Azərbaycan Mətbuat Şurasında ölkəmizdə səfərdə olan bir qrup türkiyəli jurnalistlə görüş keçirilib. Qonaqları salamlayan MŞ sədri, Milli Məclisin deputatı Əflatun Amaşov bildirib ki, Azərbaycan və Türkiyə arasında formalaşmış qardaşlıq və dostluq münasibətləri qədim tarixi köklərə malikdir. Hər iki ölkənin mediası bu münasibətlərin daha da dərinləşməsində müstəsna rol oynamaqla yanaşı, ümumilikdə türk dünyasının konsolidasiyası ilə bağlı proseslərə də mühüm töhfə verməkdədir.
İndiyədək Türkiyə və Azərbaycan jurnalistlərinin iştirakı ilə çoxsaylı toplantıların təşkil edildiyini diqqətə çatdıran Ə.Amaşov həmçinin vurğulayıb ki, qarşılıqlı media əməkdaşlığında mühüm halqanı ortaq həqiqətlərimizin təbliği təşkil edir. "Biz eyni zamanda beynəlxalq miqyasda söz və ifadə azadlığı ilə bağlı məsələlərə də həssas yanaşmalıyıq. Çünki çox zaman bu istiqamətdə sui-istifadələrin şahidi oluruq. Türkiyə və Azərbaycana qarşı heç də birmənalı münasibət yoxdur. Hollandiyanın yol verdiyi qeyri-etik hərəkət, üstəlik ölkədə türklərə qarşı həyata keçirilmiş zorakılıq aktları bunu bir daha təsdiqlədi. Düşünürəm ki, media orqanlarımız bu reallıqdan çıxış etməlidir", - deyən Ə.Amaşov onu da əlavə edib ki, Azərbaycan Mətbuat Şurası İran, Rusiya və Gürcüstan daxil olmaqla ümumilikdə bölgə jurnalistlərinin görüşünü təşkil etməyi planlaşdırır. Bu görüşün reallaşmasında Türkiyə mediası ilə qarşılıqlı təşəbbüskarlıq mühüm əhəmiyyət daşıyacaq.
Türkiyəli media təmsilçilərinin ölkəmizə səfərinin təşəbbüskarı olan Milli Məclisin deputatı Qənirə Paşayeva bildirib ki, Türkiyə və Azərbaycan arasındakı çoxtərəfli əməkdaşlıq örnək səciyyə daşıyır və bu, media müstəvisində həyata keçirilən tədbirlərlə, yeni birgə fəaliyyət mexanizmləri ilə də zənginləşməlidir. Bu baxımdan o, türkiyəli jurnalistlərin Azərbaycana səfərinin məhsuldar olacağına inandığını deyib.
Antalya Qəzetəçilər Cəmiyyəti və Akdeniz Qəzetəçilər Federasiya başqanı Mevlut Yeni çıxışında bildirib ki, ümumən türk toplumuna qarşı beynəlxalq miqyasda ayrıseçkilik siyasəti hökm sürür. Media bu sayaq xoşagəlməz fəaliyyətə qarşı tutarlı alternativ ortaya qoymalıdır. Bu baxımdan Azərbaycan və Türkiyənin media qurumlarının reallaşdırmalı olduqları birgə təşəbbüslər kifayət qədərdir. Azərbaycan Mətbuat Şurası ilə əməkdaşlığın da belə bir vacib vəzifənin icrasına köklənəcəyindən əminliyini ifadə edən türkiyəli qonaq ölkəmizə səfərdən məmnunluğunu bildirib.
Bundan sonra Azərbaycan Mətbuat Şurası ilə Türkiyəli media nümayəndələri arasında Əməkdaşlıq Memorandumu imzalanıb. Memoranduma ölkəmizdən MŞ sədri Ə.Amaşov Türkiyə tərəfdən isə Antalya Qəzetəçilər Cəmiyyəti və Akdəniz Qəzetəçilər Federasiya başqanı,iler Konfederasyonu Genel Başkan Yardımcısı Mevlut Yeni, Burdur Qəzetəçilər Cəmiyyəti başqanı Kürşat Tuncel, Yenigün-Akdeniz Qəzetəçilər Federasiya Genel başkan yardımçısı, Akdəniz Qəzetə Sahibləri Dərnəyi başqanı Ahmet Duran Yenigün, Akdeniz Qəzetəçilər Federasiya Yönetim Kurulu üzvü Ali Buldu, Antalya Qəzetəçilər Cəmiyyəti başqan yardımçısı İdris Taş, Akdəniz Qəzetəçilər Federasiya Genel başqan yardımçısı, Osmaniyyə Qəzetəçilər Cəmiyəyti başqanı Ali Cihangir, Antalya Qəzetəçilər Cəmiyyəti başqan yardımçısı Mustafa Taş imza atıb. Tərəflər Memorandumu imzalamaqla təmsil olunduqları media quruluşlarının fəaliyyət dairəsi və imkanları çərçivəsində dünyada, eləcə də regionda söz və ifadə azadlığı müstəvisində meydana çıxan tendensiyaları izləməyi, bu xüsusda nəzərə çarpan neqativ meyllərə qarşı birgə və ayrılıqda reaksiya verməyi, Azərbaycan və Türkiyənin ortaq dəyərlərinin, həqiqətlərinin təbliği istiqamətində iş aparmağı, türk dünyasındakı media qurumlarının bir-biri ilə daha sıx şəkildə əlaqələr qurmasına, hər iki ölkə jurnalistlərinin iştirak edəcəkləri birgə simpoziumların, konfransların, "dəyirmi masa"ların təşkilinə dəstək göstərməyi, qarşılıqlı informasiya mübadiləsi prosesini daha da gücləndirməyi üzərlərinə götürüblər.
Görüşdə çıxış edən MŞ sədrinin müavini, Beynəlxalq Avrasiya Mətbuat Fondunun rəhbəri Umud Rəhimoğlu bildirib ki, Azərbaycan və Türkiyənin media təmsilçilərinin xüsusən də söz və ifadə azadlığı, insan hüquqları mövzusunda beynəlxalq miqyasda nüfuza malik təşkilatların düzənlədiyi toplantılarda daha aktiv olmaları vacibdir. Çünki çox zaman məhz həmin təşkilatların xəttilə yanlış ictimai rəy formalaşır. Bunun qarşısını almaq üçün birgə müzakirələrin təşkili olduqca önəmlidir.
MŞ İdarə Heyətinin üzvü, Azərbaycanlıların və Digər Türkdilli Xalqların Əməkdaşlıq Mərkəzinin sədri İlham İsmayıl deyib ki, böyük coğrafi arealı əhatə edən türk dünyası xalqlarının bir-birinə daha sıx şəkildə inteqrasiyası eyni zamanda strateji əhəmiyyət daşıyan məsələdir. Bu prosesdə Azərbaycan və Türkiyənin rolu yüksəkdirsə, bu ölkələrin media orqanlarının fəaliyyəti də daha zəruridir.
Görüşdə qarşılıqlı maraq doğuran bir sıra məsələlər ətrafında geniş fikir mübadiləsi aparılıb, xatirə hədiyyələri təqdim olunub.
Xəbər xidməti
