“Təəssüflər olsun ki, dünyada mövcud olan ikili standartlar bu acı reallığı sorğu-sual etməyə imkan vermir”
“Ermənistanda çoxlu azərbaycanlı əsir var”. Erməni KİV-ləri xəbər verir ki, bunu dünən Ermənistan Müdafiə naziri Davit Tonoyan livanlı həmkarı Eilas Bu Saab ilə jurnalistlərə açıqlamasında bildirib. Dilqəm Əsgərov və Şahbaz Quliyevin Karen Kazaryan və Araik Kazaryanla mübadilə edilməsinə Azərbaycan tərəfinin hazır olması barədə Dövlət Komissiyasının növbəti dəfə aidiyyəti beynəlxalq təşkilatlara rəsmi məlumat verməsi barədə məlumata toxunan Tonoyan qeyd edib ki, onlar Beynəlxalq Qırmızı Xaç Komitəsi ilə bu məsələni müzakirə edirlər və heç nə istisna edilmir. Azərbaycanda üçüncü bir erməni əsirin olması ilə bağlı səsləndirilən absurd fikirlərə isə Davit Tonoyan belə cavab verib: “Bizdə də çoxlu azərbaycanlı əsir var”. Adətən Ermənistan indiyə qədər rəsmən bəyan edirdi ki, bu ölkədə azərbaycanlı əsir yoxdur. Guya Ermənistan tərəfi 1998-ci ildə bütün azərbaycanlı əsirləri qarşı tərəfə təhvil verib. Söhbət Birinci Qarabağ müharibəsində əsir və girov götürülən, amma Ermənistan tərəfindən gizlədilən şəxslərdən gedir. Əsir və itkin düşmüş, girov götürülmüş vətəndaşlarla əlaqədar Dövlət Komissiyasında Ermənistan-Azərbaycan münaqişəsi nəticəsində itkin düşmüş şəxs kimi qeydə alınanlarların sayı 3888 nəfərdir. Haqqında Dövlət Komissiyasına əsir-girov götürülməsi barədə məlumatlar daxil olmuş şəxslər isə hazırda 871 nəfər təşkil edir. Bütün bu deyilənlərin fonunda, Tonayanın məlum açıqlaması Ermənistanda çoxsaylı azərbaycanlı əsirin saxlanmasının rəsmi etirafı sayıla bilərmi? Məsələyə münasibət bildirən Azərbaycanlı Əsir və Girovlarla bağlı Məlumat Mərkəzinin koordinatoru Əhməd Şahidovun sözlərinə görə, Tonayanın bu açıqlaması Ermənistanda çoxsaylı azərbaycanlı əsir və girovun olmasının təstiq olunması deməkdir: “Qarabağ münaqişəsi başlayandan Azərbaycanda rəsmi şəkildə qeydə alınan 3888 nəfər əsir, girov və itkin düşmüş vətəndaş var. Onlardan hələ də heç bir dəqiq məlumat yoxdur. Azərbaycan tərəfi bu illər ərzində dəfələrlə beynəlxalq təşkilatlara müraciət edib ki, beynəlxalq müşahidə missiyası yaradılsın. Onlar işğal altındakı ərazilərə gedib itkin düşən şəxslərlə bağlı araşdırma aparsınlar. Lakin Ermənistan hər dəfə bu təklifləri rədd edirdi. Beynəlxalq missiyanı nə işğal altındakı ərazilərə, nə də Ermənistan torpaqlarına buraxırdı. Ermənistan tərəfi hər dəfə bəyan edirdi ki, onlarda azərbaycanlı əsir və girov yoxdur. Guya onlar bütün əsir və girovları təhvil veriblər. 2014-cü ilin iyulunda Dilqəm Əsgərov, Şahbaz Quliyev götürüldükdən sonra bu məsələ bir daha dünya ictimaiyyətinin gündəminə gətirildi. Artıq həmin ildən sonra Ermənistan onlarda azərbaycanlı əsir və girovların olduğunu təkzib edə bilmədi. Bununla belə, zaman-zaman qeyri-rəsmi məlumatlar daxil olur ki, azərbaycanlı əsir və girovlar Ermənistanda və işğal olunmuş Dağlıq Qarabağda ağır şəraitdə işlədilir. Hətta qeyri-qanuni orqan transplantasiyasında onlardan insan alveri qurbanı kimi istifadə edilir. Davit Tonoyanın bu açıqlaması əslində acı gerçəkliyin etiraf olunması deməkdir. Hesab edirəm ki, bu, beynəlxalq insan hüquqları təşkilatlarının diqqətini çəkməlidir. Təəssüflər olsun ki, dünyada mövcud olan ikili standartlar bu acı reallığı sorğu-sual etməyə imkan vermir. Ancaq buna baxmayaraq, Azərbaycan əsir və girovlarla bağlı fəaliyyətini davam etdirir”.
Vidadi ORDAHALLI
