"Hesab edirəm ki, bu davamlı olmalıdır"
Xəbər veridiyi kimi, Azərbaycanın Ermənistan silahlı qüvvələri tərəfindən işğal edilmiş ərazilərində hüquqi şəxslərin qanunsuz iqtisadi fəaliyyətlə məşğul olmasına dair Azərbaycan Xarici İşlər Nazirliyindən daxil olmuş material Baş Prokurorluqda araşdırılıb.
Aparılmış araşdırmalarla İsveçrə, Bolqarıstan, Uruqvay, Argentina, Rumıniya və digər ölkələrin bir sıra şirkətlərinin, o cümlədən "Haik Watch and Jewelry Co", "Rodino Haskovo" JIC, "Centro Ceibal", "Deccan Gold Mines Ltd" və "Cosmote Romanian Mobile Telecommunications S.A" şirkətləri rəhbərlərinin 1999-2017-ci illərdə Azərbaycanın dövlət sərhədini Ermənistan Respublikası ərazisindən qanunsuz olaraq dəfələrlə keçməsinə, işğal altındakı ərazilərdə olan digər şəxslərlə mütəşəkkil dəstə halında Xankəndi, Şuşa şəhərləri, Laçın, Kəlbəcər rayonları və digər yaşayış məntəqələrində Azərbaycan Respublikasının qanunları ilə nəzərdə tutulmuş qaydada dövlət qeydiyyatına alınmadan müəssisələr yaradıb, təbii sərvət və faydalı qazıntıların istismarı da daxil olmaqla, apardığı fəaliyyətlə külli miqdarda ziyan vurmasına və qanunsuz gəlir əldə etməsinə, habelə işğalın möhkəmləndirilməsinə və Azərbaycanın ərazi bütövlüyünün parçalanmasına yönələn hərəkətlər etməsinə dair əsaslı şübhələr müəyyən edilib.
Həmin faktlar üzrə Azərbaycan Baş Prokurorluğunun Ağır cinayətlərə dair işlər üzrə istintaq idarəsində Cinayət Məcəlləsinin müvafiq maddələri ilə cinayət işi başlanıb, istintaq aparılır.
Ümumilikdə, bunun əhəmiyyətini ekspertlər necə dəyərləndirir? Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlı buna müsbət prizmadan yanaşdı: "Məsələ ondadır ki, beynəlxalq hüquqa uyğun olaraq Azərbaycan öz dövlət hüquqlarını müdafiə edir. Yəni işğal olunmuş ərazidə hansısa şirkət işə başlayırsa, mütləq Azərbaycanın mövqeyini nəzərə almalıdır. Azərbaycanın razılığı olmadan elə hərəkət edə bilməz. Bunu edirsə, deməli, həmin şirkət həm ölkə, həm də beynəlxalq qanunları pozur. Ona görə də Azərbaycan düzgün olaraq həmin şirkətlərə qarşı beynəlxalq hüquqdan istifadə edərək cinayət işləri qaldırır. Bu günlərdə Azıx mağarasında qanunsuz tədqiqat aparan arxeoloqlar barəsində İnterpola sorğu göndərildi. Bütün bunların hamısı həm Azərbaycanın beynəlxalq nüfuzunun artmasına, həm də işğalçını yerinə otuzdurmağa kömək edir. Ona görə də bu istiqamətdə görülən işləri dəstəkləyirəm. Hesab edirəm ki, bu davamlı olmalıdır. Yalnız o halda, xarici dövlətlərə məxsus şirkətlər bundan çəkinə bilər".
Vidadi ORDAHALLI
