“Yenidən belə “bəyannamələrin” imzalanması Fransada mövcud olan erməni lobbisi vasitəsilə reallaşır”
ATƏT-in Minsk Qrupunun həmsədri olan Fransanın daha bir əyaləti 30 ilə yaxındır ermənilərin işğalı altında olan Dağlıq Qarabağın bir bölgəsi ilə “dostlaşıb”. Belə ki, qondarma separatçı rejimin “xarici işlər” qurumunun erməni nəşrləri vasitəsilə yaydığı məlumatda deyilir ki, “Hadrut rayonu” ilə Fransa Respublikasının İzer departamenti arasında “dostluq bəyannaməsi” imzalanıb: “İmzalanma mərasimi sentyabrın 20-də departamentin mərkəzi olan Qrenobl şəhərində, İzer administrasiyasının konfrans salonunda baş tutub. Sənədi “Hadrut rayonu” administrasiyasının rəhbəri Kamo Petrosyan və İzer departament şurasının sədri Jan-Pyer Barbye imzalayıb. İmzalanma mərasimində “Artsax”ın Fransadakı daimi nümayəndəsi Hovanes Gevorkyan, Ermənistan Respublikasının əyalətdəki vitse-konsulu Qayane Manukyan, departament rəhbərliyinin əməkdaşları, erməni icmasının nümayəndələri və jurnalistlər iştirak edib”.
Qeyd edək ki, İzer Fransanın cənub-şərqində yerləşən Overn-Rona-Alp regionun departamentlərindən biridir. İnzibati mərkəzi Qrenobldur . Əhalisi 1 milyon 233 min 759 nəfərdir. Məlumat üçün qeyd edək ki, sovet dövründə keçmiş Dağlıq Qarabağ Muxtar Vilayəti tərkibində olan Hadrut rayonu (mərkəzi Hadrut qəsəbəsi) 1991-ci ildə Azərbaycan Respublikası Ali Sovetinin qərarı ilə ləğv edilərək inzibati cəhətdən Xocavənd rayonuna birləşdirilib. O da məlumdur ki, bu il mayın 29-da Fransanın Serji-Pontuaz İcma Məhkəməsi, iyunun 11-də isə Qrenoblun İnzibati Məhkəməsi Dağlıq Qarabağdakı ermənilərə ciddi zərbə vurub. Belə ki, fransız şəhərləri ilə qarabağlı ermənilər arasındakı "dostluq xartiyaları”nı qanunsuz sayaraq ləğv edib. Maraqlıdır, Fransanın bəzi əyalətlərinin bundan nəticə çıxarmamaları nə deməkdir?
Sözügedən məsələni baki-xeber.com-a şərh edən politoloq Məhəmməd Əsədullazadənin sözlərinə görə, ermənilərin həyasızlığı fonunda bəzi Fransa departamentlərinin bu addımı təəssüf doğurur: “Bir müddət bundan əvvəl Fransa senatının bir neçə üzvü Azərbaycanın işğal olunmuş ərazilərinə səfər edib. Bu səfər əsnasında işğal olunmuş rayonlarımızla Fransanın bir neçə şəhəri arasında separatçıların avantürası ilə dostluq müqavilələri imzalanıb. Bu qanunsuz müqavilələr bir müddət bundan əvvəl Fransa məhkəmələri tərəfindən ləğv edildi. Göründüyü kimi, erməni avantürası hələ də öz niyyətlərindən əl çəkənə oxşamır. Yenidən belə “bəyannamələrin” imzalanması Fransada mövcud olan erməni lobbisi vasitəsilə reallaşır. Rəsmi Bakı və Fransadakı səfirliyimiz mütləq şəkildə belə qanunsuzluqların qarşısını almalıdır. Fransanın bu siyasəti birbaşa münaqişənin həllinə mənfi təsir edir. Hesab edirəm ki, Fransa bununla regionda öz ədalətli yanaşma mexanizminə zərbə vurmuş olur. Rəsmi Paris separtizmə göz yumarsa, bu onun üçün də baş verə bilər. Fransa unutmamalıdır ki, Korsika bölgəsi var. Həmin bölgə Fransadan ayrılmaq üçün zama-zaman cəhd edir. Ona görə də Fransa erməni separatizminə qarşı olmaqdansa buna dəstək verəcəksə özü bununla üzləşəcək. Ermənistan rəhbərliyi qondarma qurumu beynəlxalq miqyasda tanıda bilməyəcək və Azərbaycan mütləq ərazilərini işğaldan azad edəcək. Ümid edirəm ki, Fransa məhkəmələri sözügedən “dostluq bəyannaməsi”ni ləğv edəcək”.
Vidadi ORDAHALLI
