"İnformasiya savaşında əksər hallarda erməni tərəfi çoxsaylı dezinformasiya yayaraq ictimai rəydə çaşqınlıq yaratmağa çalışır"
Cəbhədə baş verən gərginlik Azərbaycan və Ermənistan mediası arasında informasiya savaşının daha da qızışmasına yol açıb. Təəssüf ki, bəzən qeyri-peşəkarlıq əlamətləri də özünü büruzə verir. Bu xüsusən sosial mediaya aiddir. Bütövlükdə götürəndə, peşəkar media proseslərə fərqli yanaşır və öz işini daha yaxşı bilir.
O da məlumdur ki, son illər cəbhədə atəşkəs ermənilər tərəfindən 3 dəfə genişmiqyaslı formada pozulub və bu, böyük toqquşmalara səbəb olub. Hər üç halda baş verən hadisələr media tərəfindən işıqlandırılıb. Birinci dəfə 2014-cü ilin avqustunda cəbhədə ciddi toqquşmalar oldu. İkinci bənzər toqquşma 2016-cı ilin aprelində yaşandı. Nəhayət, 2017-ci il fevralın 25-də baş verən toqquşmalar medianın diqqət mərkəzində oldu. Bununla yanaşı, Müdafiə Nazirliyinin istər sözügedən toqquşmalar, istərsə də digər bu kimi halların baş verməsi ilə bağlı müvafiq açıqlamaları olub. Bəzən Müdafiə Nazirliyini cəbhədə baş verən toqquşmalara dair məlumatın verilməsi ilə bağlı qeyri-operativlikdə ittiham edirlər. Bu cür yanaşma nə dərəcədə əsaslıdır? Nəzərə almaq lazımdır ki, MN bununla bağlı məlumat verəndə dövlət, milli maraqlardan çıxış edir. Düşmən tərəfinin yaydığı hər dezinformasiyaya reaksiya vermək qurumun nüfuzuna xələl gətirə bilər. Məsələ ondadır ki, cəbhədə toqquşma baş verəndə Ermənistan KİV-i nə gəldi yazır. Onlar bununla bağlı yazdıqlarına görə heç bir məsuliyyət daşımır. Diqqətçəkən məqamlardan biri də ondan ibarətdir ki, belə hallarda erməni mətbuatı öz itkilərindən ümumiyyətlə heç nə demir. Bütün bunların fonunda, MN-ni qeyri-operativlikdə günahlandırmaq nə dərəcədə doğrudur? Məsələyə münasibət bildirən media eksperti Yadigar Məmmədlinin sözlərinə görə, bu cür yanaşma doğru deyil: "Belə hallarda mütləq informasiya dəqiqləşdirilməli və ondan sonra yayılmalıdır. Cəbhə zonasında baş verənlərlə bağlı informasiya MN-in məlumatından sonra yayılmalıdır. Sözügedən qurumla dəqiqləşdirilməlidir. Son dövrlər görürük ki, müharibə təkcə cəbhədə yox, eyni zamanda, informasiya məkanında da gedir. İnformasiya savaşında əksər hallarda erməni tərəfi çoxsaylı dezinformasiya yayaraq ictimai rəydə çaşqınlıq yaratmağa çalışır. Bilərəkdən yanlış informasiyalarla internet məkanını doldururlar. Bu da sosial şəbəkələrə və jurnalistika prinsiplərinə ciddi riayət etməyən saytlara yol açır. Bu yolverilməzdir. Belə olan halda, MN-i qeyri-operativlikdə ittiham etmək doğru deyil".
Vidadi ORDAHALLI
