Vəfa Heydərli: "Belə təcrübənin mənimsənilməsi digər ölkələr üçün böyük fayda verə bilər"
Prezident İlham Əliyev Saatlıda pambıqçılığın inkişafı məsələlərinə dair respublika müşavirəsində deyib ki, Azərbaycanda sabitlik təmin olunur: "Sabitliyin təminatçısı Azərbaycan xalqıdır. Azərbaycan həm bölgədə, həm dünyada öz siyasəti ilə seçilir".
Dövlət başçısı bildirib ki, Azərbaycanda təhlükəsizlik tədbirləri təmin edilir, ictimai proseslər müsbət istiqamətdə gedir, vətəndaş həmrəyliyi möhkəmlənir, iqtisadi inkişaf, regionların inkişafı sürətlə gedir: "Biz bu gün bir nümunə göstəririk - ölkəni necə idarə etmək lazımdır. Biz bu nümunəni göstəririk və əlbəttə ki, bu siyasət xalq tərəfindən də bəyənilir, dəstəklənir. Gələcək planlarımızın reallaşdırılması üçün bu, əsas amildir. Xalq-iqtidar birliyi hər bir ölkənin uğurlu inkişafını şərtləndirən əsas amildir.
Bizim uğurlu iqtisadi siyasətimiz, regionların inkişafı və yeni təşəbbüslər, islahatlar, əminəm ki, dayanıqlı inkişafı təmin edəcək. Bu yaxınlarda bir çox sahə üzrə strateji yol xəritələri tərtib olunub, dərc edilib. İctimaiyyət artıq bunu bilir. Hər bir sahə üzrə konkret proqramlar var və biz bu proqramlar əsasında işləyirik və işləyəcəyik".
Prezident İlham Əliyev Azərbaycanın idarə olunmasını örnək göstərməklə hansı modelə işarə etmiş olub?
Politoloq Vəfa Heydərli qəzetimizə bildirdi ki, ölkə başçısı bu açıqlaması ilə Azərbaycanın öz modelinə işarə edib: "Doğrudan da çoxları buna təəccüblənir. Haqlı olaraq düşünürlər ki, qaynar bir regionda yerləşən ölkədə stabillik yüksək səviyyədə necə təmin olunur? Bəli, bu sualın cavabını məhz Azərbaycanın idarəetmə modelində tapmaq olar. Ölkəmizdə təhlükəsizlik yüksək səviyyədə təmin edilir. Əhalinin sosial rifah halı qənaətbəxşdir. Xarici siyasət kursunda balanslı siyasət yürütməyimiz səbəbindəndir ki, işğalaçı Ermənistan istisna olmaqla, digər qonşularımızla normal münasibətlərə malikik. Ordu quruculuğu sahəsində irəliləyişlərimiz göz qabağındadır. Regionlarımız yüksək səviyyədə inkişaf edir. Ölkəmizdə yaradılan infrastruktur burada ən böyük idman yarışlarının keçirilməsinə imkan verir. Prezident çox doğru olaraq qeyd edib ki, bütün bu siyasət xalq tərəfindən dəstəklənir. Bu belə olmasaydı, indiyə qədər keçirilən bütün seçkilərin favoriti YAP olmazdı. Hesab edirəm ki, bu modelin adı elə bizim ölkə ilə bağlıdır. Belə təcrübənin mənimsənilməsi digər ölkələr üçün böyük fayda verə bilər".
Məhəmmədəli QƏRİBLİ
