"Hamımızın ümumi vəzifəsi xalqımızda vətənpərvərlik, Vətən torpağına, millətə sədaqət, Vətən uğrunda şəhidliyə hazır olmaq hisslərini formalaşdırmaq, inkişaf etdirmək və təbliğ etməkdir"
Heydər Əliyev
Fevral ayında Azərbaycan xalqı şanlı ordumuzun daha bir qəhrəmanlığının şahidi oldu. Belə ki, fevralın 24-dən 25-nə keçən gecə Ermənistan silahlı qüvvələrinin bölmələri bütün cəbhə boyu irimiqyaslı təxribatlar törətmək məqsədilə müxtəlif istiqamətlərdə mövqelərimizə soxulmağa cəhd göstəriblər.
Qoşunlarımız tərəfindən qarşı tərəfin daim izlənməsi, qurulan pusqular və döyüş mühafizəsinin təşkili nəticəsində düşmənin hərəkəti əvvəlcədən aşkar edilib və onun müdafiəmizin dərinliyinə irəliləməsinin qarşısı qətiyyətlə alınıb. Silahlı bölmələrimiz cəbhənin Xocavənd-Füzuli istiqamətində əlverişli mövqeləri ələ keçirməyə cəhd göstərən düşmən hücumunun qarşısını cəsarətlə alaraq onu geri çəkilməyə məcbur ediblər. Düşmənin kəşfiyyat-diversiya qrupunun Talış və Gülüstan istiqamətlərində təxribat törətmək cəhdlərinin də qarşısı alınıb.
Qeyd edək ki, Ermənistan silahlı qüvvələrinin bütün cəbhə boyu törətdiyi irimiqyaslı təxribatların qarşısını alarkən hərbi qulluqçularımız: Abdullayev Aqşin İsmayıl oğlu, Nəzərov Şahlar Yaşar oğlu, Haşımlı Tural Əbdül oğlu, Qədimov Zülfü Rəhim oğlu və Cəfərov Zakir Nazim oğlu qəhrəmancasına şəhid olublar.
Vətən uğrunda şəhid olmaq gənclərimizdəki milli ruhun təzahürüdür
Azərbaycan Respublikası Silahlı Qüvvələrinin ehtiyatda olan baş leytenantı, "Həftə içi" qəzetinin redaktoru Təbriz Vəfalı bildirir ki, hərbi xidməti dövründə döyüş bölgələrinin əksəriyyətində olub. Demək olar ki, bütün döyüş mövqelərimizə yaxın ərazilər mürəkkəb relyefə malikdir. Bəzi yerlər dağlıq və düzənlik ərazilərdir. Enişli-yoxuşlu, sıx ağaclı, kol-koslu yerlər də çoxdur: "Bəzi ərazilərdə səngərlərimizlə erməni silahlı birləşmələrinin mövqe tutduqları səngərlər arasındakı məsafə o qədər azdır ki, bu cür yerlərdə nəinki öz mövqeyindən düşmən mövqeyinə sarı qaçmaq, sürünmək, hətta səngərdən başını qaldırmaq belə düşmən gülləsinə açıq hədəf olmaq və 100 faizlik ölüm deməkdir. Ona görə də sözügedən ərazilərdə əsgər və zabit heyəti üçün döyüş hazırlığının aparılmasının çətinliyindən, bu cür ağır şəraitdə hərbi və xidməti tapşırıqların hansı formada yerinə yetirilməsindən xəbərdaram. Bu baxımdan da istər "aprel müharibəsi" zamanı döyüşlərin qələbə ilə başa çatdırılması, istərsə də fevral ayında əldə etdiyimiz uğurlu hərbi nəticələr ordumuzun möcüzəsidir, sözügedən döyüşlər və uğurlar dövlətimizin, ordumuzun gücünü, xalqımızın həmrəyliyini və vətənpərvərliyini nümayiş etdirir".
