Qəzetimizin 14 mart sayında Naxçıvan MR Standartlaşdırma, Metrologiya və Patent üzrə Dövlət Komitəsi Mətbuat Xidmətinin "Naxçıvan" adından qanunsuz istifadə etməklə Bakıda saxta ət məhsulları istehsal edən iki fiziki şəxsin ifşa edildiyi barədə rəsmi məlumatını dərc edəndən sonra "Bakı-Xəbər"in elektron poçtuna bizi məhkəmə ilə hədələyən məktub gəlib.
Məktub müəllifi kimi təqdim olunan Səyyad Nabatov adlı şəxs (naxçivandadi@mail.ru) bizi məhkəmə ilə hədələməklə bərabər, əsaslandırmağa çalışır ki, onların istehsalı mövcud qanunlara tam uyğundur. Təki belə olsun. Təbii ki, bunun həqiqətdə necə olduğunu qəzet olaraq biz də aydınlaşdırmağa çalışacağıq. İndi isə "Bakı-Xəbər" qəzeti və baki-xeber.com saytı olaraq sözügedən məktubun redaksiyamıza bayramqabağı son iş gününün axır saatlarında daxil olduğunu və bu üzdən onun üzərində geniş dayanmaq imkanımızın olmadığını, eləcə də bütün yazılarımızda KİV haqda qanunlara, Mətbuat Şurasının "peşə etikası" qaydalarına tam əməl etməyə çalışdığımızı bir daha bildiririk.
Əlavə edirik ki, etiraz məktubu ilə bağlı mövzuya Novruz bayramı fasiləsindən sonra, martın 27-də yenidən geniş şəkildə qayıdacağıq.
Onu da deyək ki, mətbu fəaliyyətimizdə qanunlara və "peşə etikasına" əsaslandığımız üçün, mövzu ilə bağlı mümkün məhkəmə perspektivlərindən heç bir çəkinəcəyimiz yoxdur.
Baki-xeber.com
