Vüqar Qədirov: "Çünki ərazilərində məskunlaşan qaçqın ailələri barədə onlarda çox dəqiq informasiya var"
Məlum olduğu kimi, Azərbaycanın Birinci vitse-prezidenti Mehriban Əliyevanın sədrliyi ilə Bakı və Sumqayıt şəhərlərinin yataqxanalarında müvəqqəti məskunlaşmış qaçqın və məcburi köçkün ailələrinin köçürülməsinə həsr olunmuş müşavirə keçirilib.
Azərbaycanın Birinci vitse-prezidenti M.Əliyeva müşavirənin doğma torpaqlarından didərgin düşmüş soydaşlarımızın problemlərinin həllinə həsr edildiyini, bu məsələnin artıq 20 ildən çoxdur dövlətin diqqət mərkəzində olduğunu bildirib. O vurğulayıb ki, məsələnin tezliklə həlli üçün Maliyyə Nazirliyi ilə Bakı Şəhər İcra Hakimiyyəti arasında işçi qrup yaradılmalıdır. "Bu gün qarşımızda duran əsas məqsəd Bakı və Sumqayıt şəhərlərindəki 4 min köçkün ailəsini yeni mənzillərlə təmin etməkdir. Ən qəzalı, ən ağır vəziyyətdə yaşayan ailələr tezliklə yeni binalara köçürülməlidir" - deyən M.Əliyeva bu istiqamətdə müvafiq dövlət orqanları arasında əlaqələndirmənin aparılması ilə bağlı tapşırıqlarını verib. Azərbaycanın Birinci vitse-prezidenti qaçqınların və məcburi köçkünlərin işlə təmin olunması istiqamətində rayon icra hakimiyyətlərinə təkliflər hazırlamağı tapşırıb. M.Əliyeva Ermənistan-Azərbaycan, Dağlıq Qarabağ münaqişəsinin ədalətli həllini tapacağına, ərazi bütövlüyümüzün bərpa olunacağına, bütün qaçqın və məcburi köçkünlərin öz doğma yurdlarına qayıdacağına əminliyini ifadə edib. Göründüyü kimi, müvafiq rayonların icra başçılarına qaçqın və məcburi köçkünlərin işlə təmin olunması istiqamətində təkliflərin hazırlanmasına dair tapşırıq verilib. İcra başçıları bu istiqamətdə nə etməlidir?
Qaçqın və Məcburi Köçkün Gənclər Birliyinin sədri Vüqar Qədirov qəzetimizə bildirdi ki, Mehriban xanımın bu təşəbbüsü onlar tərəfindən böyük sevinclə qarşılanıb:
"Bilirsiniz ki, Azərbaycan dövləti uzun illərdir bu istiqamətdə ciddi işlər aparır. Qaçqın və məcburi köçkünlərin həyat vəziyyətinin yaxşılaşdırılması istiqamətində kifayət qədər işlər görülüb. Aydındır ki, dövlətin bu sahəyə qayğısı olmasaydı, vəziyyət acınacaqlı xarakter alardı. Mehriban xanımın Birinci vitse-prezident təyinatından sonra ilk müşavirəsini məhz qaçqın və məcburi köçkünlərin probleminə həsr etməsi deyilən kateqoriya insanlara göstərilən diqqətin göstəricisidir. Müşavirədə qaçqınların mənzil şəraitinin yaxşılaşdırılması ilə yanaşı, onların işlə təmin olunması istiqamətində zəruri işlərin görülməsinə dair tapşırıq verilib. Nəzərdə tutulan rayonların icra başçıları bu sahədə ciddi təkliflər verə bilər. Çünki ərazilərində məskunlaşan qaçqın ailələri barədə onlarda çox dəqiq informasiya var. Bu da imkan verir ki, hansı royonda nə qədər işçi potensialının varlığı barədə məlumatlı olsunlar. İcra başçıları buna müvafiq iş yerlərinin açılmasını da təklif edə bilər. Hesab edirəm ki, bu tapşırıqdan sonra məcburi köçkünlərin deyilən rayonlarda işlə təmin olunmasında problem yaşanmayacaq. Burada söhbət yeni iş yerlərinin açılması və sırf məcburi köçkünlərin həmin işlərə cəlb edilməsindən gedir".
Məhəmmədəli QƏRİBLİ
