"Hərbi hissələrin yardımçı təsərrüfatlarında yetişdirilən meyvə-tərəvəzlə əsgərlər qidalanacaq və əlavə vəsait xərclənməyəcək"
Azərbaycanda hərbi hissələrin şəxsi heyətinin ərzaq, təzə tərəvəz və digər kənd təsərrüfatı məhsulları ilə təminatını gücləndirmək məqsədilə hərbi hissələrdə yardımçı təsərrüfatlar yaradılacaq. Bu barədə Nazirlər Kabinetinin 2016-cı ilə dair hesabatında qeyd edilib.
Artıq bəzi hərbi hissələrdə yardımçı təsərrüfatlar yaradılıb.
Hərbi hissələrdə yardımçı təsərrüfatların yaradılması ilə bağlı fikir bildirən hərbi ekspert Üzeyir Cəfərov "Bakı-Xəbər"ə açıqlamasında bunları qeyd etdi: "Hərbi hissələrdə yardımçı təsərrüfatların yaradılması yalnız ölkənin xeyrinə olacaq. Sabiq müdafiə nazirinin dövründə yardımçı təsərrüfatlar ləğv olundu. Beləliklə, hərbi hissələr əlavə vəsait sərf etməyə başladılar.
Hər bir hərbi hissənin yardımçı təsərrüfatı olsa, bu, əlavə vəsaitin kənara çıxmasının qarşısını alacaq. Hərbi hissələrin yardımçı təsərrüfatlarında yetişdirilən meyvə-tərəvəzlə əsgərlər qidalanacaq və əlavə vəsait xərclənməyəcək. Bayramlarda əsgərlərin qidalanması üçün əvvəllər kənar ərazilərdən müxtəlif növ meyvə və tərəvəz alıb gətirirdilər. Artıq bu işlə məşğul olan şəxslər elə hərbi hissənin yardımçı təsərrüfatından istədikləri meyvə və ya tərəvəzi əldə edə biləcək".
Həmsöhbətimizin fikrincə, hərbi hissələrin yardımçı təsərrüfatlarına hərbçilər deyil, kənardan sırf bu işlə məşğul olanlar cəlb olunacaq: "Necə ki, yeməklərin hazırlanmasına hərbi hissənin yerləşdiyi əraziyə yaxın yerlərdə yaşayan xanımlar mülki xidmətçi kimi cəlb olunub. Bu həm hərbi hissələrin yerləşdiyi əraziyə yaxın yerlərdə işsizlik problemini həll etdi, həm də yeməklərin keyfiyyətli hazırlanmasına kömək oldu. Yardımçı təsərrüfat sahəsinə hərbi hissəyə yaxın ərazidə yaşayan şəxslərin cəlb olunması daha məqsədəuyğundur. Çünki hərbçilərin diqqəti yalnız döyüş hazırlığında olmalıdır".
Ü.Cəfərov onu da əlavə etdi ki, əvvəllər hərbi hissələrin yardımçı təsərrüfatlarında meyvə-tərəvəz yetişdirməklə yanaşı, heyvandarlıqla da məşğul olunurdu: "Yardımçı təsərrüfatlarda saxlanan müxtəlif növ heyvanların həm ətindən, həm də südündən əsgərlər yararlanırdı. Analoji qaydanın yenidən bərpa olunması ölkə iqtisadiyyatına müsbət təsir edəcək. Hərbi hissələrdə yardımçı təsərrüfatların yaradılmasını müsbət qarşılayıram".
Günel CƏLİLOVA
