab edirlərsə Azərbaycan xalqının mentalitetinə, ailə dəyərlərinə hörmət etməli və öz çirkin oyunlarını ailə amili üzərində qurmamalıdırlar. Yəni kimliyindən asılı olmayaraq, hər kəsin ailəsi toxunulmazdır və ora kiminsə müdaxilə etməsi yolverilməzdir”.

İradə SARIYEVA