Ehtiyatda olan baş leytenant deyir ki, dövlətçiliyimizin möhkəmlənməsi gənclərin bir şəxsiyyət kimi formalaşmasından, onların milli və vətənpərvərlik ruhunda tərbiyəsindən çox asılıdır. Bunun üçün yeni nəsil yüksək ideyalı, nəcib və əsl vətənpərvər kimi formalaşdırılmalıdır. Vətəni və torpağı müdafiə etmək isə hər bir gənc üçün müqəddəs vəzifə olmalıdır: "Hər bir insanın tarixi qiyməti onun Vətənə və xalqa xidməti ilə, əsl insanlıq ləyaqəti isə vətənpərvərlik hissi ilə ölçülür. Ona görə də Azərbaycan xalqı gələcəyimiz olan gənc nəslin Vətənə məhəbbət, elinə və obasına hörmət, soykökünə, öz ata-baba ənənələrinə sədaqət ruhunda tərbiyə olunmasına həmişə böyük məsuliyyətlə yanaşıb və ona həyati əhəmiyyətli məsələ kimi baxıb. Çünki vətənpərvərlik insanda fədakarlıq, qəhrəmanlıq və məğlubedilməzlik hissi yaradır, apardığı mübarizədə onda inam hissini gücləndirir. Bu baxımdan da istər "Aprel müharibəsi", istərsə də fevral döyüşləri zamanı göstərdikləri igidliklər və şücaətlər hərbi qulluqçularımızın hərbi sahədə peşəkarlıqlarını və bacarıqlarını, həmçinin gənclərimizin Vətənimizə, xalqımıza və torpağımıza bağlılıqlarını üzə çıxartdı. Onlar əsl vətənpərvər olduqlarını əməlləri və qəhrəmanlıqları ilə nümayiş etdirdilər. Hərbçilərimiz yurdumuza, xalqımıza, dilimizə, adət və ənələrəimizə olan məhəbbətlərini və sədaqətlərini sübuta yetirdilər".
Təbriz Vəfalı vurğulayır ki, gələcək nəsillərin firavanlığı üçün torpaqlarımızın qorunması və Vətənimizin müdafiəsi uğrunda canından və qanından keçərək şəhidlik zirvəsinə ucalmaq ən böyük şərəf və qürurdur. Gənclərimizin şəhid olması isə gənc nəsildə milli ruhun oyanmasının təzahürüdür. Onun sözlərinə görə, gənc nəsildə milli şüurun inkişafı, vətənpərvərlik hisslərinin tərbiyəsində rol oynayan mühüm amillər, şərtlər və qanunlar çoxdur. Onların ən başlıcaları olan qəhrəmanlıqlarla zəngin hərb tariximizin öyrənilməsi, xalqımızın əsrlər boyu bizə örnək olan mərdliyinin, hünər və rəşadətinin, milli qürurunun təbliği ən mühüm vəzifədir: "Bundan əlavə, yeniyetmə və gənclərimizi milli ruhda tərbiyə etmək üçün onlara milli-mənəvi dəyərlərimizi, tariximizi, ana dilimizi, milli adət-ənənələrimizi də dərindən mənimsətməliyik. Çünki Azərbaycanın işğal olunmuş ərazilərinin azad edilməsi, ərazi bütövlüyünün təmin olunması üçün, güclü ordu ilə yanaşı, həm də milli ruhlu gənclərə ehtiyac var. Mən bir zabit kimi inanıram ki, Azərbaycanın Silahlı Qüvvələri zəbt olunmuş torpaqlarımızı qısa müddət ərzində işğaldan azad edəcək. Buna həm ordumuzdakı güclü nizam-intizam, həm hərbi gücümüz, həm də əsgərlərimizin milli ruhu və vətənpərvərliyi imkan verir. Prezident İlham Əliyev çıxışlarının birində deyib: "Bu gün qəhrəman oğullarımızın qəsbkar erməni işğalçılarına qarşı döyüşlərdə qazandıqları misilsiz qəhrəmanlıqlar əsl vətənpərvərlik tərbiyəsidir. Onlar müharibə cəbhələrində igidliklə vuruşaraq, doğma respublikamızın ərazi bütövlüyünü qoruyub saxlamaq üçün öz canlarını qurban verirlər. Azərbaycan torpaqları işğalçı qüvvələrdən azad olunacaq, bizim soydaşlarımız öz doğma torpaqlarına qayıdacaqlar".
