19/09/2019 17:26
728 x 90

Ermənistandan pul axını başladı, ölkəyə pul gətirmək siyasəti tam iflasda...

Əli Orucov: “Bunun başlıca səbəblərindən biri insanların, biznes adamlarının ölkənin gələcəyinə olan inamsızlığı ilə bağlıdır”

img

“Proses belə davam edərsə, yaxın müddətdə Ermənistanda çox ciddi mailiyyə...”

Nikol Paşinyan Ermənistanda baş nazir olandan sonra başlıca vədlərindən biri xaricdən ölkəyə sərmayə cəlb edəcəyi ilə bağlı idi. O vəd edirdi ki, yaradılacaq azad investisiya mühütü ölkəyə kapital axınını sürətləndirəcək. Ancaq ən son statistik rəqəmlər bunun tam əksini göstərir. Məsələ ondadır ki, 2019-cu ilin iyununda ötən ilin uyğun dövrü ilə müqayisədə Ermənistandan pul köçürmələri iki dəfə artaraq 126 milyon 400 min dollar təşkil edib. Ölkəyə xaricdən pul axını isə hesabat dövründə 1,4 faiz azalıb. Ermənistandan Rusiyaya pul köçürmələri 7 faiz, ABŞ-a isə 2,4 dəfə artıb. Ölkədən xarici valyutanın çıxması sosial-iqtisadi vəziyyətin inkişafını əngəlləyən başlıca faktordur. Bundan başqa, təbii resurslardan asılılığın azaldılması istiqamətində görülməsi gərəkən işlər real görünmür. Çünki ciddi xarici kapital olmadan bu mümkün deyil. O üzdən, bunun reallığa çevrilməsi mümkünsüz görünür. Görünən odur ki, ötən müddət ərzində Paşinyan hakimiyyətinin xaricdən sərmayə cəlb etmək səyləri fiaskoya uğrayıb. Əksinə, ölkədən kənara kapital axını sürətlənib.

Sözügedən məsələ ilə bağlı fikirlərini “Bakı-Xəbər”lə bölüşən AMİP funksioneri Əli Orucovun sözlərinə görə, Paşinyanın siyasəti yalan və populizm üzərində qurulub: “Onun hakimiyyətə gəlişi də məhz bu amillərlə bağlıdır. O, ermənilərə cənnət, sürətli iqtisadi inkişaf, beynəlxalq aləmin nüfuzlu subyektlərindən biri olacaqlarına dair yalançı vədlər verirdi. Ancaq nə baş verdi? Hər keçən gün üçün bütün bunların tam tərsi müşahidə edilməkdədir. Erməni cəmiyyəti artıq anlamağa başlayıb ki, Paşinyan ölkəni uçuruma aparır. Rusiya ilə yaşanan soyuqluq, Qərbin baş nazirə inamsızlığı Ermənistanın faktiki təklənməsinə aparır. Əvvəllər beynəlxalq erməni diasporu və lobbisi, həmçinin Rusiyada yaşayan ermənilər Ermənistana yüz milyonlarla pul köçürürdülər. Rəsmi statiskaya görə, Rusiyadan və diasporadan Ermənisatana təxminən 1 milyard dollara yaxın pul köçürülüb. Bu məbləğ Ermənisatnın 3 milyard 160 milyon dollar olan dövlət büdcəsinin təxminən 1/3-i deməkdir. Demək, işğalçı dövlətin maliyyəsi, dövlət büdcəsinin böyük bir həcmi xaricdən asılıdır. Lakin son dövrlər pul axını Ermənistandan xaricə yönəlib. Bunun da başlıca səbəblərindən biri insanların, biznes adamlarının Ermənistanın gələcəyinə olan inamsızlığı ilə bağlıdır. Ona görə də əlində az-çox varidatı və vəsaiti olanlar bunu qısa zaman kəsiyində xaricə, daha təhlükəsiz yerə daşımaqla itkilərdən qaçmağa çalışır. Proses belə davam edərsə, yaxın müddətdə Ermənistanda çox ciddi mailiyyə, iqtisadi, sosial və ardınca isə siyasi böhran yaşanması qaçınılmaz olacaq. Mən güman etmirəm ki, Paşinyan höküməti Ermənistanı xilas edə bilsin. Məhz bu böhran siqnallarıdır ki, Ermənistan hakimiyyəti diqqəti yayındırmaq və günahkarları kənarda axtarmaq şansı əldə etmək üçün Qarabağla bağlı pafoslu, təxribat xarakterli bəyanatlar verir, təhrikçi addımlar atır”.

Vidadi ORDAHALLI

Son xəbərlər