ABŞ-ın Bakıdakı Səfirliyindən "Bakı-Xəbər"ə verilən məlumata görə, martın 9-da səfir Robert Sekuta və xanımı Səfirlik tərəfindən Beynəlxalq Qadınlar Gününün tanınması çərçivəsində Masallıda qadın-sahibkarları ziyarət edib.
Səfər çərçivəsində onlar ABŞ hökumətinin Azərbaycanın cənub bölgələrində qadınların hüquq və imkanlarının genişlənməsini və iqtisadi şaxələnməni dəstəklədiyini vurğulamaq məqsədilə Masallı, Lənkəran və Astara rayonlarında olub.
Masallıda səfir və xanımı qadın sahibkarlığını təbliğ edən Qadın Resursları Mərkəzini (QRM) və gənclərin iş bacarıqları üzrə təlim və məşğulluq sahəsində şəbəkənin yaradılması üzrə SYSLAB Təlim Mərkəzini ziyarət edib. QRM və SYSLAB Mərkəzi ABŞ-ın Beynəlxalq İnkişaf Agentliyi (USAID) tərəfindən maliyyələşdirilir və Azərbaycan Hökuməti ilə tərəfdaşlıq çərçivəsində Birləşmiş Millətlər Təşkilatının İnkişaf Proqramı (UNDP) tərəfindən idarə olunur. QRM yalnız Masallı rayonunda 500-dən çox qadın və onların ailələrinə dəstək göstərir. Xanım Sekuta qadınların qlobal problemlərini müzakirə etmək məqsədilə icmanın qadın üzvləri ilə Dəyirmi masa keçirib.
Azərbaycan hökumətinin öz vətəndaşlarına müasir texnologiyalar vasitəsilə xidmət göstərdiyi və hazırda SYSLAB Mərkəzinin məzunlarının çalışdığı ASAN Həyat Mərkəzinə də baş çəkən səfir və xanımı rayonda Birləşmiş Ştatların dəstəklədiyi fəaliyyət növlərini müzakirə etmək məqsədilə Masallı İcra Komitəsinin başçısı Rafil Hüseynovla görüş keçirib.
Lənkəranda isə səfir və xanımı "Parklarda Gəzinti" təşəbbüsü çərçivəsində Hirkan Milli Parkına da səfər edəcək. Onlar, həmçinin, dünya üzrə məşhur Azərbaycan çayının istehsalı haqqında daha çox öyrənmək üçün yerli çay plantasiyalarına da baxış keçirməyi planlaşdırır. Eyni zamanda, martın 10-da Astarada səfir və xanımı Gömrük postuna və Şimal-Cənub Tranzit Dəhlizinin bir hissəsi olan Azərbaycan və İran arasındakı yeni dəmiryol körpüsünə də səfər etməyi planlaşdırır. Həmin dəmiryol körpüsü iqtisadi şaxələnməyə imkan yaratmaqla Azərbaycanın tranzit ticarət marşrutu kimi əhəmiyyətinin artmasına qiymətli töhfəsini verəcək. Səfir və xanımının səfər proqramına, həmçinin, tələbələrlə və Lənkəranın 4 saylı orta məktəbində Azərbaycan İngilis dili Müəllimləri Assosiasiyasının yerli üzvləriilə də görüşlər daxildir.
Qeyd edək ki, 1992-ci ildən etibarən ABŞ Azərbaycana Beynəlxalq İnkişaf Proqramlarının, məcburi köçkünlərə yardım və həmçinin səhiyyənin, kənd təsərrüfatının, vətəndaş cəmiyyətinin, iqtisadi inkişafın, qadın sahibkarlığının inkişaf etdirilməsi məqsədilə 1.3 milyard dollardan çox vəsait ayırıb.
Xəbər xidməti
