Bu gün Azərbaycan Prezidenti İlham Əliyevin ad günüdür.
İlham Heydər oğlu Əliyev 1961-ci il dekabrın 24-də Bakı şəhərində anadan olub. 1977-ci ildə Moskva Dövlət Beynəlxalq Əlaqələr İnstitutuna daxil olub. Oranı bitirdikdən sonra, 1982-ci ildə İnstitutun aspiranturasına qəbul olub. 1985-ci ildə dissertasiya müdafiə edərək tarix elmləri namizədi dərəcəsi alıb.
1985-1990-cı illərdə Moskva Dövlət Beynəlxalq Əlaqələr İnstitutunda müəllim işləyib.
1991-1994-cü illərdə özəl biznes sahəsində çalışıb və bir sıra istehsalat-kommersiya müəssisələrinə rəhbərlik edib.
1994-cü ildən 2003-cü ilin avqust ayınadək Azərbaycan Respublikası Dövlət Neft Şirkətinin vitse-prezidenti, sonra isə birinci vitse-prezidenti olub. "Heydər Əliyevin neft strategiyası"nın həyata keçirilməsində fəal iştirak edib.
İki dəfə - 1995-ci və 2000-ci illərdə Azərbaycan Respublikasının Milli Məclisinə seçilib.
2003-cü ildə Azərbaycan Respublikasının Baş naziri vəzifəsinə təyin edilməsi ilə əlaqədar olaraq deputat səlahiyyətlərinə xitam verilib.
1997-ci ildən Azərbaycan Milli Olimpiya Komitəsinin prezidentidir (2016-cı ildə dövlət başçısı bu vəzifəyə yenidən seçildi).
1999-cu ildə hakim Yeni Azərbaycan Partiyasının sədr müavini, 2001-ci ildə sədrin birinci müavini, 2005-ci ildə isə partiyanın sədri seçilib.
2001-2003-cü illərdə Avropa Şurası Parlament Assambleyasında (AŞ PA) Azərbaycan Respublikası Milli Məclisinin nümayəndə heyətinin rəhbəri olub.
2003-cü ilin yanvar ayında Avropa Şurası Parlament Assambleyasının sədr müavini, AŞ PA-nın Büro üzvü seçilib.
2003-cü il avqustun 4-də Milli Məclis tərəfindən təsdiq edildikdən sonra Azərbaycan Respublikasının Baş naziri təyin edilib.
2003-cü il oktyabrın 15-də Azərbaycan Respublikasının Prezidenti seçilib. Prezident seçkilərində seçicilərin 76 faizindən çoxu İlham Əliyevin lehinə səs verib. 2003-cü il oktyabrın 31-də vəzifəsinin icrasına başlayıb.
2008-ci il oktyabrın 15-də keçirilən seçkilərdə seçicilərin 88,73% səsini qazanan İlham Əliyev ikinci dəfə Azərbaycan Respublikasının Prezidenti seçilib. 2008-ci il oktyabrın 24-də vəzifəsinin icrasına başlayıb.
2013-cü il oktyabrın 9-da İlham Əliyev seçicilərin böyük əksəriyyətinin səsini (84,54 faiz) toplayaraq beş il müddətinə Azərbaycan Respublikasının Prezidenti seçilib. Oktyabrın 19-da vəzifəsinin icrasına başlayıb.
2016-cı ilin aprelində qəhrəman Azərbaycan Ordusu Silahlı Qüvvələrin Ali Baş Komandanı, Prezident İlham Əliyevin rəhbərliyi altında erməni işğalçılarına sərt cavab verdi. İşğalçılardan böyük ərazini azad edən və ölkə tarixinə daha bir şanlı səhifə yazan ordumuz bütün dünyaya Azərbaycanın gücünü və nə olursa-olsun, işğal olunmuş torpaqları azad etmək niyyətini nümayiş etdirdi. Bu hadisələr son illərdəki vəziyyəti birdəfəlik dəyişdi və Dağlıq Qarabağ münaqişəsinin nizamlanmasında status-kvonun saxlanmasının qəbuledilməz olduğunu təsdiq etdi.
Azərbaycan xalqı 2016-cı ilin sentyabrında Konstitusiyaya dəyişikliklərlə bağlı referendumda səs verərək Prezident İlham Əliyevin Azərbaycanın siyasi və iqtisadı sabitliyinin təminatı olan təşəbbüsünü dəstəklədi. 2017-ci ildə Azərbaycan iqtisadiyyatı, o cümlədən qeyri-neft sektoru növbəti inkişaf mərhələsinə qədəm qoydu. Ötən ilin dekabrında Prezident İlham Əliyevin təsdiq etdiyi, icrasına bu il başlanılan 12 strateji yol xəritəsi 2025-ci ilədək ölkənin iqtisadi inkişafı üzrə yeni strategiyanın əsasını qoydu.
Cari ildə Avropa İttifaqı ilə yeni tərəfdaşlıq sazişinin imzalanması üzrə danışıqların başlanması, Asiya və Avropa arasında yükdaşımalar üçün ən qısa və etibarlı yol olan Bakı-Tiflis-Qars dəmir yolunun istismara verilməsi, “Əsrin müqaviləsi”nin müddətinin 2050-ci ilədək artırılması, Avropanın enerji təhlükəsizliyini təmin edəcək “Cənub Qaz Dəhlizi”, o cümlədən TANAP və TAP boru kəmərlərinin inşası layihələrinin icrasının uğurla davam etdirilməsi Azərbaycanın 2017-ci ildə əldə etdiyi mühüm nailiyyətlər sırasındadır. Bütün bunlar Prezident İlham Əliyevin uzaqgörən siyasətinin nəticəsidir.
Prezident İlham Əliyevin 2017-ci ili Azərbaycanda “İslam Həmrəyliyi ili” elan etməsi çərçivəsində ölkədə bir sıra iri beynəlxalq tədbirlər, o cümlədən IV İslam Həmrəyliyi Oyunları uğurla təşkil edildi.
Bundan başqa, noyabrın 24-də Avropa İttifaqının Şərq Tərəfdaşlığı sammitində üzv ölkələrin ərazi bütövlüyü və suverenliyini dəstəkləyən bəyannamənin qəbul edilməsi Azərbaycan xarici siyasətinin mühüm uğuru oldu. Bunun məntiqi davamı kimi dekabrın 13-də Avropa Parlamenti "Avropa İttifaqının xarici siyasət və təhlükəsizlik haqqında qətnaməsi"ni qəbul etdi. Bu sənəd Aİ-nin Şərq Tərəfdaşlığı ölkələrinin beynəlxalq səviyyədə tanınmış sərhədləri daxilində ərazi bütövlüyünü dəstəkləməyə dair öhdəliklərinə sadiq olduğunu ilk dəfə təsdiqlədi.
"Bakı Xəbər" qəzetinin kollektivi Prezident İlham Əliyevi ad günü münasibətilə səmimi qəlbdən təbrik edir.
