Üzeyir Cəfərov: "Bu ordenin indiyə qədər verilməməsinin səbəbi odur ki..."
Akif Nağı: "Aprel döyüşlərində iştirak edib şücaət göstərənlər arasında bu ordenə layiq zabitlərimiz var"
Azərbaycanın dövlətçilik və hərb tarixində Şah İsmayıl Xətainin xüsusi yeri var. Azərbaycan dövləti görkəmli dövlət xadiminin xatirəsinin əbədiləşdirilməsinə hər zaman böyük dəyər verib.
"Şah İsmayıl" ordeni 1993-cü ilin 6 dekabr tarixində təsis edilib. Orden səkkizguşəli ulduz şəklindədir və gümüşdəndir.
Qeyd edək ki, əsasnaməsinə görə, Azərbaycan Respublikasının ali hərbi ordeni olan "Şah İsmayıl" ordeni ilə Azərbaycan Respublikası Silahlı Qüvvələrinin ali zabitləri, hərbi hissələrin və birləşmələrin komandirləri təltif edilir.
Bildirək ki, "Şah İsmayıl" ordeni Azərbaycan Respublikası Silahlı Qüvvələrinin təşkilində və möhkəmləndirilməsində, Azərbaycan Respublikasının ərazi bütövlüyünün və təhlükəsizliyinin təmin edilməsində, respublikada fövqəladə halların nəticələrinin aradan qaldırılmasında xüsusi xidmətlərinə, görkəmli sərkərdəlik fəaliyyətinə görə verilir.
Onu da vurğulayaq ki, "Şah İsmayıl" ordeni döşün sol tərəfinə, Azərbaycan Respublikasının digər orden və medalları olduqda "İstiqlal" ordenindən sonra taxılır.
Azərbaycanın ali hərbi ordeni olan "Şah İsmayıl" ordeni uzun illər bundan əvvəl təsis olunmasına baxmayaraq, hələ heç kəs bu ordenlə təltif edilməyib.
Onu da bildirək ki, "Şah İsmayıl" ordeninin hansı səbəbdən aidiyyəti sahə üzrə təqdim edilməməsi bir neçə ildir müzakirə predmetinə çevrilib. Mövzu ilə bağlı müxtəlif fikirlər mövcuddur.
Tanınmış hərbi ekspert Üzeyir Cəfərov bizimlə söhbətində bildirdi ki, müvafiq əsasnaməyə görə, orden ancaq döyüş zamanı qəhrəmanlıq göstərən insanlara verilməlidir. Onun sözlərinə görə, torpaqlarımızın düşməndən azad edilməsi prosesinə başlandıqdan sonra müharibədə xüsusi şücaət göstərən hərbçilərimiz bu ordenə layiq görülə bilər: "Hər medalın, ordenin, təltifin öz təyinatı var, "Şah İsmayıl" ordeninin də həmçinin. Bu ordenin indiyə qədər verilməməsinin səbəbi odur ki, hələ biz torpaqlarımızı işğaldan xilas etməmişik. İndiki vəziyyətdə bu ordenin verilməsi məqsədəuyğun deyil. Allahın köməkliyi ilə biz öz torpaqlarımızı düşməndən azad edəcəyik. Müharibə dövründə qəhrəmanlıq göstərən hərbçilər bu ordenlə təltif ediləcək. Bu ancaq müharibənin gedişi zamanı verilə bilər. Torpaqlarımızın düşməndən azad edilməsində xüsusi qəhrəmanlıq göstərən insanlar bu ordenə layiq görüləcək. Biz o ordenin ilk sahibini gözləyirik".
Qarabağ Azadlıq Təşkilatının sədri Akif Nağının qənaətinə görə isə, bu gün Azərbaycanda "Şah İsmayıl" ordeninə layiq olan zabitlərimiz var: "Orden təsis olunubsa, ona layiq olan şəxsə verilməlidir. Bilirsiniz ki, cəbhədə vəziyyət gərgindir. Torpaqlarımızın müdafiəsi uğrunda şəhidlər veririk. Lokal şəkildə də olsa müharibə gedir. Çox arzu edərdim ki, "Şah İsmayıl" ordeni torpaqlarımızın müdafiəsində xüsusi fərqlənən hərbçilərimizə verilsin. Bu gün onların sayı az deyil. Aprel döyüşlərində qəhrəmanlıq göstərən igidlərimiz var. Aprel döyüşlərində iştirak edib şücaət göstərənlər arasında bu ordenə layiq zabitlərimiz var. Bu orden igidlik göstərən insanlara verilməlidir".
İradə SARIYEVA