Vətənpərvərlik qəhrəmanlığın əsasını qoyan amildir
Ehtiyatda olan polkovnik-leytenant Mürsəl Qurbanov bildirir ki, vətənpərvərlik qəhrəmanlığın əsasını qoyan amildir. Biz şanlı tariximizlə, əfsanəvi qəhrəmanlarımızla həmişə fəxr edirik: "Cavanşır, Babək, Şah İsmayıl Xətai, Səmədağa Mehmandarov, Əliağa Şıxlinski, Cəmşid bəy Naxçıvanski, Həzi Aslanov, İsrafil Məmmədov və Mehdi Hüseynzadə kimi igid və cəsur sərkədələrimizin şəxsi nümunəsi göstərir ki, Azərbaycan xalqı qəhrəman xalqdır. Və bu xalq öz Vətənini göz bəbəyi kimi qorumağa hazır olan mətin gənclər yetişdirib. Ona görə də erməni qəsbkarlarına qarşı ölüm-dirim savaşında həlak olmuş qəhrəmanlarımızın ibrətamiz həyatı, şəxsi nümunəsi hərbi vətənpərvərlik tərbiyəsi işində ön plana keçməlidir".
Polkovnik-leytenant deyir ki, rus imperiyası işi qəsdən elə qurmuşdu ki, xalq öz soykökündən, qəhrəmanlıq tarixindən, adət-ənənələrindən uzaq düşsün. Keçmiş Sovetlər Birliyi dövründə mövcud dərsliklərdə, dərs vəsaitlərində və metodik ədəbiyyatda hərbi vətənpərvərlik hissləri aşılayan məlumatlar və hərbi məzmunlu biliklər məxfilik üzündən verilmirdi. Əslində bu şüurlu surətdə edilirdi ki, gənclər vətənpərvərlik duyğularından məhrum olsunlar, Vətənin müdafiəsi üçün lazımi bilikləri almasınlar: "Müstəqil respublikamızın inkişafı ilk növbədə böyüyən nəslin təlim-tərbiyə işinin düzgün təşkilindən, vətəndaşlıq hazırlığından asılıdır. Gənclərin bir vətəndaş kimi böyüməsində ailənin, cəmiyyətin və ümumilikdə mühitin rolu böyükdür. Gənclər bir insan kimi, vətəndaş kimi ilk tərbiyəni ailədən alır. Onlar ailədə əxlaqi-mənəvi keyfiyyətləri, fiziki möhkəmliyi, əmək vərdişlərini, davranış qaydalarını, bədii-estetik duyumu və sair kimi keyfiyyətləri qazanırlar. Tərbiyənin əsas məqsədi kamil şəxsiyyət-insan-vətəndaş yetişdirməkdir. Vətəndaş tərbiyə etmək isə mənsub olduğu dövlətin inkişafına çalışan, mənafeyini gözləyən, onun təhlükəsizliyi üçün məsuliyyət daşıyan, dövlətin cari və perespektiv işlərində iştirak edən insan yetişdirmək deməkdir".
