Tərlan Eyvazov: "Bütün bunlar ordunun fiziki hazırlığına, hərbi qulluqçuların sağlamlığına müsbət təsir edir"
Ordunun güclü olması təkcə silah-sursatla deyil, eyni zamanda əsgərlərin durumu ilə də ölçülür. Hərbi qulluqçunun durumu onun qidalanmasından çox asılıdır. General-polkovnik Zakir Həsənov Azərbaycanın müdafiə naziri təyin olunduqdan sonra ordu sistemində islahatlar keçirilməyə başladı. Bu islahatlara ordunun qidalanması məsələsi də daxil edildi. Belə ki, keyfiyyətsiz ərzaq məhsullarının qəbul olunmasının qarşısının alınması məqsədilə ərzaqların müəssisələr tərəfindən birbaşa hərbi hissələrə təhvil verilməsi qadağan edildi.
Bununla yanaşı, müəssisələr tərəfindən təhvil verilən ərzaq məhsullarının keyfiyyəti Mərkəzi Hərbi Baytarlıq Laboratoriyası tərəfindən yoxlanıldıqdan sonra mərkəzi ərzaq anbarına qəbul olunur və şəxsi heyətin təminatı üçün mərkəzləşdirilmiş qaydada hərbi hissələrə paylanır. Əvvəllər yeməklərin bişirilməsi ilə əsgərlərin arasından seçilmiş aşpazlar məşğul olurdusa, sonradan bu iş mülki vətəndaşlara tapşırıldı. Artıq xeyli müddətdir hərbi hissələrdə milli yeməklərin əsgərlərin qida rasionuna daxil edilməsi prosesi davam edir.
Silahlı Qüvvələr və Azərbaycan Respublikasının qanunvericiliyinə uyğun olaraq yaradılmış başqa silahlı birləşmələrin şəxsi heyəti üçün ərzaq payı normaları 2013-cü ilin yanvar ayında Nazirlər Kabineti tərəfindən təsdiq edilib. Bu siyahıda əsgərin gündəlik qidalanması üçün müəyyən edilmiş qida məhsullarının sayı 24-ə çatır.
Ümumilikdə, qida məhsullarının sayının 24-ə çatması əsgərlərin fiziki hazırlığına, sağlamlığına nə kimi müsbət təsir göstərir? Sözügedən məsələni dəyərləndirən hərbi ekspert Tərlan Eyvazovun fikrincə, Azərbaycan Ordusunda hərbi qulluqçulara göstərilən diqqət yüksəkdir: "Biz sovet ordusundan ayrılandan sonra öncəliklə müstəqil ordumuzu yaratmağa başladıq. Çünki biz təzyiqlərə məruz qalan ölkə idik. Təbii ki, o zamanlar bütün normativ aktları, nizamnamələri birdən-birə yarada bilməzdik. Yəni bu, zaman tələb edən bir məsələdir. Biz zamanla sıra və döyüş nizamnamələri, digər sənəd və normativ aktları bərpa etdik. Son illər Nazirlər Kabinetinin qərarı ilə Azərbaycan Ordusunun qida rasionuna müəyyən dəyişikliklər edilib. Bizim ordumuzda çörək və ət norması sovetin normasına nisbətən artırılıb. Biz sovet ordusunun ərzaq normaları ilə ordumuzun ərzaq normalarını müqayisə etsək, fərqin nə qədər böyük olduğunu görə bilərik. Bundan başqa, ötən illər mətbəxdə yeməklərin hazırlanması hərbi qulluqçulara həvalə edilirdi. Əsgərlərin qidalanmasında kilokalori məsələsinə gəlincə, müəyyən hərbi birləşmələrin kilokalorisi fərqli olur. Məsələn, xüsusi təyinatlı hərbi birləşmə ilə sıravi hərbi birləşmənin kilokalorisi eyni deyil. Bu, sovet ordusunda da belə idi. Ancaq bizdə qida rasionuna müəyyən qədər milli xörək növləri daxil edilib. Bütün bunlar ordunun fiziki hazırlığına, hərbi qulluqçuların sağlamlığına müsbət təsir edir".
Vidadi ORDAHALLI
