Elçin Mirzəbəyli: "Bu cür siyasi, dini, mədəni birlik, qardaşlıq belə qarışıq məqamda hədəfləri düzgün müəyyən etməyə..."
Bu günlərdə Azərbaycan Mətbuat Şurasında ölkəmizdə səfərdə olan bir qrup türkiyəli jurnalistlə görüş keçirilib. Mətbuat Şurasının sədri, millət vəkili Əflatun Amaşov bildirib ki, bu cür görüşlər Azərbaycan və Türkiyə mediası, iki ölkə arasındakı münasibətlərin daha da dərinləşməsində müstəsna rol oynamaqla yanaşı, ümumilikdə, türk dünyasının konsolidasiyası ilə bağlı proseslərə də mühüm töhfə verməkdədir.
Görüşdə Ə.Amaşov onu da qeyd edib ki, Azərbaycan Mətbuat Şurası ümumən İran, Rusiya və Gürcüstan daxil olmaqla, ümumilikdə, bölgə jurnalistlərinin görüşünü təşkil etməyi planlaşdırır. Bu görüşün reallaşmasında Türkiyə mediası ilə qarşılıqlı təşəbbüskarlıq mühüm əhəmiyyət daşıyacaq.
İlk növbədə qeyd edək ki, hazırda ölkəmizdə dünyanın nüfuzlu xəbər istehsalçıları ilə əməkdaşlıq edən xeyli sayda KİV orqanı fəaliyyət göstərir və Azərbaycan KİV-nin, media qurumlarının beynəlxalq əlaqələri qənaətbəxşdir. Azərbaycanın dünya miqyasında nüfuzunun artmasında jurnalistlərin beynəlxalq əlaqələrinin də özünəməxsus rolu var. Əməkdaşlıq çərçivəsində bir sıra ölkələrin media nümayəndələri Azərbaycana səfərlər edir. Eləcə də bizim jurnalistlər bir sıra beynəlxalq tədbirlərdə iştirak edərək, onların təcrübəsindən yararlanmağa çalışır. Təbii ki, bu səfərlər dövlətlər arasında münasibətlərdə də öz sözünü deyir. Media ekspertləri də hesab edir ki, dünyanın aparıcı KİV-i və media qurumları ilə paralel olaraq region ölkələri ilə də yaxından əlaqə qurmaq vacibdir.
Ümumilikdə, belə bir görüşün keçirilməsinin region ölkələri arasında əlaqələrin genişlənməsi baxımından əhəmiyyətini ekspertlər necə dəyərləndirir?
"Xalq Cəbhəsi" qəzetinin baş redaktoru Elçin Mirzəbəyli buna bir neçə prizmadan yanaşır. Onun fikrincə, qardaş Türkiyənin jurnalistləri ilə münasibətlərimiz qaneedici səviyyədədir: "Bu əməkdaşlıq çərçivəsində bir sıra tədbirlər keçirilib və bundan sonra da keçiriləcək. Hətta vaxtilə türk dövlətlərinin əməkdaşlığı ilə bağlı bir platforma vardı. Rusiya jurnalistləri ilə daha çox Azərbaycanda nəşr olunan rusdilli media nümayəndələrinin əlaqələri var. İranla isə münasibətlərimiz bir o qədər geniş deyil. Bunun da obyektiv səbəbləri var. Ümumilikdə, keçirilən görüşlər çərçivəsində informasiya mübadiləsi baxımından əməkdaşlıq münasibətləri qurmaq olar. Amma onu da deyim ki, şəxsən öz adıma, Azərbaycan jurnalistləri ilə İran və Rusiya jurnalistlərinin bir araya gəlməsinin əhəmiyyətli bir addım olacağına inanmıram. Biz onlarla hər nə qədər sıx əməkdaşlıq edib, daimi görüşlər keçirsək belə, onların Azərbaycana qarşı qərəzli mövqelərinin dəyişəcəyini gözləmirəm. Çünki həmin ölkələri təmsil edən jurnalistlərin Azərbaycana münasibəti öz ölkələrinin yeritdiyi siyasətdən qaynaqlanır. Bəlkə də axtarsaq, Rusiyada Azərbaycan haqqında ədalətli və qərəzsiz informasiya yazan media resursu və ya jurnalist tapmaq olar. Amma İranla bağlı eyni fikirləri bölüşmürəm. Türkiyə jurnalistlərinə gəldikdə isə, bu cür səfərlərin mütəmadi və sistemli hal almasını bugünkü qarışıq dünyada çox vacib hesab edirəm. Bu cür siyasi, dini, mədəni birlik, qardaşlıq belə qarışıq məqamda hədəfləri düzgün müəyyən etməyə, problemlərimizi və uğurlarımızı vahid gücə çevirərək hədəflərimizə çatmaq istiqamətində səyləri artırmağa xidmət edir".
Vidadi ORDAHALLI