Mürsəl Qurbanov vurğulayır ki, insan fərd kimi doğulub, vətəndaş kimi fəaliyyət göstərərək tərbiyə-təhsil prosesində, əmək prosesində vətəndaş hazırlığı keçir. Əsl vətəndaş isə Vətənə, dövlətə gərəkli fəaliyyəti ilə xidmət edən, böyük mənəvi keyfiyyətlərə malik olan insandır. Vətənpərvərlik tərbiyəsinin mənbəyi ailədir. Təcrübə göstərir ki, ailədə vətənpərvərlik tərbiyəsi yalnız özbaşına axınla kor-koranə deyil, planlı, sistemli və məqsədli şəkildə təşkil olunmalıdır: "Gənclərin vətənpərvərlik tərbiyəsi dedikdə yüksək əxlaqi, mənəvi keyfiyyətlərə yiyələnmə və şəxsiyyət kimi yetişmə nəzərdə tutulur. Onlar davranış qaydalarını, nizam-intizamı, savadlı olmağı, Vətəninin tarixini, coğrafiyasını, mədəniyyətini, milli adət-ənənələrini bilməlı və Vətəni sevməlıdirlər. Gənclər ideyaca savadlı olmalı, işə şüurlu yanaşmalı, məsuliyyətli, vicdanlı, mübariz olmalı, pis niyyətlə və əliəyriliklərlə barışmamalıdır. Mənəviyyat tərbiyəsini qiymətləndirmək üçün gənclərdə yaxşını pisdən ayırmaq, həqiqətə, ədalətə, insanlara - böyüklərə, ailə üzvlərinə hörmət etmək kimi insani keyfiyyətlər aşılanmalıdır. Onların davranış xüsusiyyətlərini uyğun qiymətləndirməli, yaxşı davranış və qarşılıqlı əlaqə təmin olunmalıdır. Azərbaycanda hüquqi və demokratik dövlət quruculuğu inkişaf etdikcə vətənpərvərlik tərbiyəsinə, o cümlədən böyüməkdə olan nəslin hərbi vətənpərvərlik tərbiyəsinə xüsusi diqqət yetirilməlidir. Gənclərdə vətəndaşlıq, vətənpərvərlik duyğularını formalaşdırmaq üçün bütün zəruri vasitələrdən istifadə edilməlidir. Çünki Vətən sevgisi gənc vətəndaşlarımızın məqsədyönlü davranışının və fəaliyyətinin motivi və ideyasıdır".
Gənclərin milli ruhda tərbiyə edilməsi ümumtəhsil məktəblərinin əsas vəzifəsidir
Qax rayonunda hərbi müəllim işləyən, ehtiyatda olan leytenant Azər Həsənov deyir ki, gənclərin vətənpərvərlik, dövlətimizə və xalqımıza məhəbbət ruhunda tərbiyə edilməsi ən mühüm vəzifələrdən biridir və bu vəzifənin icrasında ümumtəhsil məktəbləri xüsusi rol oynamalıdır. Onun sözlərinə görə, təhsil ocaqları ictimai inkişaf qanunlarını şagirdlərə başa salmalı, məktəbliləri xalqımızın ənənələri, Vətənin müdafiəsinə hazır olmaq ruhunda tərbiyələndirməli, onlarda yüksək vətənpərvərlik hissini xalqımızın əxlaqına zidd təzahürlərə qarşı qətiyyətli mübarizə ruhunda inkişaf etdirməlidir: "Azərbaycan ordusunun və xalqımızın Qarabağ müharibəsində düşmən təhlükəsinə qarşı mübarizədə göstərdiyi qəhrəmanlıqların, igidliklərin öyrənilməsi məktəblilərin hərbi vətənpərvərlik tərbiyəsi üçün xüsusi əhəmiyyətə malikdir. Azərbaycan Silahlı Qüvvələrinin şanlı qəhrəmanlıq tarixi ilə tanışlıq gənclər üçün zəruri olan cəsurluq və şücaət, mərdlik, xalqa və vətənə sədaqət kimi keyfiyyətlər tərbiyə edir. Məktəbdə hərbi vətənpərvərlik tərbiyəsinin bütün sistemi gənclərin qəlbində yaşlı nəslin keçmiş ənənələrinə yüksək inam və sədaqət hissini alovlandırmalı, hər bir məktəbli oğlan və qız dərindən hiss etməlidir ki, o, öz babalarının, atalarının və böyük qardaşlarının dönməz davamçısıdır. Məktəbdə hərbi vətənpərvərlik tərbiyəsinin əsas məzmununu məhz bu prinsip təşkil etməlidir".
İdrak CAMALBƏYLİ
Yazı Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun keçirdiyi müsabiqəyə təqdim edilir.
