Türkiyə prezidenti Putindən PYD-nin Moskva ofisinin bağlanmasını istədi
2016-cı ilin avqustunda yeni səhifə açan Türkiyə və Rusiya liderləri bu gün Moskvada yenidən bir araya gəlib. Türkiyə prezidenti Rəcəb Tayyib Ərdoğan və Rusiya prezidenti Vladimir Putinin təkbətək görüşü 1 saat 15 dəqiqə çəkib.
Baki-xeber.com xəbər verir ki, görüşdən sonra Ərdoğan Türkiyənin Rusiyadan MS-21 təyyarələrinin tədarükündə maraqlı olduğunu deyib: “Rusiya və Türkiyə arasındakı hərbi əməkdaşlıq çox əhəmiyyətlidir, bunu Putinlə danışdıq".
"Son vaxtlar Türkiyə və Rusiya əlaqələrinin iki ölkəyə yaraşan şəkildə olması üçün çalışırıq. Rusiya və Türkiyə ordusu arasında belə yaxın bir əməkdaşlıq qurulacağını kimsə gözləmirdi". Bunu isə Putin deyib.
"Dağlıq Qarabağ münaqişəsinin həlli təcili addımlar tələb edir. Təmas xəttində baş verənlər vəziyyətin nə qədər kritik olduğunu, Azərbaycanla Ermənistan arasında yeni müharibə risqinin nə qədər artdığını göstərir”. Bu sözləri isə Ərdoğan Rusiya-Türkiyə Yüksək Səviyyəli Əməkdaşlıq Şurasının Moskvada keçirilən VI iclasında deyib (APA).
R. T. Ərdoğan münaqişənin həlli üzrə hərtərəfli müzakirələrin tezliklə başlamasını zəruri hesab etdiklərini bildirib: “ATƏT-in Minsk qrupu həmsədrlərindən biri olan Rusiyanın bu münaqişənin həllində qabaqcıl rol oynaya biləcəyinə inanırıq”.
Ərdoğan deyib ki, ”bu gün Rusiya prezidenti Vladimir Putinlə Suriya münaqişəsi və terrorla mübarizə ilə bağlı dəyərləndirmələrimizi bölüşdük. Axan qanın durması, Suriyada sabitliyin bərpası üçün hər birimizin üzərinə böyük vəzifələr düşür”.
O bildirib ki, terrorla mübarizədə birgə hərəkət etmək böyük əhəmiyyət daşıyır: “Müvafiq qurumlarımız bu barədə təkliflərini verəcəklər. Suriyada İŞİD-ə qarşı nümayiş etdirdiyimiz mövqeni digər terror təşkilatlarına qarşı da nümayiş etdirməliyik. Bu baxımdan PKK-nın Suriya qolu olan PYD-nin Moskvadakı fəaliyyətlərinə son verilməsini xüsusi qeyd edirik”.
Putin isə bildirib ki, Rusiya və Türkiyə, son zamanlar Suriya da daxil olmaqla dünyadakı böhranları həll etmək üçün aktiv bir şəkildə çalışır: “Rusiya və Türkiyə, müdafiə təşkilatları və kəşfiyyat təşkilatları səviyyəsində yaxşı və təsirli əlaqələr qurub. Rusiya ilə Türkiyə arasındakı əlaqələr sürətli bir templə davam edir, Moskva bundan çox məmnundur. Əlaqələrimizin daha da yüksəlməsi üçün aktiv bir şəkildə çalışırıq. Rusiya və Türkiyə ordusu arasında belə yaxın bir əməkdaşlıq qurulacağını kimsə gözləmirdi".
"Rusiya güc strukturları türkiyəli həmkarları ilə terrorla əlaqəsi olan şəxslərin mübadiləsində maraqlıdır" - Putin deyib.
Rusiya prezidenti qeyd edib ki, iki ölkə arasında hərbi-texniki sahədə əməkdaşlıq və müdafiə nazirlikləri xətti ilə təmaslar çox böyük önəm daşıyır.
"FETO terror təşkilatı ilə mübarizəyə nə qədər önəm verdiyimiz məlumunuzdur. Bu mövzuda göstərdiyini həssaslığa görə sizə təşəkkürümü bildirirəm". Bunu isə Türkiyə prezidenti deyib. "Ancaq bu terror təşkilatının başqa adlar altında fərqli sahələrdə gizli fəaliyyət göstərdiyini unutmaq olmaz. Moskva və Sankt-Peterburqda FETO ilə əlaqədə olan insanlar və təşkilatlar haqqında gərəkli addımları atacağınıza inanıram", - deyə o, söyləyib.
